Kana Mu Nga ka Butokwa Mizwale ba Luna Ba Basupali?

SICABA sa Isilaele wa kwaikale ha ne si li mwa bulikani ni Mulimu, ne si laezwi kuli: “U yeme, ha u li fapil’a wa toho ye ize pululu, u kuteke munnamuhulu, mi u sabe Mulimu wa hao.” (Livitike 19:32) Kacwalo, ku kuteka basupali ne li sebelezo ye kenile, ye ne zamaelela ni ku ipeya kwatas’a Mulimu. Nihaike kuli Bakreste kacenu ha ba yo mwatas’a Mulao wa Mushe, lu hupuliswa kuli Jehova u bona basupali ba ba mu sebeleza kuli ba na ni tuso mi ki ba butokwa. (Liproverbia 16:31; Maheberu 7:18) Kana basupali lu ba bona sina mwa ba bonela Jehova? Kana lu nga ka butokwa mizwale ni likaizeli ba luna ba basupali?

Elisha N’a Nga ka Butokwa Mulikan’a Hae wa Musupali

Taba ye ñwi ya mwa Bibele ye koñomeka za ku kuteka basupali i mwa liñolo la bubeli la Malena. I talusa za m’o mupolofita Elia n’a yolezwi ki Elisha mupolofita ya n’a li mwanana ku yena. Mu nahane ze ne ezahezi fa lizazi la mafelelezo la Elia la ku ba mupolofita mwa mubuso wa Isilaele wa masika a lishumi.

Ka lizazi leo, mupolofita wa musupali y’o n’a bulelezwi ki Jehova ku tama musipili wa ku zwa Giligali ku ya Betele, ku zwa Betele ku ya Jeriko, ni ku zwa Jeriko ku ya kwa Nuka ya Jordani. (2 Malena 2:1, 2, 4, 6) Mwa musipili wo o bat’o eza likilomita ze 50, Elia a hanisa Elisha halalu kuli a tuhele ku mu latelela. Nihakulicwalo, sina Ruti wa mwanana mwa lilimo za kwamulaho ha n’a hanile ka ku tiya ku kauhana ni Naomi, Elisha ni yena n’a hanile ku tuhela mupolofita wa musupali y’o. (Ruti 1:16, 17) Elisha n’a alabile halalu kuli: “Ka [Muñ’a] Bupilo Ya-Pila, ni ka moya wa hao o pila, a ni na ku ku tuhela.” (2 Malena 2:2, 4, 6) Ka nako yeo, Elisha na s’a tusize kale Elia ka lilimo ze bat’o ba ze silezi. Niteñi, n’a sa itakaleza ku sebeza ni Elia ka mo ne ku konahalela kaufela. Mane, Bibele i zwelapili ku bulela kuli: “Ha ba nze ba zamaya ba ambolisana . . . Elia a kambamela kwa lihalimu.” (Timana 11) Elia ni Elisha ne ba sweli ku ambolisana ku fitela luli mafelelezo a bukombwa bwa Elia mwa Isilaele. Ku bonahala kuli mupolofita wa mwanana y’o n’a nyolezwi hahulu ku utwisisa ka mo ne ku konahalela kaufela litaba ze ñata za taelo ni susuezo ya musupali, yena mupolofita ya na ni hahulu yeloseli. Luli, na nga mulikan’a hae wa musupali ku ba wa butokwa.

 ‘Inge Bondat’a Luna ni Bom’a Luna’

Ku bunolo ku utwisisa libaka Elisha ha n’a lata mupolofita wa musupali ku ba mulikani—mane sina ndat’ahe wa kwa moya. (2 Malena 2:12) Nakonyana pili musebezi wa Elia u si ka felelela kale, Elia a li ku Elisha: “Kupa se ni ka ku ezeza ni si ka zwiswa ku wena.” (Timana 9) Kacwalo ku yo fita kwa mafelelezo luli, Elia n’a iyakatilwe ka za buiketo bwa kwa moya bwa ya n’a ka mu yola ni ka za ku zwelapili kwa musebezi wa Mulimu.

Kacenu, kwa tabisa luli ku bona moya wa bushemi o swana mwahal’a mizwale ni likaizeli ba luna ba basupali ba Sikreste ha ba nze ba kandekela ba banca ka ku lukuluha za zibo ni butali bwa bona. Sina ka mutala, baitateli ba ka nako ye telele ba ba sebeleza fa liofisi za mitai ya Lipaki za Jehova ka ku itakaleza ba tusa ba bañwi ba ba sa zo taha mwa lubasi lwa Betele ku ipumanela kapili zibo ye tokwahala kuli ba pete sebelezo ya bona. Ka ku swana, baokameli ba maeto ni bafumahali ba bona be se ba sebelelize liputeho ka lilimo-limo ba talusanga ka tabo ze ba ipumani ku zona ku ba ba lutiwa musebezi wa maeto. Mi hape, mwa liputeho za Lipaki za Jehova lifasi kaufela, ku na ni mizwale ni likaizeli ba basupali ba ba sebelelize Jehova ka busepahali ka lilimo-limo mi ili ba ba talusezanga ka tabo ba ba sa zo kalisa ku kopana ka za butali bo bu tusa ni ze ba ipumani ku zona.—Liproverbia 2:7; Mafilipi 3:17; Tite 2:3-5.

Buiyakato bwa ka pilu kaufela bo bu boniswa ki basupali bao ba ba lateha ba Bakreste bu tahisa kuli lu tabele ku ba fa likute. Kacwalo, lu bata ku likanyisa mutala wa Elisha wa ku tabela hahulu mizwale ba basupali. Sina muapositola Paulusi ha lu hupulisa kuli, lu zwelepili ku eza ‘Ya hulile . . . nge bondat’a luna’ mi ‘basali ba ba hulile nge bom’a luna.’ (1 Timotea 5:1, 2) Ka ku eza cwalo, lu ka ekeza hahulu kwa ku sebeza hande ni ku zwelapili kwa kopano ya Sikreste ya mwa lifasi kaufela.

[Siswaniso se si fa likepe 30]

Elisha n’a itakaleza ku sebeza ni Elia ka mo ne ku konahalela kaufela

[Siswaniso se si fa likepe 31]

Ba banca ba fumana hahulu tuso kwa Bakreste ba basupali