Lipuzo Ze Zwa kwa Babali

Mwa linaha ze ñata mwa lifasi, ku na ni sizo sa ku fana limpo za sinawenga. Ki likuka mañi za mwa Mañolo ze lu swanela ku nyakisisa ha lu fana kamba ku fiwa limpo zeo?

Bibele ya lumeleza ku fana limpo haiba li fiwa ka mulelo o munde ili fa kezahalo ye swanela. Ka za taba ya ku fana, Bibele i susueza Bakreste ba niti ku likanyisa Jehova ya ba fanga ka buñata. (Jakobo 1:17) Muapositola Paulusi n’a susuelize Bakreste ka yena kuli: “Mu si ke mwa libala ku eza ba bañwi hande, ni ku fana; kakuli Mulimu u tabela matabelo a cwalo.” Kacwalo, Bakreste ba susuezwa ku ba ni bufani.—Maheberu 13:16; Luka 6:38.

Mwa linaha ze ñwi, mukwa o atile ki wa kuli batu ba ba bata ku eza sinawenga ba tatuba lika ze ba tokwa ni ku keta sintolo ko ba ñolelela cimo libyana ze ba tabela ku fiwa sina limpo fa sinawenga sa bona. Mi bahabo bona kamba balikani ba ka zibiswa sintolo seo kuli ba yo leka mwateñi mpo ya sibyana se si fumaneha fa mukoloko wo wa libyana ze ba bata. Tuso ya mukoloko wa libyana za mpo kikuli mufi h’a na ku sinya nako ya ku yo bata mpo. Ka nako ye swana ba ba fiwa ni bona ha ba na ku katazeha ku kutisa limpo ze ba sa lati kwa sintolo.

Batu ba ba nyalana ki bona ba ba ka ikatulela ka za haiba ba swanela ku lukisa mukoloko wa libyana za mpo. Kono Mukreste u ka bata ku bona teñi kuli wa ambuka likezo lifi kamba lifi ze kana za loba likuka za Bibele. Ka mutala, ku cwañi haiba batu ba ba beelezani ba lukisa mukoloko wa libyana ze tula hahulu? F’o, batu ba ba si na hande mali ba kana ba palelwa ku fa mpo, kamba ba kana ba ikutwa kuli ki hande ku hana ku ya kwa sinawenga ilikuli ba si ke ba yo ikutwisa maswabi a ku isa mpo ye cipile. Musali yo muñwi wa Sikreste n’a ñozi kuli: “Se ku li t’ata hahulu. Ni likile ku ba ni bufani, kono cwanoñu fa tabo ye ne ni fumananga mwa ku fana i felile.” Ki nto kwa ku swabisa kuli mukiti wa sinawenga u fetuhe kezahalo ye zwafisa!

Kaniti, ba ba fana limpo ha ba lukeli ku tahisezwa ku ikutwa kuli mpo ya bona kuli i amuhelwe, konji ha ne i ka lekwa mwa sintolo se si ketilwe kamba ha ne i ka lekwa ka teko ye bulezwi. Mane Jesu Kreste n’a bonisize kuli sa butokwa ku Mulimu ki pilu ya mufani, isi teko ya mpo. (Luka 21:1-4) Ka ku swana, muapositola Paulusi n’a ñozi ka za limpo za ku tusa ba ba tokwile, kuli: “Mutu ni mutu a zwise mw’a hupulezi mwa pilu ya hae, isi ka ku bilaela, kamba ka ku hapelezwa; kakuli Mulimu u lata ya fana a tabile.”—2 Makorinte 9:7.

Ka ku ya ka Bibele, ha ku na se si fosahalile ku mutu ku zibahala kuli ki yena mufani wa mpo, mwendi ka ku lukisa kapampili ka ka zamaelela ni mpo yeo. Kono mwa libaka ze ñwi, ku na ni sizo sa kuli ya fana mpo u na ni ku ipulela fapil’a batu kaufela ba ba li teñi. Sizo seo si kona ku tisa butata. Ba ba fana limpo ba kana ba bata kuli ba si ke ba zibahala ilikuli ba si ke ba iponahalisa. Ba ba cwalo ba latelela sikuka se si kwa Mateu 6:3, k’o Jesu n’a ize: “Kono wena ha u tusa ya shebile, lizoho la hao la nzohoto li si ke la ziba se si ezwa ki la bulyo.” Ba bañwi ba kana ba ikutwa kuli ku fana mpo ki taba ya ka butu ye lukelwa fela ku zibwa ki mufani ni ya fiwa. Hape ku ziba ba ba fanile limpo ku kona ku libisa kwa libapanyo za limpo, ili “ku ishemaeta.” (Magalata 5:26) Bakreste kaniti ba ka tabela ku sa utwisa yo muñwi bumaswe kamba maswabi ka ku zibahaza patalaza mabizo a ba ba fanile limpo.—1 Pitrosi 3:8.

Ee, ka ku latelela likuka ze mwa Linzwi la Mulimu, ku fana limpo ku ka zwelapili ku ba kezo ye tahisa tabo.—Likezo 20:35.