Kana Ku Na ni I Liñwi Fela ‘Keleke Ya Niti’?

“SINA Kreste h’a li a li muñwi, ni mubili wa Kreste ki u li muñwi, ili Munyaliwa a li muñwi wa Kreste, yona ‘Keleke i liñwi ya Katolika ya siapositola.’”—Dominus Iesus.

Zeo ne li bulezwi ki kardinalu wa Katolika Joseph Ratzinger. N’a bulela tuto ya keleke ya hae ya kuli ku kona ku ba fela ni keleke i liñwi ya niti. N’a ize keleke yeo ki “Keleke i liñwi ya Kreste, yona Keleke ya Katolika.”

“Haki Likeleke Tota”

Nihaike Papa John Paul II n’a pihelezi kuli pampili ya Dominus Iesus ne i “sa shubuli kamba ku tompolola bulapeli bo buñwi,” pampili yeo ne i bilinganisize baeteleli ba likeleke za Protestanti. Ka mutala, kwa Mukopano o Mutuna wa Bulapeli bwa Presbyterian, o n’o ezelizwe mwa Belfast, kwa Northern Ireland, ili ka June ya 2001, sikombwa yo muñwi n’a ize pampili yeo ne i lukisizwe ki “sikwata se si m’ata sa Keleke ya Katolika . . . se ne si sabisizwe ki moya wa ku tuhelela litumelo za ba bañwi o n’o tisizwe ki mukopano wa Vatican II.”

Robin Eames, Bishopu wa Naha wa Keleke ya Church of Ireland, n’a ize n’a ka “swaba maswe-maswe” pampili yeo ha ne i ka “kutela kwa mihupulo ya kwamulaho wa mukopano wa Vatican II.” Ka ku bulela fa buipapato bwa ba Vatican bwa kuli likeleke ze hana lituto ze ñwi za Katolika “haki Likeleke tota,” Eames n’a ize: “Ku na, ao ki matapa.”

Kanti pampili ya Dominus Iesus ne i zwelezi fañi? Ku bonahala kuli ba Tamaiso ya Katolika ne ba filikanyizwe ki tuto ye twi za bulapeli li itingile ku mutu. Ka ku ya ka mutende wa The Irish Times, “simuluho ya tuto ya kuli bulapeli kaufela bwa swana . . . ne i sulukutisize Kardinalu Ratzinger.” Ku bonahala kuli mubonelo w’o ki ona o n’o shangumuzi kuli a bulele za kuli keleke ya niti ki i liñwi.

Kana Ha Ku Na Taba Kuli Mu ba Keleke Ifi?

Kaniti, ku ba bañwi, tuto ye twi “za bulapeli li itingile ku mutu” kamba ya kuli “bulapeli kaufela bwa swana” ya utwahala mi ki ye nde hahulu ku fita akalezo ifi kamba ifi ya kuli ku kona ku ba ni keleke i liñwi fela ya niti. Ku bao, mutu u swanela ku lukuluha ku iketela bulapeli. Ba li, ‘Sisupo fela kikuli, ha ku na taba luli kuli mutu ki wa keleke ifi.’

Mubonelo w’o u kana wa bonahala kuli wa utwahala—nihaike ze ñwi z’o labuzi ki ku aluhana kwa bulapeli ku eza kuli mane se ku na ni likeleke ze ñata-ñata ze sa lumelelani. Ba  bañata ba li, ‘Ku shutana-shutana k’o kwa bulapeli ki poniso fela ye nde ya tukuluho ya ka butu ya ku iketela.’ Kono ka ku ya ka muñoli Steve Bruce, “tukuluho ku za bulapeli” yeo ki “ku sa isa [fela] pilu ku za bulapeli.”—A House Divided: Protestantism, Schism, and Secularization.

Kona kuli mubonelo o lukile ki ufi? Kana ku na ni keleke i liñwi fela ya niti? Kana yeo ki Keleke ya Katolika? Kana likeleke ze ñwi ni zona z’a lumelelwa ki Mulimu? Bakeñisa kuli lipuzo zeo li ama silikani sa luna ni Mubupi wa luna, kaniti ku butokwa kuli lu zibe mw’a ngela taba yeo. Lu kona ku eza cwañi cwalo? Ka ku tatuba Bibele, lona Linzwi la Mulimu le li tahile ka moya. (Likezo 17:11; 2 Timotea 3:16, 17) Ha lu tatubisiseñi ze i bulela fa taba yeo ya haiba ku na ni keleke i liñwi ya niti.