Tuso Ye Tuna kwa Babotana

JESU KRESTE, Mwan’a Mulimu, ha n’a li fa lifasi, n’a isize hahulu pilu kwa ku tusa babotana. Mutu yo muñwi ya n’a iponezi bukombwa bwa Jesu n’a bulezi kuli: “Libofu za bona; lianga za mautu za zamaya; ba mbingwa ba keniswa; ba ba tibani lizebe ba utwa; ba ba shwile ba zuha, mi babotana ba bulelelwa Evangeli.” (Mateu 11:5) Kono ku cwañi ka za babotana ba bañata-ñata kacenu? Kana ku na ni taba ye nde y’e ba ama? Ee, ku na ni taba ye fa sepo!

Nihaike kuli babotana hañata ha ba iswi pilu mi ba libalwanga, Linzwi la Mulimu, yona Bibele, i sepisa kuli: “Mubotana h’a na ku libalwa kamita, se ba isepisa ka sona banyandi, ha si na ku tokwahala ku ya ku ile.” (Samu 9:18) Manzwi a’ toba pilu ao a ka talelezwa muta Mubuso wa Mulimu, ona mulonga wa kwa lihalimu wa luli, u ka yola mibuso kaufela ya butu. (Daniele 2:44) Ka ku ba Mulena wa mulonga w’o wa kwa lihalimu, Jesu u ka ‘utwela butuku ya fokozi ni ya shebile, a lamulele bupilo bwa ba ba nyandile; a ba liulule ku ba ba limba, ba ba ba nyandisa. Mali a mwa mibili ya bona a ka babaleha mwa meto a hae.’—Samu 72:13, 14.

Bupilo bu ka ba cwañi Kreste h’a ka busa lifasi? Ba ba ka busiwa ki Kreste ba ka fumana tuso kwa misebezi ye ba ka eza. Kwa Mika 4:3, 4, Bibele i li: “Ba ka ina, mutu ni mutu mwa kota ya hae ya veine ni mwa kota ya hae ya feiga, ku si na ya ba sabisa; kakuli ki s’o bulezi mulomo wa [Muñ’a] Bupilo wa limpi.” Mubuso wa Mulimu u ka tatulula ni matata a makulanu ni a lifu. (Isaya 25:8) Lifasi leo li ka ba le li ipitezi luli! Lwa kona ku lumela lisepiso za mwa Bibele zeo kakuli li zwelela ku yena Mulimu ka sibili.

Kwand’a ku fa lushango lwa sepo, Bibele i lu tusa ku bona mwa ku tatululela matata a ka zazi a’ cwale ka mwa ku pimela ku ikutwa kuli ha lu na tuso, ili maikuto a kona ku tahiswa ki bubotana. Ka tuto ya hae ya Bibele, Mukreste ya mwa butokwi wa ziba kuli u butokwa ku Mulimu sina Mukreste ya fumile h’a li wa butokwa. Buka ya Jobo ya mwa Bibele i bulela kuli Mulimu ha si ka “keta ya fumile ku mubotana, kakuli kaufel’a bona ki musebezi wa mazoho a hae.” (Jobo 34:19) Mulimu u lata kaufel’a bona ka ku likanelela.—Likezo 10:34, 35.