Likande Le Li Tiiseza Bundume ni Tumelo—Lipaki za Jehova mwa Ukraine

SINA Bakreste ba kwa makalelo ha ne ba nyandisizwe, batu ba Mulimu kacenu ni bona se ba nyandisizwe. (Mateu 10:22; Joani 15:20) Ki mwa libaka ze nyinyani fela m’o nyandiso i bile teñi ka nako ye telele ku fita kwa Ukraine, k’o musebezi wa ku kutaza za Mubuso ne u kwalilwe ka lilimo ze 52.

Mwa 2002 Yearbook of Jehovah’s Witnesses, ne ku kandekilwe ka za batu ba Mulimu mwa naha yeo. Ki likande la tumelo, bundume, ni m’ata mwa manyando a matuna. Ki a manzwi a mañwi a buitebuho a n’a amuhezwi ki ofisi ya mutai wa Lipaki za Jehova wa kwa Ukraine:

“Ni felize ku bala 2002 Yearbook. Ne ni palezwi ku tibela miyoko ya ka ha ne ni bala ka za misebezi ya mina mwa Ukraine. Ni bata ku mi zibisa kuli mutala wa mina wa tukufalelo ni tumelo ye tiile u ni susuelize hahulu. Ni itebuha ku ba ni mina mwa lubasi lu li luñwi lwa kwa moya. Ni itebuha ka pilu kaufela!”—Andrée, France.

“Ha ku na manzwi a’ kona ku talusa hande buitebuho bwa ka, ku mina ni ku Jehova, kwa 2002 Yearbook. Ha ne ni nze ni bala ka za mizwale bao mwa lilimo za bona za bucaha ne ba li mwa litolongo ni mwa minganda ya tukufazo, miyoko ya ka ne i nze i suluha. Ni itebuha bundume bwa bona. Nihaike se ni bile mwa niti lilimo ze 27, ni sa kona ku ituta se siñwi kwa mizwale ni likaizeli bao. Ba tiisize tumelo ya ka ku Jehova, Ndat’a luna wa kwa lihalimu.”—Vera, wa mwa naha ye n’e bizwanga Yugoslavia.

“Ni ñola liñolo le ka tabo kabakala mutala wa mina o munde wa tundamo ni tumelo mwa lilimo kaufela za ku lwaniswa. Sepo ya mina ye tezi ku Jehova ni tundamo ya mina ya ku zwelapili ku sepahala i mi bisa ba ba kutekeha. Hape, buikokobezo bwa mina mwa litiko bu tiisa buikolwiso bwa ka bwa kuli Jehova h’a fulalelangi batu ba hae. Kabakala mutala wa mina o munde wa bundume, buitiiso, ni tundamo, lu kona ku talimana ni butata bwa luna bo bunyinyani ka bunolo.”—Tuteirihia, French Polynesia.

“Ha se ni balile Yearbook, ne ni na ni ku mi ñolela. Ne ni susuelizwe hahulu ki makande kaufela a ze ezahezi ze susueza. Ne ni ikutwile hande ku ba mwa kopano ye sepahala, ye swalisani, ye etelelwa ki Ndate ya lilato, ya na ni pabalelo, ya lu fanga m’ata ka nako ye swanela. Ne ni swabile hahulu kuli batanga ba bande ba bañata ba Jehova ne ba nyandile hahulu cwalo mi mane ni ku bulaiwa. Kono ne ni tabile kakuli kabakala bundume ni cisehelo ya bona, batu ba bañata ne ba itutile niti ni ku fita fa ku ziba Ndat’a luna ya lilato.”—Colette, Netherlands.

“Na ni musal’a ka ne lu na ni ku mi ñolela ili ku mi taluseza kuli ne lu susuelizwe hahulu ha ne lu balile ka za Ukraine mwa Yearbook. Mina mizwale ba ba sepahala  mu bile mutala o munde wa buitiiso mwa nyandiso ye tuna ka nako ye telele. Ka ku ya ka manzwi a’ kwa Liproverbia 27:11, Jehova u lukela ku ba ya tabile hahulu ku ziba kuli mizwale ba bañata ba ba sepahala ba kwa Ukraine ba zwezipili ku sepahala ku si na taba ni likezo ze maswe za Diabulosi.”—Alan, Australia.

“Ha ne ni balile ka za mizwale ba kwa Ukraine, ne ni lotisize miyoko. Ne ba tiyezi lika ze ñata, ili lilimo-limo mwa litolongo, ku tukufazwa, ku nyandiswa, ni ku kauhanywa ni mabasi a bona. Ni bata ku taluseza mizwale kaufela ba ba sa li teñi mwa liputeho za mina kuli na ba lata ni ku ba kuteka hahulu. Ni tabiswa hahulu ki bundume ni buitiiso bwa bona. Na ziba kuli moya wa Jehova ki ona o ba matafaza. Jehova u fakaufi ni luna, mi u bata ku lu tusa.”—Sergei, Russia.

“Ha ne ni balile 2002 Yearbook, ne ni lilile. Mizwale ni likaizeli ba bañata ba mwa puteho ya luna ba ambozi za mina. Mu ba butokwa luli. Ni ya tabile hahulu ku ba mwa lubasi lo lutuna cwalo lwa kwa moya.”—Yeunhee, South Korea.

“Ni susuelizwe hahulu ki tumelo, tundamo, ni lilato la mina le lituna ku Jehova ni Mubuso wa hae. Fokuñwi lu keshebisanga tukuluho ye lu na ni yona ni lico za kwa moya ze ñata z’a lu fa Jehova. Kono mina ha mu si ka eza cwalo. Mutala wa mina wa tumelo u lu tusa ku lemuha kuli ha lu ba ni silikani se si tiile ni Mulimu wa luna, u ka lu fa m’ata a ku tiyela litiko kaufela.”—Paulo, Brazil.

“Ne ni bile ni kolo ya ku bala ze bonwi za mina mwa 2002 Yearbook. Ne li ni susuelize luli, sihulu likande la Kaizeli Lydia Kurdas. Ne ni tabezi hahulu kaizeli y’o.”—Nidia, Costa Rica.

“Kacenu ni felize ku bala 2002 Yearbook. Ha ne ni nze ni i bala, tumelo ya ka ku Jehova ne i tiisizwe. Taba ye ni si ke na libala ki ya nako f’o ne ku suñilwe buhononi ka za be ne ba etelela. I ni lutile kuli ni kamuta ni si ke na honona ba ba etelela. Ni itumezi hahulu! Sico sa kwa moya seo sa susueza mi si lu tusa ku itukiseza nako f’o tumelo ya luna i kana ya likiwa.”—Leticia, United States.

“Lwa itumela kwa Yearbook ye nde. Ne li lona lwa pili kwa bahasanyi ba bañata ku bala ka za misebezi ya mizwale ba luna ba mwa Ukraine. Mizwale ba kwanu ne ba susuelizwe. Ba bañata, sihulu banana, ba ekelize kwa sebelezo ya bona. Ba bañwi ba kalile ku eza bupaina bwa kamita kamba bwa ku tusa. Kaufel’a bona ne ba susuelizwe ki makande a mizwale ni likaizeli be ne ba sebelelize Jehova musebezi ha ne u kwalezwi.”—Katengo ka Sebelezo ya Puteho, Ukraine.

Busepahali bwa mizwale ba kwa Ukraine kaniti bu susuelize batu ba Jehova mwa lifasi kaufela. Mane, ku balanga kamita litaba ze susueza za mwa Yearbook silimo ni silimo ki nzila ye nde ya ku tiisa ka yona tumelo ni tundamo ya luna mwa linako ze ipitezi ze.—Maheberu 12:1.