Piho ya Bashaeli ba Mubuso

“Ne Ni Sa Zibi Cwalo!”

DOROTA, yo muñwi wa Lipaki za Jehova mwa Poland ya neela nako ye ñata kwa ku kutaza, n’a sindeketile mwan’a hae wa lilimo ze 14 kwa kapatela ka kwa sikolo kuli a y’o tatubiwa. Mwan’a hae ha ne a nze a tatubiwa, dokota wa libizo la Janina, * a buza Dorota ka za misebezi y’a ezanga mwan’a hae fa lapa.

Dorota, a alaba a li: “Ha ni palelwanga ku lukisa sico, mwan’a ka u lukisezanga kaufela b’a silezi mwa lubasi mulalelo. Hape wa kenisanga mwa ndu ni ku tusa ku lukisa ze shwile fa lapa. U lata hahulu ku bala. U kona hahulu ku ituta.”

Janina a bulela a li: “Ni ikomokezi luli. Se ni sebelize lilimo ze 12 mwa sibaka mo, mi ha ni si ka utwa kale nto ye swana ni ye.”

Ka ku lemuha kuli n’a kona ku fa bupaki, Dorota a talusa kuli: “Bashemi ba bañata kacenu ba palelwa ku luta bana ba bona tuto ye swanela. Kona libaka bana ba bona hañata ha ba sa ikutwi ku ba batu luli.”

Janina a buza kuli: “Kanti mu ziba cwañi litaba ze kaufela? Buñata bwa bashemi ha ba li zibi.”

Dorota a alaba a li: “Litaba ze cwalo li fumanwa mwa Bibele. Ka mutala, ka ku ya ka Deuteronoma 6:6-9, ku luta bana ba luna ku kalisa ka ku ituta luna ka sibili. Esi lu swanela pili ku suña mwa lipilu ni minahano ya luna likuka ze lu bata ku luta bana ba luna?”

Janina a makala a li: “Kwa makalisa, kwa makalisa luli!” Kih’a buza Dorota ka za m’o Bibele i mu tuselize ku hulisa ni ku luta bana ba hae.

Dorota a talusa kuli: “Lu itutanga Bibele ni bana ba luna ka viki ni viki. Lu itusisanga buka ye li Questions Young People Ask—Answers That Work.” * Cwale a zwelapili ku talusa buka yeo ni ku bulela litaba ze ñwi ze ku yona.

Janina a makala a li: “Ne ni sa zibi cwalo! Kana n’a kona ku bona buka yeo?”

Hamulaho wa hora, Dorota a kuta a lwezi buka yeo.

H’a nze a tatubisisa buka yeo, Janina a buza a li: “Mu ba bulapeli mañi?”

“Ni yo muñwi wa Lipaki za Jehova.”

“Lipaki za Jehova ba ezanga cwañi ba bulapeli bu sili?”

Dorota a li, “Ba ba ezanga sina mo ni ambolela ni mina—ka likute,” hape a ekeza a li: “Kono, lu lakaza kuli kambe ba fita fa ku ziba niti ya Bibele.”

Janina a bulela ka ku lukuluha a li, “Mane se ni ikutwa hande.”

Ha se ba felize ze ne ba eza, Dorota a susueza hahulu Janina ku bala Bibele. “I ka mi tusa hahulu mwa bupilo bwa mina ni ku mi tusa mwa musebezi wa mina.”

Janina a lumela a li, “Mu ni susuelize luli ku eza cwalo.”

Ka maseme ni ka tundamo, Dorota a eza musipili wa ku ya kwa ofisi ya dokota ku ba musipili wa ku fa bupaki bo bunde.—1 Pitrosi 3:15.

[Litaluso za kwatasi]