Lipuzo Ze Zwa kwa Babali

Kwa Maheberu 2:14 (NW), ki kabakalañi Satani h’a bizwa “ya na ni linzila za ku tahisa lifu”?

Ka bukuswani, Paulusi n’a talusa kuli Satani, yena ka sibili kamba ka ku itusisa ba bañwi, wa kona ku tahisa lifu tenyene la batu. Ka ku lumelelana ni seo, Jesu n’a bizize Satani kuli “ki mubulai isali kwa makalelo.”—Joani 8:44.

Ku sa utwisisa ku kana kwa zuha fa Maheberu 2:14 bakeñisa mo i tolokezwi mwa litoloko ze ñwi, ili ze bulela kuli Satani u na ni “m’ata a lifu” kamba “m’ata fahalimw’a lifu.” (King James Version; Revised Standard; New International Version; Jerusalem Bible) Mitolokelo ye cwalo i kona ku bonahalisa inge kuli Satani u na ni m’ata a’ si na mw’a felela a ku bulaya mutu kaufela y’a bata ku bulaya. Kono luli ha ku cwalo. Kambe ku cwalo, u zibe n’a ka be a yundisize balapeli ba Jehova kaufela fa lifasi kale-kale k’o.—Genese 3:15.

Pulelo ya Sigerike ye tolokilwe “m’ata fahalimw’a lifu” mwa litoloko ze ñwi ni “linzila za ku tahisa lifu” mwa New World Translation ki “kraʹtos tou tha·naʹtou.” Tou tha·naʹtou ki mufuta wa pulelo ye talusa “lifu.” Kraʹtos ze i talusa luli ki “m’ata, ku tiya, ku kona.” Ka ku ya ka Theological Dictionary of the New Testament, kraʹtos i talusa “ku ba teñi kwa m’ata ni z’a kona ku tisa; ha i talusi ku itusiswa kwa ona.” Kacwalo, kwa Maheberu 2:14, Paulusi h’a talusi kuli Satani u na ni m’ata ote fahalimw’a lifu. Kono u talusa kuli Satani w’a kona ku tahisa lifu.

Satani u itusisa cwañi “linzila za ku tahisa lifu”? Mwa buka ya Jobo, lu bala za kezahalo ye ñwi yeo mwendi ki ye ipitezinyana. Taba yeo i bonisa kuli Satani n’a itusisize liñungwa kwa ku tahisa lifu la bana ba Jobo. Kono mu lemuhe kuli, Satani n’a konile ku eza cwalo ka tumelezo ya n’a filwe ki Mulimu, kabakala taba ye tuna ye ne sweli ku zekiwa. (Jobo 1:12, 18, 19) Kaniti, Satani n’a sa koni ku bulaya Jobo ka sibili. N’a si ka lumelezwa ku eza cwalo. (Jobo 2:6) Seo si bonisa kuli, nihaike fokuñwi Satani s’a konile ku tahisa lifu kwa batu ba ba sepahala, ha lu tokwi ku saba kuli w’a kona ku lu bulaya ka mw’a latela.

Satani hape u tahisize lifu ka ku itusisa batu. Kacwalo, Bakreste ba bañata se ba shwezi tumelo ya bona. Ba bañwi ku bona ba bulailwe ki likwata za batu ba ba filikani kamba ku silahiwa ka taelo ya makwambuyu ba muuso ba ba na ni sobozi kamba baatuli ba ba si ka luka.—Sinulo 2:13.

Hape, Satani fokuñwi u tahisize lifu ka ku itusisa bufokoli bwa batu. Mwa miteñi ya Isilaele, mupolofita Balaami n’a laezi Mamoabi kuli ba pepeze Maisilaele “ku foseza [Muñ’a] Bupilo.” (Numere 31:16) Nto yeo ne i tasize lifu la Maisilaele ba ba fitelela 23,000. (Numere 25:9; 1 Makorinte 10:8) Ni kacenu ba bañwi ba swasiwanga ki “lunya” lwa Satani mi ba yaulukelanga mwa buhule kamba likezo ze ñwi ze sa tabisi Mulimu. (Maefese 6:11) Ki niti kuli ba ba cwalo ha ba shwangi ona f’o. Kono ba ka swana ba itima kolo ya bupilo bo bu sa feli, mi ka nzila yeo Satani u tahisa lifu la bona.

Nihaike lu lemuhile kuli Satani w’a kona ku tahisa butata, ha lu swaneli ku mu saba hahulu. Paulusi ha n’a bulezi kuli Satani u na ni linzila za ku tahisa lifu, n’a bulezi ni taba ya kuli Kreste n’a shwile kuli a “felise [Satani] . . . mi a liulule batu kamukana ba ba ne ba pila bupilo bwa bona kaufela mwa butanga bwa ku saba lifu.” (Maheberu 2:14, 15) Ee, Jesu n’a lifile tiululo mi kacwalo batu ba ba lumela n’a ba lukuluzi kwa butanga bwa sibi ni lifu.—2 Timotea 1:10.

Kaniti kwa bilaeza ku ziba kuli Satani u na ni linzila za ku tahisa lifu, kono lu na ni sepo kuli Jehova w’a kona ku lukisa butata bufi kamba bufi bo bu tahiswa ki Satani ni batu ba hae. Jehova u lu kolwisa kuli Jesu ya zuhile kwa bafu u ka “[felisa] misebezi ya Diabulosi.” (1 Joani 3:8) Ka m’ata a Jehova, Jesu u ka zusa bafu ni ku felisa cwalo lifu. (Joani 5:28, 29) Kwa mafelelezo, Jesu u ka bonisa fo ku sweu bunyinyani bwa m’ata a Satani ka ku mu beya mwa mukoti. Mi kwa mafelelezo Satani u ka bulaiwa ku ya ku ile.—Sinulo 20:1-10.