Sikolo sa Giliadi Lilimo Ze 60 za Tuto ya Bulumiwa

“KABAKALA ku ituta Bibele kwa luna ka butungi, lwa sutelela hahulu ku Jehova ni ku ituta ze ñata ka za kopano ya hae. Seo ne si lu bakanyelize bupilo bwa ku sebeleza ku sili.” Ao ki manzwi a yo muñwi wa ba sitopa sa pili a ku talusa lituto za n’a tupwikezi teñi kwa Sikolo sa Giliadi sa Bibele sa Watchtower. Ku zwelela fo si kakulelwa, ili lilimo ze 60 kwamulaho, Sikolo sa Giliadi si zwezipili ku lumela balumiwa. La March 8, 2003, mukiti wa ku feza sikolo wa sitopa sa bu-114 n’o cilwe kwa Sibaka sa Tuto sa Watchtower kwa Patterson, mwa New York. Tukiso yeo, ye n’e bile ni lingambolo ni lipuhisano, ne i teelelizwe ka tokomelo ki be ne ba kubukani mwa muyaho ni be ne ba buhile fa TV. Palo ya bona hamoho ne li 6,404.

Theodore Jaracz, yo muñwi wa Sitopa Se Si Etelela, ne li yena muina-situlo. Manzwi a hae a kamuhelo n’a hohezi mamelelo kwa taba ya kuli baputehi ne li ba mwa linaha ze fitana-fitana; ku bona ne ku na ni bapoti be ne ba zwa kwa Asia, kwa Caribbean, kwa Central America ni South America, ni kwa Yurope. Ka ku kanatela fa 2 Timotea 4:5, Muzwale Jaracz a koñomeka musebezi o mutuna wa mulumiwa ya lutilwe kwa Giliadi—ona wa ku “[eza] musebezi wa mubuleli wa Evangeli.” Balumiwa ba paka niti ka ku luta batu Bibele.

Baituti Ba Fiwa Litaelo za ku Laeza

John Larson, yo muñwi wa Katengo ka Mutai wa mwa United States, n’a file ya pili kwa lingambolo ze kuswani ze tatamani. N’a bulezi fa taba ye tiisa tumelo ye li “Mulimu H’a Lu Yemela, Ki Mañi Ya Ka Lu Lwanisa?” (Maroma 8:31) Mubuleli a talusa mutomo wa mwa Bibele o fa baituti tumelo ye tezi ya kuli Jehova u na ni m’ata a ku ba tusa ku tula tibelo kaufela mwa misebezi ya bona. Ka Maroma 8:38, 39, Muzwale Larson a eleza baituti kuli: “Mu lilimale ni ku yeya m’ata ao Mulimu a sebelisa ku mina, mi mu hupule kuli ha ku na ni se sikana se si ka tuhelisa Jehova ku mi isa pilu ka butu.”

Mubuleli ya n’a tatami ne li Guy Pierce, yo muñwi wa Sitopa Se Si Etelela. N’a ketile taba ye li “Mu Buluke Meto a Mina Inz’a Tabile!” (Luka 10:23, NW) N’a talusize kuli tabo sakata i kopanyeleza ku ziba Jehova ni ku utwisisa mulelo wa hae wa kamita hamoho ni ku bona litalelezo za bupolofita bwa Bibele. Ko ba ya kaufela, baituti ba kona ku tundamena ku ba ni tabo sakata ka ku buluka meto a bona inz’a tabile. Muzwale Pierce n’a susuelize ba ba felize sikolo bao ku yeya ka butungi bunde bwa Jehova ni ku toma minahano ni lipilu za bona fa ku ezanga tato ya Hae. (Samu 77:12) Ka ku tundamena ku nga hande lika, ba ba felize sikolo bao ba kona ku tula butata kaufela bo bu kana bwa ba zuhela.

Ku tuha f’o sitopa sa fiwa manzwi a taezo a’ susueza ki baluti ba babeli be ne ba ba luta ka zazi. Lawrence Bowen mwa toho ya taba ya ngambolo ya hae, n’a buzize puzo ye li: “Kana Mwa Bata  Kanya?” Kanya kwa buñata bwa batu ki f’o bona ka sibili ba lumbaetwa, ku kutekwa, ni ku zwa mubano. Kono Asafi walisamu n’a til’o utwisisa kuli lukumbu lwa butokwa lwa silikani se si kutekeha ni Jehova ki yona kanya sakata. (Samu 73:24, 25) Baituti ba ba felize sikolo bao ne ba susuelizwe ku tundamena mwa silikani se situna ni Jehova ka ku zwelapili ku itutanga Bibele ka butungi. Mangeloi “a shukelwa ku . . . ukumela” litaba ze ama ku petahala kwa mulelo wa Jehova ka Kreste. (1 Pitrosi 1:12) A bata ku ituta ze ñata luli ka za Ndat’a ona ilikuli a bonahaze kanya ya hae. Kihona mubuleli a eleza baituti ku kanyisa Jehova mwa bulumiwa bwa bona ka ku tusa ba bañwi ku fumana lukumbu lwa butokwa hahulu l’o.

Muñoli wa sikolo, Wallace Liverance, n’a unguzi mukoloko wa pili wa lingambolo ka taba ye li “Mu Bulele Butali bwa Mulimu, bwa Likunutu.” (1 Makorinte 2:7) Ki bufi butali bwa Mulimu b’o bwa n’a bulezi muapositola Paulusi ha n’a nz’a peta za bulumiwa bwa hae? Ki nzila ye butali ili ye m’ata yeo ka yona Jehova a tahisa kozo ni buñwi mwa pupo kamukana. Butali b’o bu kanatela ku Jesu. Ku fita ku leka balutiwa, Paulusi n’a tusize batu ku ziba m’o Mulimu a ka feliseza ze tisizwe ki sibi sa Adama. (Maefese 3:8, 9) Mubuleli n’a susuelize  bateelezi kuli: “Sebelezo ye ipitezi ye mu filwe mu itusise yona sina Paulusi, ya n’a ngile bulumiwa bwa hae sina kolo ya ku tusa batu ku utwisisa m’o Jehova a ka petela mulelo wa hae.”

Ku tuha f’o, Mark Noumair, muluti yo muñwi fa Giliadi, a okamela puhisano ye mafulofulo ni baituti ba sikai ba mwa sitopa. Taba ye li “Ku Ituta Linzwi la Mulimu ku Zwala Likombwa Ze Tukufalezwi” ne i koñomekile manzwi a Paulusi a’ kwa Maroma 10:10. Sitopa ne si kandekile ze bonwi ze ñata za mwa sebelezo ya mwa simu ze ne ba fitile ku zona ha ne ba sa kena sikolo seo. Ze ne ba petile mwa simu ne li bonisize kuli ha lu ituta ni ku yeya Linzwi la Mulimu, lika ze nde ka za Jehova Mulimu ni Mubuso wa hae li ka tala mwa lipilu za luna mi lu ka li shaela. Mwa likweli ze ketalizoho ze ne ba inzi mwa Sibaka sa Tuto sa Watchtower, baituti ne ba kalisize lituto za Bibele za fa mandu ze fitelela 30 ku be ne ba tabela niti mwa likalulo za simu ze sebelizwe hañata za liputeho ze li bukaufi.

Ba Ba Yeziseli Ba Bulela

Ha ne ba kena sikolo, baituti ne ba ikozi sango ni lilama za lubasi lwa fa Betele ya mwa United States. Lilama za fa mutai bo Robert Ciranko ni Robert P. Johnson ne ba ezize lipuhisano ni basepahali ba sikai ba ba sebelelize Jehova nako ye telele, ku kopanyeleza ni baokameli ba maeto bao cwale ba fiwa lituto ze ipitezi kwa Sibaka sa Tuto sa Watchtower. Bote be ne ba buhisanwi ni bona ba kile ba kena sikolo sa Giliadi ni ku ba balumiwa. Baituti ni mabasi a bona ni balikani ne ba tiile lipilu ku utwa likelezo ze butali kwa banna ba ba yeziseli bao ili ba ba tiile kwa moya.

Ze ñwi za likelezo za bona ki ze: “Mu tukufalelwe hahulu mwa bukombwa ni mwa puteho.” “Mu si ikungi hahulu. Mu ise hahulu pilu kwa mulelo o mu ketezwi balumiwa, mi ko mu y’o sebeleza i be hae ya mina.” Ze ñwi ze tusa ze n’e bulezwi ne li bonisize m’o lituto za kwa Giliadi li shemunena sikombwa ku eza misebezi ye minde, ku si na taba ni kw’a filwe ku y’o sebeleza. Ze ñwi za zona ki ze: “Ne lu itutile ku swalisana ni ku sebeza hamoho.” “Sikolo ne si lu tusize ku amuhela lizo ze nca.” “Ne lu lutilwe ku itusisa Mañolo ka muitusisezo o munca.”

John E. Barr, ya s’a bile yo muñwi wa Sitopa Se Si Etelela ka nako ye telele, n’a file ngambolo ye tuna ya tukiso. Taba ya hae ye tomile fa Bibele n’e ize “Libubo la Bona Li Ile mwa Lifasi Kaufela.” (Maroma 10:18) N’a buzize puzo ye li, Kana batu ba Mulimu ba petile mungendenge w’o kacenu? Kaniti luli! Kale-kale k’o, ka 1881, babali ba magazini ya Tora ya ku Libelela ne ba buzizwe kuli: “Kana mwa kutaza?” Mubuleli h’a felize a hupuza bateelezi ka za pizo ye zwile mubano ya kwa mukopano wa mwa 1922 kwa Cedar Point, kwa Ohio, mwa U.S.A., ye n’e ize: “Mu Zibahaze Mulena ni Mubuso wa Hae!” Nako ha ne inze i ya, tukufalelo ya batanga ba Mulimu ba ba sepahala ya ba nyanyeza ku shaela litaba ze nde za Mubuso kwa macaba kaufela. Ka lihatiso ni ka ku shaelwa, lipulelo za taba ye nde li iz’o wela ni kwa mafelelezo a lifasi ko ba fumaneha batu—mi zeo kaufela li tahiselize Jehova likute ni tumbo. Ka maungulo a susumeza, Muzwale Barr a susueza ba ba felize sikolo ku hupula limbuyoti za bona, a li: “Zazi ni zazi, ha mu lapela ku Jehova ko mu ya, mu itumele ku yena ku zwelela kwa pilu ya mina kwa kabelo ye mu na ni yona mwa talelezo ya manzwi a’ li, ‘Libubo la bona li ile mwa lifasi kaufela.’”

Hamulaho wa ngambolo yeo, litumeliso za balwa, mi muina-situlo a fa liñolo la sikolo ku mutu ni mutu ya felize. Mi, ka tabo kono hape ni ka bulutu bwa ku laeza sikolo se si latwa seo, muyemeli wa sitopa a bala liñolo la buitamo le li buniti le li ñolezwi Sitopa Se Si Etelela ni lubasi lwa Betele, ili ku zibahaza tundamo ya ba ba felize sikolo ya ku lumbeka Jehova “ku kala cwale, ni ku ya ku ile.”—Samu 115:18.

Lu lapela kuli ba ba felize sikolo bao ba twaele mahae a bona a manca ni ku tusa mwa zwelopili ya musebezi wa ku kutaza mwa lifasi kaufela, sina ba pili ku bona mo ba ezelize cwalo ka lilimo ze 60 ze felile.

[Mbokisi fa likepe 23]

LITABA KA ZA SITOPA

Palo ya linaha ko ba zwa baituti: 12

Palo ya linaha ko ba lumezwi: 16

Palo hamoho ya baituti: 48

Avareji ya lilimo za buhulu: 34.4

Avareji ya lilimo za ku ba mwa niti: 17.6

Avareji ya lilimo za ku ba mwa bukombwa bwa ka nako ye tezi: 13.5

[Siswaniso se si fa likepe 24]

Sitopa Sa bu-114 Se Si Feza Sikolo sa Giliadi sa Bibele sa Watchtower

Mwa mukoloko o kwatasi, milaini i baliwa ku zwa kwapili ku kuta kwamulaho, mi mabizo a kolohanyizwe ku zwa kwa nzohoto ku ya kwa bulyo mwa mulaini o muñwi ni o muñwi.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.