Lilato Ki La Butokwa Hahulu

BATU kaufela ku si na taba ni fo ba kuma, sizo, puo, kamba mubala wa bona, ba tokwa ku latiwa. Ha ba sa latiwi, ba felelwa ki tabo. Caziba yo muñwi wa za milyani n’a ñozi kuli: “Ku latiwa ni silikani ku tahisa buiketo, tabo, ni ku fola; ku sa latiwa ni ku tokwa silikani ku tahisa makulanu, maswabi, ni manyando. Kambe ku na ni mulyani o munca o na ni m’ata cwalo, ibat’o ba mualafi kaufela mwa naha n’a ka u alafisanga. N’e ka ba ku fosa ha n’a si ke a itusisa ona.”

Kono mwa miteñi ye, bahasanyi ba makande ni batu ba ba kutekeha, sihulu ba babaza hahulu za ku fuma, za ku ba ni m’ata, za ku bubana, ni za tobali ku fita za ku utwana hande ni ba bañwi ze lu tokwa luna batu. Baluti ba bañata ba babaza hahulu za lituto ni misebezi ya lifasi, mi ba nga kuli ku onyoka ku itingile fela fa ku eza zeo. Ki niti kuli ku ituta ni ku hulisa buikoneli ki kwa butokwa, kono kana ku swanela ku ca nako ye lu lukela ku ba ni lubasi ni balikani? Muñoli wa kwaikale ya n’a itutile hahulu ili ya n’a talimisisize fa muinelo wa batu n’a swaniselize mutu ya ikonela kono ili ya si na lilato kwa “mulangu fela o lila, kamba ngongi ye mulumo o mutuna.” (1 Makorinte 13:1) Batu ba ba cwalo ba kona ku fuma, kamba mane ku tuma, kono ha ba na tabo sakata.

Jesu Kreste, ya n’a ziba hande ni ku lata hahulu batu, n’a koñomekile hahulu lilato la ku lata Mulimu ni batu ba bañwi mwa lituto za hae. N’a ize: “Lata Mulena Mulimu wa hao, ka pilu ya hao kaufela, ni ka moya wa hao kaufela, ni ka kutwisiso ya hao kaufela. . . . Lata wahenu mo u itatela.” (Mateu 22:37-39) Ki bao fela ba ba latelela manzwi ao be ne ba ka ba balutiwa luli ba Jesu. Kacwalo, n’a ize: “Se ba ka ziba batu kaufela kuli mu balutiwa ba ka ka sona, ki ha mu latana.”—Joani 13:35.

Kono mutu u kona ku ituta cwañi lilato mwa lifasi le? Mi bashemi ba kona ku luta cwañi lilato kwa bana ba bona? Taba ye tatama i ka alaba lipuzo zeo.

[Maswaniso a fa likepe 3]

Ku t’ata hahulu ku ituta lilato mwa lifasi le li etelelwa ki buitati