Bulapeli bwa Niti Bu Swalisanisa Lubasi

MARIA n’a li wa lilimo ze 13 muta yena ni munyan’a hae wa musizana, Lucy, ne ba utwile ka za Jehova ku muhabo bona. Hape n’a ba taluselize ka za sepo ya Paradaisi fa lifasi. Ka ku nyangumunwa ki ze ne ba utwile, ba ya ni yena kwa Ndu ya Mubuso ya Lipaki za Jehova. Maria n’a tabisizwe hahulu ki litaelo ze utwahala hande ze n’e filwe teñi ko. Ne ku shutana hahulu ni kwa keleke, ko ne ba yo opelanga fela hahulu! Kapili-pili banana bao ba kalisa ku ituta Bibele ni yo muñwi wa Lipaki za Jehova.

Muhulwan’a bona ya bizwa Hugo, n’a tabela hahulu lituto za mihupulo ya batu ni za kuli pupo i’tezi fela ku si na mubupi. N’a ikunga kuli ki silatula Mulimu. Kono ha n’a ituta za busole, n’a balile buka ya Life—How Did It Get Here? By Evolution or by Creation?  * A fumana likalabo za lipuzo ze ba sa koni ku alaba ba likeleke ze ñwi kaufela. Ha s’a felize ku ituta za busole, a kalisa ku tiisa tumelo ye nca ya hae ku Mulimu ka ku ituta Bibele ni ka ku yanga kwa mikopano ni likaizeli za hae. Maria ni Lucy ne ba kolobelizwe mwa 1992, ili lilimo ze peli ku zwa fo ne ba utwezi niti lwa pili, mi kaizel’a bona n’a kolobelizwe mwa 1994.

Ka nako yeo, bashemi ba bona ka ku tiyela kwa lizo za Katolika, ne ba sa tabeli niti. Ne ba nga kuli Lipaki za Jehova b’a filikanya, nihaike kuli ne ba tabela mikwa ye minde ni mutinelo o munde wa Lipaki ba sikulwani be ne ba memiwanga kwa ndu ki bana ba bona. Hape, ha ku ciwa lico, banana ha ne ba ambolanga ka za ze ba itutile kwa mikopano, bashemi ba bona ne ba lakazanga hahulu kuli ba zibe za teñi.

Niteñi, sibeli sa bashemi bao ne ba tabela hahulu za mioya. Bondat’a bona n’e li macakolwa be ne ba natanga bom’a bona. Lubasi ne se lu shandauka. Bondat’a bona kiha se ba pika liviki ze peli mwa tolongo kabakala likezo za bona ha ba kozwi. Ha ne ba li mwa tolongo, ba kalisa ku bala Bibele. Ha ba nze ba balanga cwalo ba fita fo ku ñozwi manzwi a Jesu ha n’a bulela za lisupo za mazazi a mafelelezo. Ka ku bata ku utwa ze ñata, bondat’a bona ni bom’a bona ba ya kaufela kwa Ndu ya Mubuso mi ba lumela ku zamaisezwanga tuto ya Bibele ya fa ndu. Ha se ba itutile niti, ba sinya libuka za bona kaufela za mioya mi ba lukuluha kwa madimona ka ku bizanga fa libizo la Jehova. Ba kalisa ku eza licinceho ze tuna mwa bupilo bwa bona.

Mu nahane tabo ye ne ba bile ni yona bo Maria ni Lucy ha ne ba boni bashemi ba bona ha ba kolobezwa ki Hugo ku o muñwi wa mikopano ya sikiliti mwa Bolivia ka 1999? Ne se ku fitile lilimo ze 9 ku zwa f’o bo Maria ni Lucy ne ba utwezi za Jehova ni lisepiso za hae. Ka nako ye, bona hamoho ni Hugo, ba mwa bukombwa bwa ka nako kaufela. Ba tabile hakalo kuli bulapeli bwa niti bu tahisize swalisano mwa lubasi lwa bona!

[Litaluso za kwatasi]