Lipuzo Ze Zwa kwa Babali

Ki kabakalañi Elisha ha n’a kupile ku “abelwa habeli” kwa moya wa Elia?

Nakonyana fela Elia a si ka feleleza kale musebezi wa hae wa bupolofita mwa Isilaele, mupolofita Elisha ya n’a li mwanana ku yena n’a mu kupile kuli: “Na kupa kuli ni fiwe ku abelwa habeli kwa moya wa hao!” (2 Malena 2:9) Ka mubulelelo wa kwa moya, ku bonahala kuli Elisha n’a kupa kuli a fiwe linto ze peli ze cwale ka ze ne fiwanga ku mwana wa mweli. (Deuteronoma 21:17) Nyakisiso ye kuswani ya taba ye i ka bonisa hande taluso ya seo mi i ka lu tusa ku ituta ze ñwi ku ze ne ezahezi.

Ka ku etelelwa ki Jehova, mupolofita Elia n’a tozize Elisha kuli a be yena ya ka mu yola. (1 Malena 19:19-21) Ka lilimo ze bat’o ba ze 6, Elisha n’a sebelize sina mutanga ya sepahala wa Elia mi n’a pihelezi ku eza cwalo ku isa kwa mafelelezo. Nihaiba fa lizazi la mafelelezo la Elia la ku ba mupolofita mwa Isilaele, Elisha n’a kumalezi ku muluti ni muelezi wa hae y’o. Nihaike kuli Elia n’a kupile Elisha ku tuhela ku mu latelela, mupolofita wa mwanana y’o n’a bulezi halalu kuli: “A ni na ku ku tuhela.” (2 Malena 2:2, 4, 6; 3:11) Kaniti, Elisha n’a nga mupolofita wa musupali y’o ku ba ndat’ahe wa kwa moya.—2 Malena 2:12.

Nihakulicwalo, Elisha ne si yena fela mwana wa kwa moya wa Elia. Bo Elia ni Elisha ne ba swalisani ni sikwata sa banna be ne ba zibahala kuli ki “Bana ba bapolofita.” (2 Malena 2:3) Taba ye mwa liñolo la bubeli la Malena i bonisa kuli “bana” bao hape ne ba kumalezi hahulu ndat’a bona y’o wa kwa moya, yena Elia. (2 Malena 2:3, 5, 7, 15-17) Niteñi, ka ku ba muyoli ya tozizwe, Elisha ne li yena wa pili kwa bana ba Elia ba kwa moya—n’a li sina mweli. Mwa Isilaele wa kwaikale, mwana wa mushimani wa mweli n’a abelwa habeli sanda sa ndat’ahe, kono bana ba bañwi ba bashimani ne ba fiwa sanda si li siñwi yo muñwi ni yo muñwi. Kacwalo, Elisha n’a kupile ku abelwa habeli kwa sanda sa Elia sa kwa moya.

Ki kabakalañi Elisha ha n’a kupile cwalo ka yona nako yeo? Kakuli n’a tuha a ba ni musebezi o mutuna—wa ku yola Elia ka ku ba mupolofita mwa Isilaele. Kuli a pete buikalabelo b’o bo bu sabisa, Elisha n’a lemuhile kuli n’a tokwa mata a moya a fita buikoneli bwa hae, ili mata a kona ku fiwa fela ki Jehova. N’a tokwa ku ba ni bundume sina Elia mwa na inezi. (2 Malena 1:3, 4, 15, 16) Kona libaka ha n’a kupile ku abelwa habeli kwa moya wa Elia, ili moya wa bundume ni wa ku ‘tukufalelwa hahulu Muñ’a Bupilo’—tona tulemeno to tunde to tu tahiswa ki moya wa Mulimu. (1 Malena 19:10, 14) Elia n’a ezize cwañi?

Elia n’a zibile kuli Elisha n’a kupa nto ye ne si ya hae kono i kona ku zwa fela ku Mulimu. Kacwalo Elia ka buikokobezo a alaba kuli: “U kupile nto ye tata; kono ha u ka ni bona ni zwiswa ku wena, u ka fiwa cwalo.” (2 Malena 2:10) Mi kaniti, Jehova a lumeleza Elisha ku bona Elia ha kambamela kwa lihalimu mwa kakundukundu. (2 Malena 2:11, 12) Elisha n’a filwe za n’a kupile. Jehova n’a mu file moya wa n’a bata kuli a eze musebezi-tuna o munca ni ku tiyela miliko ye ne ka taha.

Kacenu, Bakreste ba ba tozizwe (fokuñwi ba bizwanga kuli sitopa sa Elisha) ni batanga ba Mulimu kaufela ba kona ku susuezwa hahulu ki yona taba ye ya mwa Bibele. Ka linako ze ñwi, lu kana lwa ba ni sabo ni ku ikutwa ku sa swanela ha lu fiwa buikalabelo bo bunca, kamba lu kana lu sa bi ni bundume bwa ku zwelapili ku eza musebezi wa ku kutaza za Mubuso ha lu sa iswi pilu ni ku lwaniswa mwa kalulo ye lu belekela. Niteñi, haiba lu kupa tuso ku Jehova, u ka lu fa moya o kenile ha lu u tokwa kuli lu talimane ni lishemaeto ni miinelo ye cinca-cinca. (Luke 11:13; 2 Makorinte 4:7; Mafilipi 4:13) Ee, sina Jehova mwa n’a tiiselize Elisha mwa musebezi wa hae o mutuna, u ka lu tusa kaufel’a luna, banana ni ba bahulu, ku peta bukombwa bwa luna.—2 Timotea 4:5.