Kana Ki Mukwa Fela Kamba Ki Kweta?

KWA likoleji ze ñwi za kwa Poland, baituti ka sizo ba kubukanyanga mali a ku lekela baluti ba bona limpo, ka mulelo wa kuli ba fiwe linepo ze nde mwa litatubo za bona. Kona libaka Mukreste wa mwanana ya bizwa Katarzyna ha n’a fumani butata. N’a ipuzize kuli: “Ni zwise mali kamba ni si ke na zwisa?” Balikani ba hae ne ba nahana cwana: “Ki sizo sa luna. Ha u na ku latehelwa ki se siñwi, kono kiñi ha u kakanya?”

Katarzyna u bulela kuli: “Ni na ni ku itumelela kuli mwa silimo sa ka sa pili kwa koleji, ne ni abani mwa ku zwisa mali. N’e li hasamulaho fo ni to lemuhela kuli ka ku eza cwalo ne ni lifile kweta, ili mukwa o i nyaza Bibele.” N’a hupuzi mañolo a bonisa kuli Jehova u nyaza hahulu ku leka kweta. (Deuteronoma 10:17; 16:19; 2 Makolonika 19:7) Katarzyna u li: “Na utwisisa mo ku inezi bunolo ku komiwa ki balikani. Ne ni nahanisisize taba yeo mi ku zwa f’o na li ku ba ni eze cwalo hape.” Mwahal’a lilimo ze talu ze felile, ku si na taba kuli bana ba sikolo ne ba mu sheununa, n’a konile ku taluseza ba bañwi kuli kabakala litumelo za hae ze tomile fa Bibele, h’a abanangi mwa ku kubukanya mali ao a twi ki mpo.

Ba bañwi ne ba tamelelize Katarzyna kuli ki muitati ni kuli ha isi ba bañwi pilu. U bulela kuli: “Ku sa na ni be ni sa utwani ni bona hande. Niteñi ba bañata ba kuteka mubonelo wa ka, mi seo sa ni tabisa.” Katarzyna n’a fitile fa ku zibahala sina yo muñwi wa Lipaki za Jehova, ya latelela likuka za Bibele mwa bupilo bwa hae.