Lu Kona ku Libelela​—Muhato O Cwañi ku Mulimu?

MWA lilimo za ma-700 B.C.E., Mulena Ezekiasi wa Juda wa lilimo ze 39 a ziba kuli u na ni butuku bo bu ka mu omba moyo. Ka ku eshulwa ki taba yeo, Ezekiasi a itilelela ku Mulimu kuli a mu folise. Mulimu a alaba ka mupolofita kuli: “Ni utwile tapelo ya hao, ni boni ni miyoko ya hao. Bona, ni ekeza miyaha ye 15 kwa mazazi a hao.”—Isaya 38:1-5.

Ki kabakalañi Mulimu ha n’a ngile muhato f’o? Lilimo-limo kwamulaho, Mulimu n’a sepisize Mulena Davida ya lukile kuli: “Lusika lwa hao, ni mubuso wa hao, li ka na li tiya fapil’a hao ku ya ku ile, ni lubona lwa hao lu ka tiya ku ya ku ile.” Mulimu hape n’a sinuzi kuli Mesiya n’a ka zwa mwa lusika lwa Davida. (2 Samuele 7:16; Samu 89:20, 26-29; Isaya 11:1) Ezekiasi ha n’a wezwi ki butuku, n’a si ka  pepa kale mwan’a mushimani. Kacwalo, lusika lwa silena lwa Davida ne lu li mwa likangate la ku fela. Muhato wa n’a ngile Mulimu ku Ezekiasi n’o petile mulelo tenyene wa ku zwisezapili situhulu mwa n’a ka pepwa Mesiya.

Kuli a pete lisepiso za hae, Jehova n’a lamulezi batu ba hae hañata-ñata mwa linako kaufela ze n’e lakile miteñi ya Bukreste. Mushe n’a shaezi ka za tamulelo ya Isilaele kwa butanga bwa mwa Egepita kuli: “Kikuli [Muñ’a] Bupilo n’a mi lata, mi n’a bata ku tiisa buitamo bw’a n’a itamile ka luci ku bokuku a mina; [Muñ’a] Bupilo kih’a mi zwisa kwa Egepita ka lizoho le li mata.”—Deuteronoma 7:8.

Mwa linako za baapositola, tamulelo ya Mulimu hape ne i tusize kwa ku petahalisa milelo ya hae. Ka mutala, mwa nzila ye liba kwa Damaseka, Mujuda wa libizo la Saule n’a filwe ka makazo pono ya ku mu tuhelisa ku swenya balutiwa ba Kreste. Ku sikuluha kwa munna y’o, ya n’a til’o ba muapositola Paulusi, ne ku konahalisize hahulu ku hasana kwa taba ye nde mwahal’a macaba.—Likezo 9:1-16; Maroma 11:13.

Kana N’a Nganga Muhato Kamita?

Kana Mulimu n’a nganga muhato kamita kamba ka siwela? Mañolo a bonisa fo ku sweu kuli n’e si mukwa wa kamita. Nihaike Mulimu n’a lamulezi micaha ba balalu ba Maheberu kwa lifu la liyeku-yeku la mulilo ni mupolofita Daniele mwa musima wa litau, n’a si ka lamulela bapolofita ba bañwi kwa lifu. (2 Makolonika 24:20, 21; Daniele 3:21-27; 6:16-22; Maheberu 11:37) Pitrosi n’a lukuluzwi ka  makazo mwa tolongo mwa n’a lengilwe ki Heroda Agripa I. Niteñi, yena mulena ya swana y’o n’a bulaisize muapositola Jakobo, mi Mulimu n’a si ka lika ku tibela bukebenga b’o. (Likezo 12:1-11) Mulimu niha n’a konisize baapositola ku folisa bakuli mi mane ni ku zusa bafu, n’a si ka lumela ku tongola “muutwa mwa mubili” o n’o shupa muapositola Paulusi, ili w’o mwendi ne li butuku bwa mwa mubili.—2 Makorinte 12:7-9; Likezo 9:32-41; 1 Makorinte 12:28.

Mulimu n’a si ka lika ku tibela lishiushiu la maswenyeho ao Mubusi Nero wa Maroma n’a tahiselize balutiwa ba Kreste. Bakreste ne ba tukufalizwe, ku ciswa mwa mulilo inze ba pila, ni ku posezwa kwa lifolofolo za libatana. Nihakulicwalo, twaniso yeo ne i si ka makalisa Bakreste ba kwa makalelo, mi mane tumelo ya bona ya kuli Mulimu u teñi ne i si ka fokola. Esi mane Jesu n’a lemusize kale balutiwa ba hae kuli ne ba ka iswa kwa likuta ni kuli ba libelele ku nyandela tumelo ya bona mi mane ni ku i shwela.—Mateu 10:17-22.

Sina mwa n’a ezelize kwamulaho, kacenu Mulimu luli w’a kona ku lamulela batanga ba hae kwa miinelo ye lubeta, mi ba ba ikutwa kuli u ba silelelize ba si ke ba nyazwa. Nihakulicwalo, ku t’ata ku ziba hande-nde haiba Mulimu n’a ba lamulezi f’o kamba kutokwa. Batanga ba ba sepahala ba Jehova ba bañata ne ba holofezi mwa kozi ya kwa Toulouse, mi likiti-kiti za Bakreste ba ba sepahala ne ba shwezi mwa minganda ya ba Nazi ni Komyunizimu kamba mwa likozi ze ñwi Mulimu a sa ngi muhato ku ba sileleza. Ki kabakalañi Mulimu h’a sa ngangi mihato ya ku sileleza bote b’a katelwa?—Daniele 3:17, 18.

‘Linako ni Bushiko Kamba Bumai’

Kozi ha i lenga, i kona ku ama ufi kamba ufi, mi mutu niha li musepahali wa Mulimu, ha ku talusi kuli u ka banda. Mwa kozi ya kwa Toulouse, ye ne ba bandile bo Alain ni Liliane, batu ba 30 ne ba shwile mi mianda-nda ne ba holofezi, ibo ne si mulatu wa bona. Palo ye tuna ku yeo, ili likiti-kiti za batu, ba maibiswanga ki bukebenga, bondilaiba ba ba zamaisa mutakafululele, kamba lindwa, mi Mulimu h’a koni ku fiwa mulatu ka bumai bwa bona. Bibele i lu hupulisa kuli “mutu ni mutu u tamwa ki linako z’a pila ka zona, ni ki bushiko kamba bumai bwa hae.”—Muekelesia 9:11.

Kwand’a zeo, batu ba telwanga ki matuku, busupali, ni lifu. Nihaiba be ne ba nahana kuli Mulimu n’a pilisize bupilo bwa bona ka makazo kamba kuli ki yena ya ba yamunwezi kwa butuku bo ne ba si ka libelela ku banda, ba timezi kwa mafelelezo. Ku feliswa kwa matuku ni lifu ni ku “takula miyoko kaufela” kwa meto a batu ku sa li kwapili.—Sinulo 21:1-4.

Kuli ku be cwalo, ku tokwahala nto ye tuna hahulu ku fita ku lamulelwanga fela fa ni fani. Bibele i bulela za kezahalo ye bizwa “lizazi la [Muñ’a] Bupilo le lituna.” (Zefania 1:14) Ka nako ya muhato o mutuna-tuna w’o, Mulimu u ka tanyela bumaswe kaufela. Batu ba ka fiwa kolo ya ku pila ku ya ku ile mwa miinelo ye petahalile, m’o “za kale ha li sa na ku hupulwa, nihaiba ku kutela mwa minahano.” (Isaya 65:17) Nihaiba bafu ba ka zuswa, ili ku fetula kozi ye tuna kwa likozi kaufela za batu. (Joani 5:28, 29) Mulimu ka lilato ni bunde bwa hae ze sa feli u kabe a tatuluzi cwalo matata a batu, ku a feliseleza.

M’o Mulimu A’ Ngela Muhato Kacenu

Kono seo hasi talusi kuli Mulimu ka nako ye u inzi fela a sa isi pilu kwa masitapilu a  batu. Kacenu, Mulimu u fa batu kaufela, ibe ba mushobo kamba nyangela ifi, kolo ya ku fita fa ku mu ziba ni ku ba ni silikani sa ka butu ni yena. (1 Timotea 2:3, 4) Jesu n’a talusize nto yeo cwana: “Ha ku na mutu ya ka ta ku na, konji h’a ka hohiwa ki Ndate ya ni lumile.” (Joani 6:44) Mulimu u hohela ku yena batu ba ba sepahala ka taba ya Mubuso yeo batanga ba hae ba shaela kai ni kai mwa lifasi.

Hape, Mulimu ka sibili u nga muhato mwa bupilo bwa ba ba tabela ku etelelwa ki yena. Ka moya o kenile, Mulimu u ‘kwalula lipilu za bona’ kuli ba utwisise tato ya hae ni ku latelela z’a bata kuli ba eze. (Likezo 16:14) Ee, ka ku fa batu kolo ya ku ziba yena, Linzwi la hae, ni milelo ya hae, Mulimu u paka kuli u isa pilu ka lilato ku mañi ni mañi wa luna.—Joani 17:3.

Sa mafelelezo, Mulimu u tusa batu ba hae kacenu, isi ka ku ba lamulela ka makazo, kono ka ku ba fa moya o kenile ni “mata . . . a matuna” a ku tiyela butata kaufela bo bu ba tahela. (2 Makorinte 4:7) Muapositola Paulusi n’a ñozi kuli: “Ni tiiswa mwa linto kaufela ka tuso ya yena [Jehova Mulimu] ya ni fa m’ata.”—Mafilipi 4:13, NW.

Kacwalo lwa swanela luli ku itumela ku Mulimu ka zazi kwa bupilo ni sepo y’a lu fa ya ku pila ku ya ku ile mwa lifasi le li si na manyando ni a makana. Walisamu n’a buzize kuli: “Se ni ka kutiseza [Muñ’a] Bupilo ki sifi, kwa lituso za hae kaufela ku na? Ni ka nga sinwiso sa ku piliswa, ni lapele Libizo la [Muñ’a] Bupilo.” (Samu 116:12, 13) Ku balanga magazini ye ku ka mi tusa ku utwisisa z’a petile Mulimu, z’a peta cwale, ni z’a ka peta kwapili ze kona ku mi fa tabo cwale ni sepo ye tiile ya kuli lika li ka ba hande kwapili.—1 Timotea 4:8.

[Manzwi a fa likepe 6]

“Za kale ha li sa na ku hupulwa, nihaiba ku kutela mwa minahano.”—Isaya 65:17.

[Maswaniso a fa likepe 5]

Ka nako ya ze n’e ezahala ze bulezwi mwa Bibele, Jehova n’a si ka tibela Zakaria ku pobaulwa ka macwe . . .

kamba pulaotuna ya bonalimai ka lizoho la Heroda

[Siswaniso se si fa likepe 7]

Manyando a ka tuha a fela; nihaiba bafu ba ka pila hape