Mubonelo wa Mulimu ku Ba Ba Shwile

LIFU la mulatiwa la tomohisa pilu luli. Lu ikutwanga ku sa ba ni mwangalwa, ku ba ni buluti, ni ku latehelwa. Ku shwelwa ku kona ku ezisa mutu ku ikutwa kutokwa tuso, kakuli ku si na taba ni sifumu, m’ata, kamba libubo z’a kana a ba ni zona mutu, ha ku na ni yo mukana fa lifasi ka nako ya cwale ya kona ku zusa mutu ya shwile.

Nihakulicwalo, Mubupi wa luna u bonela lika mu sili. Ka ku ba kuli n’a bupile batu ba pili fa liluli la lifasi, w’a kona hape ku bupa sinca mutu ya shwile. Ki kabakaleo, Mulimu ha kona ku bona ba ba shwile inge kuli b’a pila. Ka ku ama kwa batanga ba ba sepahala ba ikale ba ba shwile, Jesu n’a bulezi kuli: “Ku [Mulimu], batu kaufela ki ba ba pila.”—Luka 20:38.

Ha n’a li fa lifasi, Jesu n’a filwe m’ata a ku zusa ba ba shwile. (Joani 5:21) Kacwalo, ni yena u bona basepahali ba ba shwile sina mw’a ba bonela Ndat’ahe. Ka mutala, mulikan’a hae Lazaro ha n’a shwile, Jesu n’a bulelezi balutiwa ba hae kuli: “Kono ni sa y’o mu zusa.” (Joani 11:11) Ka mubonelo wa butu, Lazaro n’a shwile, kono ku Jehova ni Jesu, Lazaro n’a lobezi.

Mwa nako y’a ka busa Jesu, “ku zuha kwa bafu ku ka ba teñi, kwa ba ba lukile ni ba ba si ka luka.” (Likezo 24:15) Nako ha i nze i ya, ba ba ka zusiwa ba ka lutiwa za Mulimu ni ku ba ni tibelelo ya bupilo bo bu sa feli fa lifasi.—Joani 5:28, 29.

Ee, lifu la mulatiwa li kona ku tahisa masitapilu ni maswabi a matuna mwendi ka nako ye telele. Nihakulicwalo, ku bona ba ba shwile sina mw’a ba bonela Mulimu ku kona ku lu tiisa hahulu ni ku lu tahiseza sepo.—2 Makorinte 1:3, 4.