Lipuzo Ze Zwa kwa Babali

Ku Kolobezwa Bakeñisa Bafu Ku Talusañi?

Ha n’a ñola za zuho ya lihalimu, muapositola Paulusi n’a ñozi taba ye tabisa hahulu. Bibele ye Kenile ya Silozi, hatiso ya 1951, i li: “Hakusicwalo, ba ba kolobezwa bakeñisa bafu ne ba ka ezañi? Bafu haiba ha ba zuhi, kiñi se ba kolobelezwa bona?” Mi Bibele ye Kenile, hatiso ya 1984, yona i li: “Cwale, haili batu ba ba kolobezwa ka libizo la ba ba shwile, bo? Se ba hupula ki sika mañi? Haiba ki niti, sina mo ba bulelela, kuli ba ba shwile ha ba na ku zuha, cwale ba kolobelezwañi he ka libizo la bona?”—1 Bakorinte 15:29.

Kana Paulusi f’o n’a talusa kuli batu ba ba pila ba kolobelezwe ba ba shwile ba si ka kolobezwa? Ka ku ya ka litoloko za Bibele ze bulezwi fahalimu, ku kana kwa utwahala cwalo. Kono ku nyakisisa hande Mañolo ni Sigerike sa kwa makalelo sa n’a itusisize Paulusi ku bonisa kutwisiso i sili. Paulusi n’a talusa kuli Bakreste ba ba tozizwe ba kolobezwa, kamba ku nweliswa, kuli ba pile bupilo bo bu ka ba tahiseza lifu la ka busepahali sina mo ne ku bezi ku Kreste. Hasamulaho, ne ba ka zuswa ni ku ba libupiwa za moya, sina mo ne ku ezahalezi ku Kreste.

Mañolo a yemela kutwisiso yeo. Mwa liñolo la n’a ñolezi Maroma, Paulusi n’a ize: “Kana ha mu zibi kuli luna kaufela ha lu kolobelelizwe ku Jesu Kreste, lu kolobelelizwe mwa lifu la hae?” (Maroma 6:3) Mwa liñolo la n’a ñolezi ba kwa Filipi, Paulusi n’a ipulezi kuli: “Ku kopana ni [Kreste] mwa matomola a hae, mi ni swane sina yena mwa lifu la hae; kuli ka mukwa o muñwi ni na, ni y’o fita kwa zuho ya bafu.” (Mafilipi 3:10, 11) Paulusi n’a talusa kuli bupilo bwa mulateleli ya tozizwe wa Kreste bu ama ku sepahala mwa tiko, ku kona ku tahelwa ki lifu ka zazi, mi kwa mafelelezo ku shwa ka busepahali, mi hasamulaho ni ku zusezwa kwa lihalimu.

Nto ye lemuseha kikuli mañolo a, ni a mañwi a’ bulela ka ku nonga ka za lifu le li zamaelela ni batu ba ba kolobelizwe, a bulela za batu ba ba pila be ne ba kolobelizwe, isi be ne ba shwile. Paulusi hape n’a bulelezi Bakreste ba ba tozizwe sina yena kuli: “Mu patilwe ni yena ka kolobezo, mi mu zusizwe ni yena ka ku lumela mata a Mulimu ya zusize Jesu kwa bafu.”—Makolose 2:12.

Kwa 1 Makorinte 15:29, linzwi la Sigerike le li tolokilwe kuli “bakeñisa” kamba “ka libizo la” mwa Libibele ze ñwi li kona ku talusa hape kuli “ilikuli.” Ka ku lumelelana ni Libibele ze ñwi, toloko ya New World Translation of the Holy Scriptures i bala ka ku nepahala mwa timana yeo kuli: “Ba ka eza cwañi ba ba sweli ku kolobezwa ilikuli ba be ba ba shwile? Haiba luli bafu ha ba na ku zuswa, ki kabakalañi ni bona ha ba sweli ku kolobezwa ilikuli ba be cwalo?”