Muta Lisepiso Li Ka Talelezwa

LITABA za kwaikale li tezi lisepiso ze si ka talelezwa. Macaba hañata a palezwi ku buluka tumelelano ye tamilwe ni ku sainiwa ka ku tiya ya ku konka ku sa ikenya mwa lindwa, mi kacwalo ba libisize batu ba bona mwa lindwa za meto-mafubelu. Napoleon ka nako ye ñwi n’a ize: “Milonga i taleleza fela lisepiso za yona ha i hapelezwa ku li taleleza, kamba haiba i fumana lituso mwateñi.”

Ku cwañi ka za ze ba sepisa batu-tu fela? Kw’a filikanya luli mutu ha sa ezi za sepisize! Sihulu ku filikanyanga hahulu haiba ya sepisize ki mutu ye mu ziba ni ku sepa. Kaniti, batu ba kona ku palelwa kamba ku sa lata fela ku taleleza lisepiso za bona.

Lisepiso za Mulimu ni za batu za shutana luli! Lisepiso za Mulimu za itingiwa mi ki za niti. Za sepisize kaufela Jehova Mulimu li ka talelezwa luli. Ku be cwañi kamba cwañi li ka talelezwa. Ka ku ama kwa Linzwi la Mulimu le li sa pali ku talelezwa, Isaya 55:11 i li: “Ki mo ku inezi ni kwa linzwi la ka, le li zwa mwa mulomo wa ka; ha li na ku kutela ku Na mukungulu, li si ka sebeza se si latwa ki Na, ni ku eza ze ni li lumezi.”

Kacwalo he, lu swanela ku nga cwañi lisepiso za Mulimu ze ñozwi mwa Bibele? Lwa kona ku li kolwa luli. Ka mutala, Muapositola Joani n’a ñozi kuli: “Mu bone Tabernakele ya Mulimu, i inzi ni batu; U ka yaha ni bona, ba be macaba a hae; mi Mulimu u ka u ka ba ni bona, Yena luli, ibe Mulimu wa bona; mi u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.” (Sinulo 21:3, 4) Mwa kona ku ikola limbuyoti ze cwalo haiba mu eza sa n’a bulezi Jesu kuli: “Bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.”—Joani 17:3.