N’a Lata Sishemo

MILTON G. HENSCHEL, ya sebelize nako ye telele mwa Sitopa Se Si Etelela sa Lipaki za Jehova, u felize bupilo bwa hae bwa fa lifasi la Mukibelo, la March 22, 2003. N’a li wa lilimo ze 82.

Inz’a sa li mucaha, Milton Henschel a swalisana ni babeleki ba kwa sibaka se situna sa tamaiso sa Lipaki za Jehova mi a sebeza ka busepahali ka lilimo ze fitelela 60. Kapili-pili a zibahala ka katulo ya hae ye nde ni ku isa hahulu pilu kwa musebezi wa ku kutaza za Mubuso. Ka 1939 a ba muñoli wa N. H. Knorr, ya n’a li muokameli wa lihatisezo la Lipaki za Jehova kwa Brooklyn ka nako yeo. Ka 1942, Muzwale Knorr ha n’a kalile ku etelela musebezi mwahal’a Lipaki lifasi kaufela, a zwelapili ku sebeza ni Muzwale Henschel ka ku ba mutusi wa hae. Muzwale Henschel a nyala Lucille Bennett ka 1956, mi mwa bubeli bwa bona ne ba iponezi bunde ni matata a bupilo.

Muzwale Henschel n’a sebelize hahulu ni Muzwale Knorr ku fitela lifu la Muzwale Knorr ka 1977. Muzwale Knorr n’a zamaile hahulu ni Muzwale Henschel ku ya kwa linaha ze fitelela 150, ku yo pota ni ku yo susueza Lipaki za Jehova mwa lifasi kaufela, sihulu balumiwa ni ba ba sebeleza fa liofisi za mitai. Misipili yeo fokuñwi ne i li t’ata, mane fokuñwi ne i sabisa. Ka 1963, Muzwale Henschel ha n’a ile kwa mukopano mwa Liberia, n’a kopani ni nyandiso ye situhu bakeñisa ku hana ku abana mwa mukiti wa naha. * Ka kutokwa sabo, Muzwale Henschel n’a kutezi kwa Liberia hamulaho fela wa likweli li sikai ku yo bonana ni mueteleli wa naha yeo ni kuli a kupele Lipaki za Jehova ba mwa naha yeo tukuluho ye tuna ya ku lapela.

Mwa ku talima matata a matuna, Muzwale Henschel n’a zibahala ka ku ba ya tusa luli, ya bunolo, ni ya utwisisa. Ba n’a sebeza ni bona sihulu ne ba lata hahulu mulukisezo wa hae wa lika, buishuwo, ni likeya-keya la hae. Bakeñisa kuli n’a na ni mpo ye makaza ya ku sa libala ka bubebe, n’a tabisa balumiwa ba bañata mwa lifasi ka buikoneli bwa hae bwa ku punda mabizo a bona, ku bulela pulelo i liñwi kamba ze peli mwa puo ye bulelwa kwa sibaka seo, ni ku ambola za manzwi a mañwi—inz’a bonahala ku taba fa meto.

Mika 6:8 i lu hupulisa kuli Jehova Mulimu u bata kuli lu “late sishemo.” Milton Henschel u ka hupulwa ka mutala wa n’a bonisize wa sishemo. Niha n’a na ni buikalabelo bo butuna, n’a li ya atumeleha, ya musa, ni ya sishemo. N’a lata hahulu ku bulela kuli, “Ha u kakanya mwa ku ezeza nto ye ñwi, u hupule kuli nto ye sishemo ki yona nto ye nde ya ku eza.” Nihaike lu lila muzwale wa luna yo ya lateha, lwa taba kuli u itiisize ku isa kwa mafelelezo, ka buikolwiso bwa ku amuhela mupuzo wa hae, wa “kuwani ya bulena ya bupilo.”—Sinulo 2:10.

[Litaluso za kwatasi]

[Siswaniso se si fa likepe 31]

M. G. Henschel ni N. H. Knorr

[Siswaniso se si fa likepe 31]

Inz’a li ni musal’a hae, Lucille