Mu Lumbe Jehova “Mwahal’a Mukopano”

TUKISO ya mikopano ya Sikreste i zwelela ku Jehova kuli batu ba hae ba be ba ba tiile kwa moya. Ka ku fumanehanga kamita kwa mikopano, lu bonisa buitebuho bwa luna kwa litukiso za Jehova. Hape, lu koniswa ku “[susumeza mizwale ba luna] mwa lilato ni mwa misebezi ye minde,” ili nzila ye nde ya ku bonisana ka yona lilato. (Maheberu 10:24; Joani 13:35) Kono lu kona ku susumeza cwañi mizwale ba luna kwa mikopano?

Mu Bulele fa Nyangela

Mulena Davida n’a ñozi ka za hae kuli: “Ni ka bulelela banabahesu Libizo la hao; ni ku lumbe mwahal’a Mukopano. U ka lumbwa ki na mwa Kopano ye tuna.” “Ni ka itumela ku Wena mwa Kopano ye tuna, ni ku lumbeke ni mwa undi-wa-nyangela.” “Ni talusize niti ya hao mwa Kopano ye tuna, bona, ha ni na ku muma mulomo wa ka.”—Samu 22:22, 25; 35:18; 40:9.

Mwa miteñi ya muapositola Paulusi, Bakreste ha ne ba kopana kwa milapelo, ni bona ne ba bulelanga tumelo ye ne ba na ni yona ku Jehova ni ka za kanya ya hae. Ka nzila yeo ne ba kutazana ni ku susumezana mwa lilato ni mwa misebezi ye minde. Mwa nako ya luna, ha se ku fitile mianda-nda ya lilimo ku zwa ku bo Davida ni Paulusi, kaniti lwa “bona kuli lizazi le lituna [la Jehova] li  sutelezi.” (Maheberu 10:24, 25) Muinelo wa Satani u tanga-tangela kwa sinyeho, mi matata a sweli ku ekezeha. Lu “swanezi ku tundamena” hahulu ni ku fita. (Maheberu 10:36) Ki bomañi ba ba ka lu susueza ku tundamena, kwand’a mizwale ba luna?

Kacenu, sina kwa makalelo, ku ezizwe litukiso za kuli balumeli kaufela ba bulele tumelo ya bona “mwahal’a Mukopano.” Kolo i liñwi ye li teñi ku bote ki ya ku alaba lipuzo ze buziwanga baputehi kwa mikopano ya puteho. Mu si keshebisi ze nde ze zwa mwa ku eza cwalo. Ka mutala, likalabo ze bonisa mwa ku tulela kamba ku pima matata li tiisa tundamo ya mizwale ba luna ya ku latelela likuka za Bibele. Likalabo ze talusa mañolo a mwa Bibele a’ bonisizwe fela kamba ze kopanyeleza litaba ze fumanwi mwa lipatisiso za ka butu li kana za susueza ba bañwi ku ba ni mikwa ye minde ya ku ituta.

Ku ziba kuli luna ni ba bañwi lu ka tuseha haiba lu alaba kwa mikopano ku swanela ku susueza Lipaki za Jehova kaufela ku sa ba ni sabo. Sihulu, ku butokwa hahulu kuli maeluda ni batanga ba bukombwa ba alabange kwa mikopano, kakuli ba libelelwa ku etelela mwa ku alaba ni ku fumaneha kwa mikopano. Kono mutu u kona ku eza cwañi zwelopili haiba a fumana kalulo yeo ya musebezi wa Sikreste ku ba ye t’ata?

Liakalezo ka za mwa ku Bolosolela

Mu zibe kuli Jehova w’a amiwa. Kaizeli yo muñwi wa Mukreste wa kwa Germany u talusa mw’a ngela likalabo z’a fanga. “Ku na, ha ni alaba, ki ku fa kalabo kwa makilikicani a Satani a ku bata ku tibela batu ba Mulimu kwa ku bulela za tumelo ya bona.” Muzwale ya sa z’o kolobezwa ya kopana mwa puteho ye swana, u li: “Ni lapelanga hahulu ka za ku fa likalabo.”

Mu itukiseze hande. Haiba mu sa itukisezi cimo, ku ka mi bela t’ata ku fa likalabo, mi likalabo za mina ha li na ku ba ze yahisa hande. Liakalezo ka za mwa ku alabela kwa mikopano ya puteho li filwe mwa hatiso ya Mu Fumane Tuso kwa Lituto za Sikolo sa Bukombwa sa Teokratiki, likepe 70. *

Mu lele ku fa niheba kalabo i liñwi kwa mukopano ni mukopano. Seo si talusa ku itukiseza likalabo ze ñatanyana, kakuli ha mu ka zwelapili ku yemisa lizoho, muzwale ya zamaisa u ka fita fa ku mi supa. Mane mu kana mwa tabela ku mu bulelela cimo puzo ye mu itukiselize ku alaba. Nto yeo i tusa hahulu haiba kihona mu sa zo kalisa ku alabanga. Bakeñisa kuli mu kana mwa zina-zina ku yemisa lizoho “mwahal’a Mukopano,” ku ziba kuli paragilafu yeo ki ya mina ni kuli ya zamaisa mukopano u ka libelela ku bona lizoho la mina ku ka mi susueza ku alaba.

 Mu alabe ka ku itahanela. Musebezi o t’ata ha u nolofalangi ha u beiwa kwatuko. Ku alaba isali kwa makalelo ku kona ku tusa. Mu ka komoka kuli ku ka ba bunolo hahulu ku alaba lwa bubeli kamba lwa bulalu ha se mu konile ku fa kalabo ya pili.

Mu kete sipula se si swanela. Ba bañwi ba fumananga bunolo ku alaba ha ba inela kwapili mwa Ndu ya Mubuso. Ha ku na ku siliwa hahulu, mi muzamaisi u ka kona ku bona lizoho la bona. Haiba mu lika ku eza cwalo, mu hupule ku bulela ka ku tumusa kuli bote ba utwe, sihulu haiba puteho ya mina ha i na lipangaliko za mulumo.

Mu teeleze ka tokomelo. Seo si ka mi tusa ku sa kutela z’a sa zo bulela yo muñwi. Hape, likalabo ze filwe ki ba bañwi li kona ku mi hupulisa liñolo kamba sisupo se si kona ku toma fa sisupo se si sa zo bulelwa. Fokuñwi, ze bonwi za ka bukuswani li kana za talusa sisupo se si buhisanwa. Likalabo ze cwalo li tusa hahulu.

Mu itute ku alaba mwa manzwi a mina. Ku bala kalabo mwa hatiso ye itutiwa ku kana kwa bonisa kuli mu fumani kalabo ye lukile, mi i kana ya ba nzila ye nde ya ku kalisa ka yona ku alaba. Kono ku eza zwelopili ya ku alaba mwa manzwi a mina ku bonisa kuli mw’a utwisisa sisupo. Ha lu lukeli ku bulela manzwi ka mw’a inezi luli mwa lihatiso za luna. Lipaki za Jehova ha ba kutelangi fela ku bulela manzwi ka mw’a ñolezwi mwa lihatiso za bona.

Mu alabe ka ku lumelelana ni tuto. Likalabo ze sa lumelelani ni ze itutiwa kamba ze yauluka kwa sisupo se situna se si nyakisiswa ha li swaneli. Seo si talusa kuli likalabo za mina li swanela ku ba ze lumelelana ni taba ye nyakisiswa. F’o li ka ekeza kwa makanatelo a taba ye buhisanwa ye yahisa kwa moya.

Mu lele ku susueza. Bakeñisa kuli libaka le lituna la ku alaba ki ku susueza ba bañwi, lu lukela ku lika ku tokolomoha ku bulela lika ze kona ku ba zwafisa. Hape, mu si felelezi ku bulela paragilafu kaufela kuli mane ba bañwi mu ba siyele ze nyinyani fela kamba ku ba tima za ku bulela. Likalabo ze telele kamba ze tatezani li hanelelanga ku pata sisupo. Likalabo ze kuswani za manzwi a sikai li kona ku ba ze nde hahulu, mi li ka susueza ba ba sa kalisa ku fa likalabo za bona ze kuswani.

Ze Ba Peta Ba Ba Zamaisa Mikopano

Ya zamaisa mukopano u na ni buikalabelo bo bu buima bwa ku fa susuezo. U bonisa ku tabela h’a buniti kalabo ni kalabo ye fiwa ka ku teeleza ka tokomelo ni ku talima ka ku isa mamelelo ya alaba ku fita ku ipatehisa ka li sili. Ne ku si ke kwa swanela haiba n’a si ka teeleza ka tokomelo mi, kacwalo, u kutela ze sa zo bulelwa kamba u buza puzo ye sa zo alabiwa!

Hape ne ku ka zwafisa haiba ya zamaisa a swalelela ku kutela mwa manzwi a’ shutana hanyinyani ni kalabo ye sa zo fiwa, inge kuli  kalabo ye filwe ha i si ka likana hande. Kono kwa susueza luli likalabo ha li ekeza kwa puhisano ya sisupo sa butokwa. Lipuzo ze susueza ku fa likalabo ze nde, ili za butokwa ki ze li, ‘Lu kona ku sebelisa cwañi seo mwa puteho ya luna?’ kamba ‘Ki liñolo lifi mwa paragilafu le li yemela ze bulezwi?’

Mane, sihulu ba banca kamba ba ba na ni maswabi ba swanela ku babazwa ha ba fa kalabo. Seo si konwa ku eziwa ha mu li ba babeli hamulaho wa tuto kuli ba si ke ba ikutwa maswabi ni kuli muzamaisi a be ni kolo ya ku fa liakalezo ze swanela.

Hañata, mutu ya bulela hahulu u zwafisanga ba bañwi ku bulela. Ba ba mu teeleza ha ba boni tuso ya kuli ba bulele maikuto a bona. Ba fita fa ku teeleza hanyinyani fela kamba mane ku sa teeleza. Nto ye swana ikana ya ezahala muzamaisi ha bulela hahulu. Kono muzamaisi wa mukopano fokuñwi a kana a hoha mamelelo ya baputehi ni ku ba susueza ku nahanisisa fa taba ka ku buza lipuzo ze ñwi. Lipuzo ze cwalo li swanela ku itusiswa ka siwela.

Muzamaisi haki kuli u ka supa fela mutu wa pili ku yemisa lizoho. Ku eza cwalo ku kona ku zwafisa ba ba tokwa nakonyana kuli ba kone ku lukisa mihupulo ya bona. Ka ku lilimana hanyinyani, u ka kona ku fa mutu ya si ka alaba nako ya ku eza cwalo. Hape u ka bonisa temuho ka ku sa supa banana banyinyani kuli ba alabe lipuzo ze ama litaba ze ba sa koni ku utwisisa hande.

Ku cwañi haiba kalabo ye filwe ha i si ka nepahala? Ya zamaisa a si ke a swabisa mutu ya file kalabo yeo. Likalabo, niha li si ka nepehala, hañata li kona ku ba ni buniti bo buñwi. Ka ku keta ka maseme ze lukile, ka ku buzeza mu sili puzo, kamba ka ku buza puzo ye ñwi, muzamaisi u kona ku otolola taba ku si na maswabisa.

Kuli a susueze batu ku alaba, muzamaisi wa mukopano u ka eza hande ku sa buza lipuzo ze si na mutomo, ze cwale ka, ‘Kana ku na ni yo muñwi ya na ni za ku bulela?’ Puzo ya kuli, ‘Ki mañi y’a si ka alaba kale? Ye ki yona nako ya mina ya mafelelezo!’ i kona ku ba ni mulelo o munde, kono ha i na ku susueza mutu ku bulela ka tukuluho. Mizwale ha ba swaneli ku utwiswa bufosi haiba ba sa alabi ka ku itahanela mwa tuto. Kono ba swanela ku susuezwa ku talusa ze ba ziba kakuli ku bulelela ba bañwi ze ba ziba ki poniso ya lilato. Hape, muzamaisi ha supa mutu kuli a alabe, neikaba hande ku sa bulela kuli, “Hamulaho wa bona, lu ka teeleza kwa kalabo ya Muzwale Ngete ni ya Kaizeli Ngete.” Ya zamaisa u swanela ku teeleza pili kwa kalabo mi kihona a ka bona haiba kw’a tokwahala kalabo ye ñwi.

Ku Alaba Ki Tohonolo

Ku fumaneha kwa mikopano ya Sikreste ki nto ye tokwahala kwa moya; ku fa likalabo kwa mikopano yeo ki tohonolo. Ka mo lu alabela mwa tukiso ye ipitezi yeo ya ku lumba Jehova “mwahal’a Mukopano,” lu latelela cwalo mutala wa Davida ni ku mamela kelezo ya Paulusi. Ku alaba kwa luna kwa mikopano ku bonisa kuli lwa lata mizwale ba luna ni kuli lu lilama za puteho ye tuna ya Jehova. Ki kai ko kuñwi ko ne mu ka tabela ku ba ha mu nze mu “bona kuli lizazi le lituna li sutelezi”?—Maheberu 10:25.

[Litaluso za kwatasi]

[Maswaniso a fa likepe 20]

Ku teeleza ni ku alaba ki kwa butokwa kwa mikopano ya Sikreste

[Siswaniso se si fa likepe 21]

Ya zamaisa u bonisa ku tabela h’a buniti kalabo ni kalabo ye fiwa