“Mu Si Ke Mwa Lwala Coko I Liñwi”

SINA ha mu bona fa, kamele ni komu ze kekela hamoho li bonahala ku ziyeleha hahulu. Sibeli sa lifolofolo zeo li ziyelizwe ki ku beiwa hamoho mwa coko ye lukiselizwe lifolofolo ze peli ze likana kwa butuna ni m’ata. Ka ku iyakatwa buiketo bwa lifolofolo ze itusiswa kwa ku hoha lika, Mulimu n’a bulelezi Maisilaele kuli: “U si ke wa kekelisa komu ni mbongolo mwa coko i li ñwi.” (Deuteronoma 22:10) Sikuka seo si sebeza ni kwa komu ni kamele.

Hañata, mulimi n’a si ke a beya lifolofolo za hae mwa butata bo bu cwalo. Haiba n’a si na likomu ze peli, n’a kana a beile mwa coko lifolofolo ze peli ze li teñi. Ku bonahala kuli ki mwa n’a ezelize mulimi wa mwa lilimo za ma 1800 ya bulezwi mwa swanisezo. Bakeñisa shutano ya zona kwa bukima ni bukiti, folofolo ye nyinyani i ka satalala kuli i kone ku zamaelela ni ye ñwi, mi folofolo ye tiile hahulu i ka lwala mushimbo o bukiti.

Muapositola Paulusi n’a itusisize swanisezo ya ku lwesa lifolofolo ze shutana coko i liñwi kwa ku lu luta tuto ya butokwa. N’a ñozi kuli: “Mu si ke mwa lwala coko i liñwi ni ba ba sa lumeli. Kakuli twaelano ki ifi ya se si lukile ni bukopo? Ni liseli li na ni kopano mañi ni lififi?” (2 Makorinte 6:14) Mukreste u kona ku lwala cwañi coko i liñwi ni ba ba sa lumeli?

Nzila ye ñwi ki haiba Mukreste a keta ku nyalana ni mutu ya sa lumelelani ni litumelo za hae. Linyalo le li cwalo li kona ku mbalanda, ili ku palelwisa bosinyalana ku lumelelana fa litaba za butokwa.

Jehova ha n’a simuluzi linyalo, n’a beile musali fa kalulo ya ku ba “mulikani.” (Genese 2:18) Ka nzila ye swana, ka mupolofita Malaki, Mulimu n’a bizize musali kuli “mwanahenu tota.” (Malaki 2:14) Mubupi wa luna u bata kuli bosinyalana ba hohe hamoho ka ketelelo i liñwi ya kwa moya, ili ku ikabela mishimbo ni ku fumana limbuyoti ka ku likanelela.

Ka ku nyalela ‘fela ku Mulena,’ Mukreste u bonisa likute kwa kelezo ya Ndat’a luna wa kwa lihalimu. (1 Makorinte 7:39) Seo si tahisa linyalo le li swalisani, le li kona ku tahisa tumbo ni likute ku Mulimu bo munna ni musali ha ba nze ba mu sebeleza hamoho ba li ‘balikani ba niti’ ka nzila ye ipitezi.—Mafilipi 4:3.

[Manzwi a bañi ba siswaniso fa likepe 32]

Kamele ni pulu: Ku zwa mwa buka ya La Tierra Santa, Volyumu 1, 1830