Piho ya Bashaeli ba Mubuso

Ze Nde Ze Zwa mwa ku Ba ni Pilutelele ni Tundamo

JESU KRESTE na sinuzi kuli mwa mazazi a maungulelo “lilato la ba bañata [ne] li ka fola.” Kabakaleo, mwa libaka ze ñata mwa lifasi kacenu, buñata bwa batu ha ba isi pilu kwa taba ye nde ya Mubuso. Ba bañwi mane ba nyefula bulapeli.—Mateu 24:12, 14.

Niteñi, ka ku ba ni tumelo ni pilutelele, bahasanyi ba Mubuso ba fumana ze nde mwa muinelo w’o, sina mo i boniseza piho ye latelela ye zwa kwa Czech Republic.

Lipaki ba babeli ne ba ambozi ni musali ya n’a i kwalezi mwa ndu. Ha se ku fitile nakonyana, sikwalo sa kwalulwa hanyinyani, mi lizoho la kwebula limagazini za Tora ya ku Libelela ni Awake! ze ne ba fa Lipaki. Kwa utwahala linzwi le li li “ni itumezi,” mi sikwalo sa kwalwa. Lipaki bao ba buzana ba li: “Kana lwa kona ku to pota hape?” Yo muñwi ku bona, ya li paina, kamba sikombwa wa ka nako kaufela, a itakaleza ku kuta hape, kono kwa ezahala nto ye swana, mi kwa zwelapili cwalo ku fitela silimo si kwana.

Ha sa singanyekile kuli u swanela ku cinca muatumelelo wa hae, paina y’o a kupa tuso ku Jehova ka tapelo. Nako ye ñwi ha n’a file musali y’o limagazini, a mu buza lipuzo ze silikani: “Mu cwañi? Kana mu ikozi ku bala limagazini?” Sapili, ne ku si na kalabo, kono ha s’a mu potezi mazazinyana, musali yo a kala ku bonisa silikani. Muta o muñwi a kwalula hahulu sikwalo, kono ngambolo ne i bile ya makutela-kaufi.

Kabakala ku bona kuli musali y’o n’a sa lati ku ambola, paina y’o a lela ku mu ñolela liñolo ili ku talusa za n’a mu potelanga mi ni ku mu mema ku ituta Bibele. Kwa mafelelezo, hamulaho wa ku ikataza ka pilutelele ka silimo ni licika, paina a kona ku kalisa tuto ya Bibele ni muñ’a ndu y’o. Na komokile kono hape ni ku susuezwa musali y’o ha n’a mu bulelezi kuli: “Ni lumezi ku Mulimu ku zwa fo ne mu kalezi ku ni tisezanga limagazini.”

Kaniti, pilutelele ni tundamo li kona ku tisa ze nde mwa musebezi wa ku kutaza za Mubuso ni ku tahisa balutiwa.—Mateu 28:19, 20.