Ku Tusa Ba Puo Ye Ipitezi mwa Korea

SIKWATA se si wabezwi kono ili se si kuzize ne si putehani fa mukopano wa sikiliti wa Lipaki za Jehova ka 1997. W’o ne li ona mukopano wa pili o cwalo mwa Korea ku ezezwa bosusu ni ba ba sa utweli fakaufi. Palo hamoho ne li 1,174. Tukiso kaufela—hamoho ni lingambolo, lipuhisano, ni drama—ne i ezizwe mwa puo ya bosusu ya Sikorea ni ku buhiswa fa libuhelo le ne li bonahala mwa Ndu ya Mukopano kaufel’a yona. W’o ne li ona mupuzo wa ku ikataza lilimo-limo ko ne ba ikatalize baitateli ba bañata.

Muta o muñwi kwapili, ili mwa paradaisi fa lifasi, ‘lizebe za bosusu li ka tibuluha.’ (Isaya 35:5) Batu kaufela ba ba bata ku t’o pila mwa Paradaisi, ba ba kopanyeleza ni bosusu, ba lukela pili ku kena mwa paradaisi ya kwa moya, ili muinelo wa nala wa kwa moya wa batu ba Mulimu ba ba tabile. Ba lukela ku ineela ni ku kolobezwa ka ku ba Lipaki za Jehova, inze ba lutwa ki yena.—Mika 4:1-4.

Ku Kala ka ku Njanga-Njanga

Nihaike ne ku likilwe hanyinyani ku kutaza bosusu mwa ma-1960, ne li mwa ma-1970 f’o ba sikai ku bona ne ba kalile ku yanga kwa mikopano ya Lipaki za Jehova mwa Seoul, ona muleneñi wa Korea. Muzwale wa Mukreste ya n’a kona ku ñola ka bubebe n’a ñolanga fa litapa lisupo ze tuna za lingambolo, hamoho ni mañolo a Bibele a n’a itusisizwe.

Ka 1971, mwa tolopo ya Taejon, Paki yo muñwi ya n’a na ni mwana wa susu a kala ku mu luta taba ya Mubuso hamoho ni balikani ba hae ba ba li bosusu. Kwa sikwata seo, se ku simuluhile batu ba sikai ba ba tukufalezwi bao cwale ba li bona misumo mwa simu ya ba puo ya bosusu.—Zakaria 4:10.

Banana Ba Ifana ka ku Itatela

Kuli bosusu ba be ni zibo ya ku ziba Jehova ni Jesu mi ni ku kena cwalo mwa nzila ye  isa kwa bupilo, ne ku ka tokwahala kuli baitateli ba bañwi ba ikataze hahulu. (Joani 17:3) Kabakaleo, ba sikai kwa Lipaki za Jehova ba itutile puo ya bosusu mi ba tohonolofalizwe hahulu.

Park In-sun wa lilimo ze 15, n’a lelile ku ituta puo ya bosusu. Kuli a eze cwalo, a y’o ituta musebezi kwa fakitori ko ne ku sebeza bosusu ba 20. A swalisana hahulu ni bona ka likweli ze 8 ilikuli a itute puo ni munahanelo wa bosusu. Silimo se ne si tatami, a ba paina wa kamita, ili sikombwa se si neela nako ye ñata kwa ku shaela za Mubuso, mi a luta sikwata sa bosusu be ne ba tabela ku ituta Bibele. Sikwata seo sa hula ka bubebe, mi hañihañi ba ba fitelela 35 ba putehana kwa mikopano ya la Sunda.—Samu 110:3.

Ku tuha f’o, mwa Seoul kwa lukiswa lwa pili mikopano ya Sikreste ya mwa puo ya bosusu fela. Muzwale Park In-sun a eza bupaina bo bu ipitezi mwahal’a sikwata seo se ne si ekezeha. F’o n’a se a ziba hande-nde puo ya bosusu. Likweli ze ñwi n’a zamaisa lituto za Bibele ze 28 ku bosusu. Ba bañata ku bona ba zwelapili ku fitela ba ba Lipaki za Jehova.

Kabakala buikatazotuna b’o bwa baitateli, puteho ya pili ya puo ya bosusu mwa Seoul ya tomwa ka October ya 1976; puteho yeo ne i na ni bahasanyi ba 40 ni mapaina ba kamita ba babeli. Moya w’o n’o yambukezi kwa litolopo ze ñwi za Korea. Bosusu ba bañata ne ba lila taba ye nde meto telee mi ne ba libelela ku potelwa.

Ku Sebeleza Mwahal’a Bosusu

Mwendi ne mu ka tabela ku ziba mo ne ba fumanezwi bosusu. Ba bañata ku bona ne ba fumanwi ka lindambo. Hape, bañi ba lintolo za laisi mwa lilalanda ne ba atumezwi, mi ba ba tambeka mabizo ni likeyala za bosusu. Liofisi za muuso ze ñwi ni zona ne li tusize mwa ku fa litaba zeo. Ku feza likalulo za simu mo ne ku pila bosusu ne ku petile hahulu ze tuna kuli mane hasamulaho kwa tomwa liputeho z’e ne za puo ya bosusu. Mikulwani ba bañata ba Sikreste ne ba susuelizwe ku ituta puo ya bosusu.

Ofisi ya mutai ya Lipaki za Jehova ne i lumile mapaina ba ba ipitezi be ne ba itutile puo ya bosusu ku y’o swalisana ni liputeho zeo. Cwanoñu fa, ba ba kwazize Sikolo sa Tuto ya Bukombwa ba lumezwi kwa liputeho zeo mi ba li tiisize kwa moya.

Ku na ni matata a tokwa ku tuliwa. Ku sebeleza mwa simu yeo ku tokwa kuli mutu a itiise luli ku utwisisa mikwa ya bosusu. Bona ha ba pati ze ba nahana kamba ku sitela mufaho kwa ku eza lika. Seo fokuñwi si komokisanga batu mi si kona ku tahisa ku shelana. Hape, Lipaki ha ba luta bosusu Bibele, ku tokwahala kuli ba ba tuse ku ziba hande puo ya bona ni kuli ba ba susueze ku yandulula tukiso ya bona ya ku bala ni ku ituta.

Mwa misebezi ya bona ya kamita, bosusu ba banga ni mapacaca e ba sa zibi ba bañwi. Ku ambola mwa liofisi za muuso ni kwa lipatela, hamoho ni ku za mileko, hañata ku ba katazanga hahulu. Bakeñisa kuli Lipaki ba mwa liputeho ze li bukaufi ba ba tusize ka lilato, bosusu mwa puteho ya Sikreste ba  ikutwa kuli luli ba mwahal’a mizwale.—Joani 13:34, 35.

Ku Kutaza ka ku Tandalelwa Kwa Beya Miselo

Mwa Pusan, yona tolopo ye tuna ya fa likamba ya kwa mboela wa Korea, Paki a katana batu ba babeli ba ba li bosusu, be ne ba ñozi fa kapampili kuli: “Lwa lata Paradaisi. Lu bata ku ziba mañolo a bulela ka za bupilo bo bu sa feli.” Muzwale a ñola keyala ya bona mi a lukisa ku y’o ba potela. Ha y’o pota, a fumana mwa muzuzu ku fufuzi bosusu be ne ba libelela ku utwa taba ya Mubuso. Kezahalo yeo ya mu susumeza ku kala ku ituta puo ya bosusu. Hañihañi puteho ya puo ya bosusu ya tomwa mwa Pusan.

Muzwale wa mwa puteho yeo n’a lemuhile bosusu ba babeli be ne ba ambola ka puo ya bona mi a ba atumela. H’a zibile kuli kihona ha ne ba sa z’o zwa kwa mukopano wa bulapeli, a ba mema kuli ba tahe kwa Ndu ya Mubuso ka 2 kiloko musihali ona zazi leo. Ba taha, mi tuto ya Bibele ya kalisa. Hasamulahonyana, sibeli sa bona ba ya kwa mukopano wa sikiliti hamoho ni balikani ba bona ba 20 ba ba li bosusu. Kwa sikwata seo, ba sikai se ba neezi bupilo bwa bona ku Jehova. Ba babeli se li maeluda ba mwa puteho mi a li muñwi ki mutang’a bukombwa mwa liputeho za puo ya bosusu.

 Tundamo Ya Fuyolwa

Bakeñisa kuli bosusu ba bañwi ba pila kwahule ni liputeho za puo ya bosusu, hañata ku tokwahalanga buikatazo ni tundamo ye tuna ku ba fepa kwa moya ka Bibele nako kaufela. Ka mutala, munna yo muñwi wa lilimo ze 31 n’a ipyanga ka bundui kwa sooli cwana. N’a utwile ka za taba ya Bibele ku munyan’a hae, ya n’a ambolisani ni Lipaki za Jehova. Kuli a kolwise tala ya hae ya kwa moya, ndui wa susu y’o a falula likilomita ze 16 ka mukolo ku ya kwa tolopo ya Tongyoung City, kwa likamba la kwa mboela ya Korea. Mulelo ne li kuli a y’o bonana ni paina ya ipitezi wa mwa puteho ya puo ya bosusu mwa tolopo ya Masan City. La Mubulo ni la Mubulo, paina ya ipitezi y’o n’a tamanga lieto la likilomita ze 65 ku y’o luta fela ndui wa susu y’o Bibele.

Kuli a be kwa mukopano wa la Sunda mwa Masan City, muituti wa Bibele y’o wa susu n’a na ni ku falula likilomita ze 16 ka mukolo mi kihona a kwela mbasi ka likilomita ze 65. Tundamo ya hae ne i tusize. Mwa likweli li sikai fela, a swala hande puo ya bosusu, a ituta litaku ze ñata za Sikorea, mi sihulu, a ituta nzila i nosi ya ku ba ni silikani ni Jehova. Ka ku lemuha butokwa bwa mikopano ni ku kutazanga, a tutela kwa silalanda ko ne ku fumaneha puteho ya puo ya bosusu. Kana ne ku li bunolo? Batili. N’a na ni ku itombola musebezi wa hae wa bundui o n’o mu ocolisa mali a kuma fa makwacha a eza 19 milioni ka kweli, kono tundamo ya hae ne i fuyozwi. Ha s’a hulile mwa niti, a kolobezwa mi cwale s’a sebeleza Jehova ka tabo hamoho ni lubasi lwa hae.

Ku Tolokela Bosusu

Taba ye nde ya Mubuso hañata i shaelwanga ka mulomo. Nihakulicwalo, mwa ku fitisa taba ya Linzwi la Mulimu ka ku nepahala hahulu, ku tokwahala kuli lituto za Bibele li bulukiwe ka nzila ye ñwi. Kacwalo, mwa linako za baapositola, libuka ni mañolo ne li ñolwa ki banna-bahulu ba ba yeziseli. (Likezo 15:22-31; Maefese 3:4; Makolose 1:2; 4:16) Mazazi a, sifako sa lico za kwa moya si filwe ka libuka ni lihatiso ze ñwi za Sikreste. Zeo li tolokilwe mwa lipuo ze mianda-nda, ze kopanyeleza ni za bosusu ze fitana-fitana. Kuli i eze cwalo mwa puo ya Sikorea ya bosusu, ofisi ya mutai i na ni likolo la toloko ya puo ya bosusu. Likolo la mavidio li tahisa mavidio a lukiselizwe bosusu. Zeo li fepa kwa moya bosusu ba ba shaela taba ye nde ni ba ba tabela niti ba mwa liputeho kakai ni kakai mwa Korea.

Nihaike ba bañata se ba bile likwala za puo ya bosusu mi ba tusize mwa ku tahisa mavidio, hañata bana ba bosusu ki bona batoloki ba bande ka ku fitisisa. Ba itutile puo ya bosusu ku zwa kwa bwanana. Ba itusisanga lisupo ze nepahezi za ka mazoho mi hape ba koñomekanga taba ka pilu kaufela ka mazoho a bona ni ka sifateho, ili ku susumeza cwalo minahano ni lipilu.

Sina ha se ku bulezwi, cwale mwa Korea se ku ezwanga kamita mikopano ye mituna ni ye minyinyani ya mwa puo ya bosusu. Kuli seo si petahale, ku tokwahala buikatazo ni lisinyehelo. Kono baputehi ba itebuhanga tukiso yeo. Mikopano yeo ha i ungukanga, ba bañata ba siyalanga nakonyana, ili ku bata ku zwelapili mwa sango se sinde sa kwateñi ni ku lundulula lituto ze nde za kwa moya ze lutilwe. Kaniti, ku na ni mapacaca mwa ku tusa sikwata se si ipitezi seo, kono limbuyoti za kwa moya ze ku tisa ki ze tuna.

[Siswaniso se si fa likepe 10]

Mavidio a ezizwe mwa Korea, a’ lukiselizwe mwa puo ya bosusu: “Ki Sifi Seo Mulimu A Tokwa ku Luna?,” “Ku Itebuha Sanda sa Luna sa kwa Moya,” “Mitala Ye Li Litemuso mwa Miteñi Ye,” ni “Mu Kuteke Tamaiso ya Jehova”

[Maswaniso a fa likepe 10]

Ku kalela kwatasi ku ya kwa bulyo: Vidio ya mwa puo ya bosusu ya lukiswa kwa mutai wa Korea; ku lukisa lisupo za ka mazoho ze yemela manzwi a teokratiki; sikwata se si tolokela bosusu; ku kobeta ya eza lisupo za ka mazoho vidio ha i nze i pangiwa