“I Ni File Ze Ne Lakaza Pilu ya Ka”

“N A ITUMELA ka pilu kaufela kwa mpo ye nde ya Mu Sutelele ku Jehova. I ni file ze ne lakaza pilu ya ka mi ze ne i lakaza ki ku ikutwa ku latiwa ni ku itebuhiwa ki Jehova, mi buka ye i ni file zona. Cwale se ni ikutwa ku sutelela hahulu ku Jehova ni ku Mwan’a hae ya lateha. Ni bata ku taluseza mañi ni mañi ka za buka ye ni ku fa balatiwa ba ka kaufela kopi ya yona.” Kona mwa n’a ikutwezi yo muñwi wa Lipaki za Jehova ka za buka ya makepe a 320 ye ne zwile fa Mikopano ya Sikiliti ya “Bashaeli ba Mubuso Ba Ba Na ni Tukufalelo “ ya mwa 2002 ni 2003. Ha lu tatubeñi likalulo ze ñwi za buka ye nca yeo ni libaka ha ne i hatisizwe.

Likalulo Ze Ñwi za Buka ye Nca

Mwa buka ye nca mo ku fumanehañi? Ku fumaneha kaufela ze bulezwi mwa lituto ze peli ze mwa magazini ye—ni ze ñwi ze ñata! Buka ye i na ni likauhanyo ze 31, mi ye ñwi ni ye ñwi i bata ku likana ni butelele bwa tuto ya Tora ya ku Libelela. Hamulaho wa manzwi a yona a pili ni likauhanyo ze talu za pili, buka ye i aluzwi mwa likalulo z’e ne, mi ye ñwi ni ye ñwi i bulela za kalemeno ka Jehova ka katuna. Kalulo ni kalulo i kala ka kusufazo ya kalemeno. Likauhanyo ze sikai ze tatama li bonisa m’o Jehova a boniseza kalemeno kao. Kalulo ni kalulo i na ni kauhanyo ye bulela za Jesu. Kabakalañi? Jesu n’a ize: “Ya ni boni, u boni Ndate.” (Joani 14:9) Jesu ka ku ba siswaniso luli sa Jehova, u lu fa mitala ye minde ya tulemeno ni likezo za Mulimu. Kalulo ni kalulo i fela ka kauhanyo ye lu luta mwa ku likanyiseza Jehova mwa ku bonisa kalemeno ka ka nyakisisizwe. Mwa ku nyakisisa tulemeno twa Jehova, buka ye nca ye i ama kwa buka ni buka ya mwa Bibele.

Buka ya Mu Sutelele ku Jehova hape i na ni likalulo ze ñwi ze ipitezi. Ku kala ka kauhanyo 2, kauhanyo ni kauhanyo i na ni kakwenda ka ka na ni toho ye li “Lipuzo za ku Nahanisisa.” Mañolo ni lipuzo ze mwa kakwenda kao ha li si ka lukiswa kuli li be lundululo ya kauhanyo. Kono li lukiselizwe ku mi tusa ku itusisa Bibele mwa ku nahanisisa ka butungi fa taba. Mu susuezwa kuli mu bale ka tokomelo liñolo ni liñolo le li bonisizwe. Ku zwa f’o mu nahanisise puzo, mi mu like ka t’ata ku sebelisa litaba zeo. Nahanisiso ye cwalo i kona ku nyangumuna pilu ya mina, ni ku mi tusa ku sutelela hahulu ku Jehova.—Samu 19:14.

Maswaniso a mwa buka ya Mu Sutelele ku Jehova a batisisizwe ka tokomelo ni ku lukiswa hande ilikuli a kone ku luta ni ku susueza. Likauhanyo ze 17 li na ni maswaniso a za mwa Bibele a mande ili a kwana likepe mutumbi.

I Hatiselizweñi?

Buka ya Mu Sutelele ku Jehova i hatiselizweñi? Mulelo o mutuna wa hatiso ye nca ye ki wa ku lu tusa ku ziba hande Jehova ilikuli lu kone hulisa silikani se si tiile ni Mulimu wa luna.

Kana ku na ni ye mu nahana ya kona ku tusiwa ki buka ye ya Mu Sutelele ku Jehova, mwendi cwalo muituti wa Bibele kamba mane muzwale kamba kaizeli ya fokozi kwa moya ? Mina bo—kana mu kalile ku bala buka ye nca ye? Haiba ha mu si ka kalisa, mu tome nako ya ku kalisa kapili-pili ha ku konahala. Mu be ni nako ya ku nahanisisa ze mu bala. Haike hatiso ye nca ye i mi tuse ku sutelela hahulu ku Jehova Mulimu, ilikuli mu kone ku shaela taba ya hae ye nde ya Mubuso ka tabo ni ka tukufalelo ye tuna!