“Mu Sutelele ku Mulimu Mi U Ka Sutelela ku Mina”

Pili Ni Hamulaho N’a Fumani M’ata a ku Cinca

SANDRA, musali ya pila kwa Mexico, n’a italusize kuli n’a sa swaneli mwa lubasi lwa habo. Bakeñisa ku haniwa ni ku sa latiwa, lilimo za hae za ku nonoboka n’e li ze maswe. U bulela kuli: “Ne ni hulile ni maikuto a kutokwa tuso ni lipilaelo ze ñata ka za bupilo ni libaka le ne ni pilela.”

Ha n’a li kwa sikolo se si pahami, Sandra a kalisa ku nwanga kwa veine ya bondat’ahe kwa ndu. Ku kumbuluka a kalisa ku itekelanga mabotela a hae mi a ngongwelwa ki bucwala. U itumelela kuli: “Ne ni si na takazo ya ku pila.” Ka ku ziyeleha, Sandra a kalisa ku itusisa milyani ye kola. U bulela kuli: “Nto fela ye n’e ni tusa ku libala matata a ka n’e li lika ze ne ni lwalanga mwa sikwama sa ka: botela, mapilusi, kamba matokwani a likani.”

Sandra ha s’a felize ku ituta za bualafi, a tupwikela luli mwa bucakolwa bo bu feza. N’a likile ku ipulaya. Kono n’a punyuhile.

Sandra n’a ikatalize mbango ku ya kwa bulapeli bo buñata-ñata ku yo bata tuso ya kwa moya ni ya mwa maikuto. Ka ku felelwa ki sepo ni ku zwafa ko kutuna, n’a itilelelanga ku Mulimu, a li: “U kai? Kiñi ha u sa ni tusi?” Ka nako ya n’a totobezi hahulu ka ku ikutwa ku sa ba wa butokwa, yo muñwi wa Lipaki za Jehova a mu ambota. Ngambolo yeo ya tahisa kuli a kalise ku ituta Bibele. Sandra n’a susumelizwe hahulu ha n’a itutile kuli “[Muñ’a] Bupilo u fakaufi ni ba ba na ni pilu ye lobehile.”—Samu 34:18.

Muluti wa hae wa Bibele n’a tusize Sandra ku utwisisa kuli Jehova Mulimu wa ziba kuli lwa fokola kabakala sibi ni ku sa petahala ko lu hozize ku Adama. Sandra n’a lemuhile kuli Mulimu wa utwisisa kuli ha lu koni ku fita ka ku tala fa lipimo ze lukile. (Samu 51:5; Maroma 3:23; 5:12, 18) N’a tabile ku ituta kuli Jehova h’a landalali fa bufokoli bwa luna, mi h’a lu libeleli ku eza lika ze lu sa koni. Walisamu n’a buzize kuli: “[Muñ’a] Bupilo, ha u ka londoloza bumaswe, Mulena, ku ka pila mañi?”—Samu 130:3.

Niti ya butokwa ya Bibele ye ne tabisize Sandra n’e li ya za sitabelo sa tiululo sa Jesu Kreste. Kabakala sitabelo seo, Jehova ka sishemo u nga hande batu ba ba mu utwa ku si na taba ni mifokolo ya bona. (1 Joani 2:2; 4:9, 10) Ee, lwa kona ku ‘swalelwa lifoso’ za luna mi kacwalo lu tusiwa ku tula maikuto e lu na ni ona a kutokwa tuso.—Maefese 1:7.

Sandra n’a itutile lituto za butokwa kwa mutala wa muapositola Paulusi. Paulusi n’a itebuhile hahulu sishemo sa Mulimu sa ku mu swalela lifoso za hae za kwamulaho ni ku mu tusa mwa ndwa ya hae ya ku tula bufokoli bo bu kuta-kutela. (Maroma 7:15-25; 1 Makorinte 15:9, 10) Paulusi n’a cincize mupilelo wa hae, ‘ku eza mubili wa hae ka t’ata, ku itapiseza ona’ ilikuli a zwelepili mwa nzila ye tabelwa ki Mulimu. (1 Makorinte 9:27) N’a si  ka tuhelela litakazo za hae za ku eza sibi ku mu zamaisa.

Bufokoli bwa Sandra ne bu mu nyandisize, kono n’a zwezipili ku bu lwanisa. N’a lapezi ka t’ata ku Jehova kuli a mu tuse ku bu tula ni ku ikupela musa wa Hae. (Samu 55:22; Jakobo 4:8) Ka ku lemuha kuli Mulimu n’a mu tabela, Sandra n’a konile ku cinca bupilo bwa hae. U li: “Ni na ni tabo ye tiswa ki ku luta ba bañwi Bibele ka nako kaufela.” Sandra n’a bile ni tohonolo ya ku tusa muhulwan’a hae ni munyan’a hae ku fita fa ku ziba Jehova. Ha nz’a ‘eza ze nde,’ u itatelanga hape ku itusisa zibo ya hae ya za bualafi kwa mikopano ya likiliti ya Lipaki za Jehova.—Magalata 6:10.

Ku cwañi ka za mikwa ye ne ngongwezi Sandra? U bulela ka buikolwiso kuli: “Munahano wa ka u iketile. Ha ni sa nwa, ku zuba, kamba ku itusisa milyani. Ha ni li tokwi. Ni fumani ze ne ni bata.”

[Manzwi a fa likepe 9]

“Ni fumani ze ne ni bata”

[Mbokisi fa likepe 9]

Likuka za Bibele Z’e Beleka

Ze tatama, ki likuka ze ñwi za Mañolo ze se tusize ba bañata ku ikayutula kwa mikwa ye silafaza ye ngongwela:

“Lu ikenise kwa masila kaufela a nama ni a moya, lu nze lu peta ku ikenisa kwa luna ka ku saba Mulimu.” (2 Makorinte 7:1) Mulimu u fuyaula ba ba ikenisize kwa masila, ku ambuka likezo ze si ka kena.

“Ku saba [Muñ’a] Bupilo ki ku toya bumaswe.” (Liproverbia 8:13) Sabo ye likute ku Mulimu i tusa mutu ku ikayutula kwa mikwa ye maswe, hamoho ni ku itusisa maswe milyani. Kwand’a ku tabisa Jehova, mutu ya cincize u silelelizwe kwa matuku a sabisa.

‘Mu ipeye kwatas’a ba ba busa, ni kwatas’a malena.’ (Tite 3:1) Mwa libaka ze ñata, ku ba fela ni milyani ye miñwi kamba ku itusisa yona ki ku loba mulao. Bakreste ba niti ha ba bi ni milyani ye haniswa mi ha ba itusisi yona.