“Mu Si Ke Mwa Saba, mi Mu Si Ke Mwa Mbemuka”

“Mu si ke mwa saba, mi mu si ke mwa mbemuka . . . [Muñ’a] Bupilo mu inzi ni Yena.”—2 MAKOLONIKA 20:17.

1. Likezo za businyi ze mbemukisa li ama cwañi batu, mi ki kabakalañi sabo ya bona ha i li ye utwahala?

LIKEZO za businyi ze mbemukisa! Yona pulelo yeo fela i tahisa sabo, ni maikuto a ku sa ba ni buiketo ni ku sa ziba za ku eza. I tahisa maikuto a shutana-shutana a sabo, maswabi ni bunyemi. Mi ki pulelo ye talusa nto ye ba ikalezwi ba bañata kuli i ka kataza batu ka lilimo-limo ze sa taha. Maikuto ao a bonahala ku ba a’ utwahala kakuli ka lilimo-limo, linaha ze ñwi se li lwanisize mifuta-futa ya likezo za businyi zeo ze mbemukisa, mi ha li si ka tula luli ndwa yeo.

2. Lipaki za Jehova b’a nga cwañi butata bwa likezo za businyi ze mbemukisa, mi kacwalo ku zuha lipuzo mañi?

² Niteñi, ku na ni libaka le li tiile la ku ba ni sepo. Lipaki za Jehova, ba ba kutaza mwa linaha ni likalulo za lifasi ze 234, ba na ni sepo ye tiile. Ku fita ku saba kuli likezo za businyi zeo ha li na ku feliswa, ba kolwa kuli li ka tuha li feliswa. Kana ku ba ni sepo ye cwalo kwa utwahala? Ki mañi ya kona ku felisa  ncwa yeo mwa lifasi, mi nto yeo i kona ku ezahala cwañi? Ka ku ba kuli mwendi kaufel’a luna se lu amilwe ki mufilifili wa mufuta o muñwi, ne ku ka ba hande ku tatubisisa fo i tomile sepo yeo.

3. Ki lika mañi ze tahisa sabo, mi ku polofitilweñi ka za linako za luna?

³ Kacenu, batu ba sabiswa ni ku mbemukiswa ki lika ze shutana-shutana. Mu nahane batu ba bañata-ñata be se ba palelwa ku ipabalela kabakala busupali, batu ba ba fokoliswa ki matuku a’ sa foli, ni mabasi a’ lika ka t’ata ku ipilisa. Mane, mu nahane ku sa swaleha hande kwa bona bupilo ka sibili! Nako kaufela ku kana kwa bonahala kuli lu bandamelwa ki mafu a ka sipundumukela, a’ kona ku sinya lika kaufela ze lu iyakatwa. Sabo ni lipilaelo ze cwalo, hamoho ni lifapahano ni maswabi a mañata a ka butu, li tahisa kuli linako za luna li be ka mw’a taluselize Paulusi kuli: “U zibe kuli, mwa mazazi a maungulelo, ku ka taha linako ze tata. Kakuli batu ba ka ba baitati, . . . ba ba si na lilato la taho, ba ba na ni ñole, ba ba seba batu ka buhata, ba ba sa koni ku iswala, ba ba na ni buhali, ba ba toya batu ba bande.”—2 Timotea 3:1-3.

4. Mwa manzwi a’ bonisa muinelo o maswe a’ kwa 2 Timotea 3:1-3, ki ifi kalulo ye fa sepo?

⁴ Nihaike liñolo le li bonisa muinelo o maswe, li bonisa hape kuli ku na ni sepo. Mu lemuhe kuli linako ze t’ata li ka ba teñi “mwa mazazi a maungulelo” a muinelo wa linto wa cwale wa Satani. Seo si talusa kuli kimuluho i tuha i taha mi muinelo o maswe wa lifasi u tuha u yoliwa ki puso ya Mubuso wa Mulimu o petehile, w’o Jesu n’a lutile balateleli ba hae ku u lapelela. (Mateu 6:9, 10) Mubuso w’o ki mulonga wa kwa lihalimu wa Mulimu, w’a bulela mupolofita Daniele kuli ha u na ku “sinyeha ku ya ku ile,” kono u “ka ketula ni ku feza mibuso kaufela [ya butu]; kono ona u ka ba teñi kamita ni ku ya ku ile.”—Daniele 2:44.

Buikambuso bwa Sikreste ni Likezo za Businyi Ze Mbemukisa

5. Linaha cwanoñu fa li ezizeñi ka za likezo za businyi?

⁵ Ka lilimo-limo, likezo za businyi se li bulaile batu ba bañata-ñata. Lifasi kaufela ne li zibile hahulu za ncwa yeo hamulaho wa sinyeho ye n’e ezizwe mwa New York City ni Washington, D. C., la September 11, 2001. Kabakala kuli likezo za businyi li atile ni kuli li fumaneha mwa lifasi kaufela, linaha za mwa lifasi kaufela ne li swalisani ka bubebe kuli li lwanise likezo zeo. Ka mutala, ka ku ya ka lipiho za babihi ba makande, la December 4, 2001, “batompehi kaufela ba ba talima za litaba ze ama linaha ze ñwi be ne ba zwa mwa linaha ze 55 za kwa Yurope, North America ni Central Asia ne ba lumezi ku itusisa mulelo” wa ku swalisana. Mutompehi yo muñwi wa kwa America n’a lumbile kezo yeo ni ku bulela kuli ne i “ekeza kwa buikatazo” bwa ku lwanisa likezo za businyi. Hañihañi, batu ba bañata-ñata ne ba tupwikezi mwa nto ye bizwa ki New York Times Magazine kuli “makalelo a ndwa ye tuna ka ku fitisisa.” Ku sa libelelwa ku bona haiba buikatazo b’o bu ka kondisa lika. Ku ba bañata, ndwa yeo ya ku lwanisa likezo za businyi ze mbemukisa i tahisize sabo ni ku ikalelwa, kono isi ku ba ba sepile Jehova.

6. (a) Ki kabakalañi ba bañwi fokuñwi ha ba kana ba fumana t’ata ku utwisisa libaka la buikambuso bwa Sikreste bwa Lipaki za Jehova? (b) Jesu n’a tomezi balateleli ba hae mutala mañi ka za bupolitiki?

 ⁶ Lipaki za Jehova ba zibahala ka buikambuso bwa bona ku za bupolitiki. Hailif’o batu ba bañata ba kana ba tabela ku ba ni mayemo ao ha ku na ni kozo, ha ku ba ngi cwalo ha ku zuha miinelo ye ipitezi. Hañata, sabo ni ku ikalelwa kabakala lindwa li tahisanga maikuto a tiile a ku yemela naha. Nto yeo i kona ku tahisa kuli ba bañwi ba fumane t’ata ku utwisisa libaka mutu ha n’a si ke a yemela mihato ye tumile mwa naha. Niteñi, Bakreste ba niti ba ziba kuli ba lukela ku utwa taelo ya Jesu ya ku sa ba “ba lifasi.” (Joani 15:19; 17:14-16; 18:36; Jakobo 4:4) Ku eza cwalo ku tokwa kuli ba ikambuse kwa litaba za bupolitiki ni za nyangela. Yena Jesu ka sibili n’a tomile mutala o munde. Ka ku ba kuli n’a na ni butali bo bu petehile ni buikoneli bo bu ipitezi, n’a ka be a tusize hahulu kwa miinelo ya mwa linako za n’a pilile. Kono n’a hanile ku kena ku za bupolitiki. Kwa makalelo a bukombwa bwa hae, n’a hanile ka ku tiya mpo ya n’a filwe ki Satani ya ku busa mibuso kaufela ya lifasi. Hasamulaho, n’a picukile ku fiwa situlo sa bupolitiki.—Mateu 4:8-10; Joani 6:14, 15.

7, 8. (a) Buikambuso bwa Lipaki za Jehova ku za bupolitiki ha bu talusiñi, mi ki kabakalañi? (b) Maroma 13:1, 2 i bonisa cwañi kuli ku abana mwa ku lwanisa milonga ku fosahezi?

⁷ Buikambuso bwa Lipaki za Jehova ha bu lukeli ku ngiwa ka mafosisa kuli ki ku yemela kamba ku sa isa pilu kwa likezo za mifilifili. Ku eza cwalo ne ku ka lwanisana ni ku ipapata kwa bona ku ba batanga ba “Mulimu wa lilato ni kozo.” (2 Makorinte 13:11) Ba itutile mw’a ikutwela Jehova ka za mifilifili. Walisamu n’a ñozi kuli: “[Muñ’a] Bupilo u lika ya na ni niti. Kono moya wa hae u toile ya maswe, ni ya lata situhu.” (Samu 11:5) Hape ba ziba za n’a bulezi Jesu ku muapositola Pitrosi kuli: “Kutisa mukwale wa hao mwa sipusu sa ona; kakuli kaufela ba ba swala mukwale, ba ka bulaiwa ka mukwale.”—Mateu 26:52.

⁸ Nihaike ze ezahezi li bonisa hande-nde kuli hañata Bakreste ba buhata ba itusisize “mukwale,” ha ku si ka ba cwalo kwa Lipaki za Jehova. Ha ba ikenyangi mwa likezo kaufela ze cwalo. Lipaki ba utwa ka busepahali taelo ye kwa Maroma 13:1, 2, ye li: “Mutu kaufela a ipeye mwatas’a ba ba beilwe fa bulena. Kakuli ha ku na bulena bo bu sa zwi ku Mulimu; kono bo bu li teñi bu tomilwe ki Mulimu. Hakulicwalo ya hana bulena, u hana se si tomilwe ki Mulimu; mi ba ba hana, ba ka ipumanela koto.”

9. Lipaki za Jehova ba lwanisa likezo za businyi ka linzila lifi ze peli?

⁹ Kono ka ku ba kuli likezo za businyi li maswe hahulu, kana Lipaki za Jehova ba lukela ku eza se siñwi kwa ku li lwanisa? B’a lukela, mi b’a eza cwalo. Sa pili, bona ka sibili ha ba ikenyangi mwa likezo ze cwalo. Sa bubeli, ba luta batu likuka za Sikreste ili zeo, haiba li latelelwa, li kona ku felisa mifilifili kaufela. * Ñohola, Lipaki ne ba tandile lihora ze 1,202,381,302 ba nze ba tusa batu ku ituta mupilelo wa Sikreste. Ku eza cwalo n’e si ku sinya nako, kakuli kabakala ona musebezi w’o, batu b’a 265,469 ne ba kolobelizwe ka ku ba Lipaki za Jehova, ili ku bonisa nyangela kuli ha ba lati mifilifili.

10. Ki ifi sepo ye li teñi ya kuli mifilifili ya mwa lifasi i ka feliswa?

¹⁰ Hape, Lipaki za Jehova ba lemuha kuli ka ili bona fela ha ba koni ku felisa bumaswe mwa lifasi. Ki lona libaka ha ba sepile ka ku tala Jehova Mulimu—yena ya kona ku eza cwalo. (Samu 83:18) Batu ba like ba mane, ha ba koni ku felisa mifilifili. Muñoli wa Bibele ya buyelezwi u lu lemusa cimo ka za linako za luna, ona “mazazi a maungulelo,” kuli: “Batu  ba lunya, ba ba puma, ba ka zwelapili mwa bumaswe, inze ba puma batu, mi ba pumiwa ni bona.” (2 Timotea 3:1, 13) Kacwalo, sepo ya kuli batu ba ka tula ndwa ya ku lwanisa bumaswe ha i yo. Kono lu kona ku sepa kuli Jehova u ka felisa mifilifili ka ku tala ni ku ya ku ile.—Samu 37:1, 2, 9-11; Liproverbia 24:19, 20; Isaya 60:18.

Ku Sa Saba, Twaniso Ha I Nze I Sutelela

11. Jehova s’a ngile mihato ifi kuli a felise mifilifili?

¹¹ Ka ku ba kuli Mulimu wa kozo u toile mifilifili, lwa kona ku utwisisa libaka h’a ngile mihato ya kuli musimululi wa yona, yena Satani Diabulosi, a bulaiwe. Mane, s’a tahisize kuli Satani a tulwe ki lingeloi Mikaele, yena Kreste Jesu, Mulena ya sa z’o beiwa ki Mulimu fa lubona. Bibele i talusa taba yeo cwana: “Cwale ndwa ya lwanwa mwa lihalimu. Mikaele ni mangeloi a hae a lwanisa drakoni. Drakoni ya lwana, i na ni mangeloi a yona. Kono mangeloi a Drakoni h’a si ka tula, mi sisa sa ona ha si si ka bonwa hape kwa lihalimu. Mi drakoni ye tuna, yona noha ya kale, ye bizwa Diabulosi ni Satani, ye pumanga lifasi kamukana, ya nepelwa mwa lifasi, ni mangeloi a yona a nepwa hamoho ni yona.”—Sinulo 12:7-9.

12, 13. (a) Silimo sa 1914 si zibahala ka lifi? (b) Bupolofita bwa Ezekiele bu polofitañi ka za ba ba yemela Mubuso wa Mulimu?

¹² Mo li tatamanela litaba za mwa Bibele ni ze ezahezi mwa lifasi za lumelelana, ili ku bonisa kuli silimo sa 1914 ki fona fo ne i ezahalezi ndwa yeo mwa lihalimu. Ku zwelela honaf’o, bumaswe bwa miinelo ya lika mwa lifasi bu zwezipili ku ekezeha. Sinulo 12:12 i fa libaka la seo, kuli: “Ka zeo, mina mahalimu ni ba ba yahile mwateñi, a mu tabe! Mu na ni bumai mina ba ba yahile mwa lifasi ni mwa liwate! kakuli Diabulosi u shetumukezi ku mina a halifile maswe, ka ku ziba kuli nako ya hae ki ye nyinyani.”

¹³ Kwa utwahala libaka buhali bwa Diabulosi ha bu libisizwe sihulu kwa balapeli ba Jehova ba ba tozizwe, ni balikani ba bona ba “lingu ze ñwi.” (Joani 10:16; Sinulo 12:17) Twaniso yeo i tuha i fela, Diabulosi h’a ka lwanisa h’a buhali bote ba ba yemela Mubuso wa Mulimu o tomilwe ili ba ba u sepile. Mwa Ezekiele kauhanyo 38, twaniso ye tuna yeo i bizwa kuli ki twaniso ya “Gogo, kwa naha ya Magogo.”

14. Lipaki za Jehova ba silelelizwe cwañi kwamulaho, mi kana ku ka ba cwalo kamita?

¹⁴ Ku zwa f’a lundulezwi Satani mwa lihalimu, batu ba Mulimu fokuñwi ba silelelizwe kwa twaniso ya Satani ki ba bupolitiki, ba ba talusizwe ka swanisezo kwa Sinulo 12:15, 16. Kono Bibele i bonisa kuli ka nako ya twaniso ya mafelelezo ya Satani, ha ku na likopano za butu ze ka sileleza ba ba sepile Jehova. Kana taba yeo ya swanela ku sabisa kamba ku mbemukisa Bakreste? Kutokwa!

15, 16. (a) Manzwi a Jehova a’ kolwisa kwa batu ba mwa linako za Josafati a fa sepo mañi kwa Bakreste kacenu? (b) Josafati ni batu bao ne ba tomezi batanga ba Mulimu kacenu mutala mañi?

¹⁵ Mulimu u ka yemela batu ba hae sina  ha n’a yemezi sicaba sa hae mwa linako za mulena Josafati. Lu bala kuli: “A mu teeleze mina Majuda kaufela, ni mina ba mwa Jerusalema, ni wena mulena Josafati! [Muñ’a] Bupilo s’a mi bulelela ki se, u li: Mu si ke mwa swaba, mi mu si ke mwa sabiswa ki sila se situna seo; kakuli ndwa haki ya mina, ki ya Mulimu. . . . Ha mu na ku tokwa ku lwana mwa ndwa ye. Mu itukise mi mu ikemele, mu ka bona mw’a piliseza [Muñ’a] Bupilo ye mu inzi ni Yena, mina Juda ni Jerusalema; mu si ke mwa saba, mi mu si ke mwa mbemuka. Kakusasana mu zwele ku bona, kakuli [Muñ’a] Bupilo mu inzi ni Yena.”—2 Makolonika 20:15-17.

¹⁶ Majuda ne ba kolwisizwe kuli ne ba si ke ba tokwa ku lwana. Ka ku swana, batu ba Mulimu ha ba ka lwaniswa ki Gogo wa kwa Magogo, ha ba na ku swala lilwaniso ni ku itwanela. Ba ka ‘ikemela, ni ku bona mw’a ka ba piliseza Jehova.’ Kono ku ikemela ha ku talusi ku sa eza ni se si kana, sina mo ne ku bezi mwa linako za Josafati kuli ne ba si ka yema fela ku si na se ba eza. Lu bala kuli: “Josafati kih’a inamisa pata, a inamela fafasi; mi bana ba Juda kaufela, ni ba mwa Jerusalema, ba wela fapil’a [Muñ’a] Bupilo. . . . Mi [Josafati] h’a s’a utwani ni sicaba, a beya baopeli ba ba ka opelela [Muñ’a] Bupilo, inze ba apezi liapalo ze nde ze kenile, ba zamaye mpi kwapili, ba lumbe, ba li: A mu itumele ku [Muñ’a] Bupilo; kakuli sishemo sa hae ki sa kamita.” (2 Makolonika 20:18-21) Luli, niha ne ba libilwe ki sila, batu bao ne ba zwezipili ku lumbeka Jehova. Nto yeo ki mutala o ba swanela ku likanyisa Lipaki za Jehova Gogo h’a ka kala ku ba lwanisa.

17, 18. (a) Lipaki za Jehova kacenu ba na ni mubonelo mañi o munde ka za twaniso ya Gogo? (b) Mikulwani ba Sikreste ne ba filwe kupuliso mañi cwanoñu fa?

¹⁷ Ku fitela nako yeo, mane nihaiba twaniso ya Gogo ha se i kalisize, Lipaki za Jehova ba ka zwelapili ku yemela Mubuso wa Mulimu. Ba ka zwelapili ku tiiswa ni ku silelezwa ka ku swalisana ni liputeho ze fitelela 94,600 mwa lifasi kaufela. (Isaya 26:20) Yeo ikaba nako ye nde hakalo ya ku lumbeka Jehova ka bundume! Kaniti, ku pila mwa tibelelo ya ku lwaniswa ki Gogo ha ku ba kutisezi mwamulaho ka sabo. Kono ku ba susumeza ku ekeza ka mo ba konela kaufela  kwa sitabelo sa bona sa milumbeko.—Samu 146:2.

¹⁸ Moya o munde w’o u boniswa hande ki mikulwani ba bañata mwa lifasi kaufela ba ba keni mwa bukombwa bwa ka nako kaufela. Trakiti ya Ba Banca—Bupilo bwa Mina Mu Ka Bu Sebelisa Kwañi?, ne i zwisizwe kwa mikopano ya sikiliti ya 2002, mi i koñomeka bunde bo butuna bwa ku keta bupilo bo bu cwalo. Bakreste ba bahulu ni banana ba itebuha likupuliso ze cwalo za ka nako ye swanela.—Samu 119:14, 24, 99, 119, 129, 146.

19, 20. (a) Ki kabakalañi Bakreste ha ba si na libaka la ku saba kamba ku mbemuka? (b) Taba ye tatama ya tuto i ka ezañi?

¹⁹ Ku si na taba ni ze ezahala mwa lifasi, Bakreste ha ba tokwi ku saba kamba ku mbemuka. Ba ziba kuli Mubuso wa Jehova u tuha u felisa mifilifili mwa mifuta ya yona kaufela ku ya ku ile. Hape ba omba-ombiwa ki ku ziba kuli ka zuho, ba bañata ba ba bulailwe ka mifilifili ba ka kutisezwa kwa bupilo. Zuho i ka fa ba bañwi kolo ya ku ituta lwa pili ka za Jehova, kono hape i ka konisa ba bañwi ku zwelapili ku mu sebeleza.—Likezo 24:15.

²⁰ Ka ku ba Bakreste ba niti, lu itebuha butokwa bwa ku zwelapili mwa buikambuso bwa Sikreste mi lu bata ku tundamena ku eza cwalo. Lu bata ku kumalela sepo ye nde ya ku kona ku ‘yema ni ku bona puluso ya Jehova.’ Taba ye tatama i ka tiisa tumelo ya luna ka ku lu bonisa lika ze sweli ku ezahala cwale ze zamaya li fa kutwisiso ya talelezo ya bupolofita bwa Bibele.

[Litaluso za kwatasi]

Kana Mwa Kona ku Talusa?

• Ki kabakalañi ba bañata kacenu ha ba si na sepo?

• Ki kabakalañi Lipaki za Jehova ha ba na ni sepo ka za kwapili?

• Jehova s’a ezizeñi ka za musimululi wa mifilifili?

• Ki kabakalañi ha lu si na libaka la ku saba twaniso ya Gogo?

[Lipuzo za Tuto]

[Siswaniso se si fa likepe 13]

Jesu n’a tomile mutala o swanela wa buikambuso bwa Sikreste

[Siswaniso se si fa likepe 16]

Mikulwani ba bañata-ñata ba ba li Lipaki ba keni mwa bukombwa bwa ka nako kaufela

[Manzwi a bañi ba siswaniso fa likepe 12]

UN PHOTO 186226/M. Grafman