Litaba Ze Toba Pilu ku Ba Ba Ziyelehile
Litaba Ze Toba Pilu ku Ba Ba Ziyelehile
BIBELE haki buka ya litaelo za buikangulo bwa munahano. Nihakulicwalo, i fa litaba ze toba pilu mi i lu tusa ku itebuha bupilo ku si na taba ni maziyezi a luna. Mañolo a bulela taba ya niti ye li: “Mutu ya pepilwe ki musali, bupilo bwa hae ki bo bukuswani, mi bu tezi maziyezi.” (Jobo 14:1) Ze ñwi za litiko za luna li tisizwe ki ku sa petahala kwa luna. Kono ki mañi sihulu ya tahisize manyando a batu?
Bibele i zibahaza kuli kashandula y’o ki sibupiwa se si maswe sa moya se si bizwa Diabulosi ni Satani. U “pumanga lifasi kamukana” mi u labula buñata bwa maziyezi a ninguzi batu. Niteñi, Bibele hape i lu bulelela kuli nako ya hae i zamaya i fela. (Sinulo 12:9, 12) Cwale-cwale fa, maziyezi kaufela ao Satani a labulezi batu fa lifasi a ka feliswa ki Mulimu. Ka ku ya ka Bibele, lifasi le linca la ku luka l’a sepisize Mulimu li ka felisa ze zwafisa kaufela.—2 Pitrosi 3:13.
Kw’a omba-omba hakalo ku ziba kuli manyando a batu ki a nakonyana! Mwa puso ya Mubuso wa Mulimu o kwa lihalimu o mwa mazoho a Jesu Kreste, saluluti ni manyando li ka fela. Ka za Mulena ya ketilwe ki Mulimu, Mañolo a li: “U ka lamulela mubotana ya itilelela ku yena, ni yena mukunyandela ya si na ya mu tusa. Ya fokozi, ni ya shebile, u ka ba utwela butuku, a lamulele bupilo bwa ba ba nyandile; a ba liulule ku ba ba limba, ba ba ba nyandisa. Mali a mwa mibili ya bona a ka babaleha mwa meto a hae.”—Samu 72:12-14.
Bupolofita b’o bu fakaufi hahulu ni ku petahala. Lu ka kona ku pila ku ya ku ile mwa paradaisi fa lifasi mwa miinelo ye minde hahulu. (Luka 23:43, NW; Joani 17:3) Zibo ya ku ziba lisepiso za Mañolo zeo ze omba-omba i fa sepo ni ku tiisa pilu ku ba ba ziyelehile.
[Manzwi a bañi ba siswaniso fa likepe 32]
Musizana ya lembwalile: Photo ILO/J. Maillard