Mu Hulise Moya wa Bufani

HA KU na mutu ya pepilwe ni moya wa bufani. Mbututu ka sipepo i tabelanga ku i fa ze i bata ni ze i tokwa, kono ha i zibi ni hanyinyani z’a tokwa mubabaleli wa yona. Kono kwa nalulelule, mwanana u kala ku ituta kuli haki yena fela ya tokwa ku fiwa tuso. Kono ni ba bañwi ni bona ba tokwa ku tusiwa, mi u lukela ku ituta ku fana ni ku abana ni ba bañwi isiñi fela ku fiwa. Moya wa bufani u tokwa ku huliswa.

Haki batu kaufela ba ba fana—niheba ka butuna—ba ba na ni moya wa bufani. Ba bañwi ba kana ba fana kwa likopano ze tusa ba ba shebile ilikuli ba ipumanele se siñwi fateñi. Ba bañwi ba kana ba fana ilikuli ba lumbiwe ki batu. Kono bufani bwa Bakreste ba niti bwa fapahana. Cwalehe ki bufani bufi bo li susueza Linzwi la Mulimu? Nyakisiso ya ka bukuswani ya za bufani bo ne bu eziwa ki Bakreste ba kwa makalelo i ka alaba puzo yeo.

Mitala ya Bufani bwa Sikreste

Bufani bwa Sikreste, sina mo bu taluselizwe mwa Bibele, ne li bwa “ku fana” fela  ku be ne ba li mwa butokwi bo butuna. (Maheberu 13:16; Maroma 15:26) Ne bu sa eziwi ka kapelezo. Muapositola Paulusi na ñozi kuli: “Mutu ni mutu a zwise mw’a hupulezi mwa pilu ya hae, isi ka ku bilaela, kamba ka ku hapelezwa; kakuli Mulimu u lata ya fana a tabile.” (2 Makorinte 9:7) Bufani hape ne bu sa eziwi fela kuli mutu a lumbiwe. Bo Ananiasi ni Safira ne ba ezize cwalo mi ne ba bulailwe.—Likezo 5:1-10.

Tokwahalo ya bufani n’e kalile muta Majuda ba bañata ni baproselite ba ne ba zwa kwa libaka za kwahule ne ba kopani mwa Jerusalema kwa mukiti wa Pentekonta ya 33 C.E. Ki kona k’o balateleli ba Jesu ne ba kile ba “tala Moya o Kenile, mi ba kala ku bulela lipuo li sili.” Buñata bo butuna bwa ba potoloha mi bwa utwa ngambolo ye susumeza ya Pitrosi ye ne bulela ka za Jesu Kreste. Hasamulaho, batu bao ba bona ka m’o Pitrosi ni Joani ne ba foliselize munna wa siyanga ya na li kwa munyako wa tempele, mi ba utwa Pitrosi ha bulela hape ka za Jesu ni za butokwa bwa ku baka. Likiti-kiti ne ba bakile mi ba kolobezwa sina balutiwa ba Kreste.—Likezo, likauhanyo 2 ni 3.

Batu be ne ba sa zo lumela bao ne ba bata ku siyala mwa Jerusalema kuli ba amuhele taelo ye ñwi kwa baapositola ba Jesu. Kono baapositola ne ba ka babalela cwañi baenyi bao kaufela kwa mubili? Bibele i lu bulelela kuli: “Kaufela ba ba ne ba na ni masimu nihaiba mandu, ne ba a lekisa mi ba tisa mali a se si lekisizwe; ba beya kwa mautu a baapositola; mi mutu ni mutu n’a abelwa mw’a tokwela.” (Likezo 4:33-35) Luli, puteho ye ne sa zo tomiwa mwa Jerusalema ne i na ni moya wa bufani!

Hasamulaho, liputeho ze ñwi ne li bonisize moya o swana wa bufani. Ka mutala, Bakreste ba kwa Masedonia, niha ne ba li babotana, ne ba fanile linubu ze tuna hahulu kwa mizwale ba bona ba ne ba li mwa butokwi mwa Judea. (Maroma 15:26; 2 Makorinte 8:1-7) Puteho ya mwa Filipi ne i zwile mubano mwa ku tusa Paulusi ku za bukombwa bwa hae. (Mafilipi 4:15, 16) Puteho ya mwa Jerusalema ne i abelanga lico ka zazi kwa limbelwa ba ne ba li mwa butokwi, mi baapositola ne ba ketile banna ba silezi ba ba swanela hande ku bona kuli ha ku na limbelwa ze ne siiwa.—Likezo 6:1-6.

Liputeho za Sikreste za kwa makalelo ne li itukiselize ku fa tuso niha ne li libani ni linako ze tata. Ka mutala, muta mupolofita Agabusi ha n’a bulezi cimo ka za ku ba teñi kwa tala ye tuna, balutiwa ba mwa puteho ya Antioke wa kwa Siria ba “lela ku lumela balumeli ba ba yahile mwa Judea lituso, mutu ni mutu mw’a konela ku zwisa.” (Likezo 11:28, 29) Ne ba bonisize luli moya o munde wa ku nyolelwa ku tusa ba bañwi!

Kiñi se ne si susuelize Bakreste ba kwa makalelo ku ba ni bufani ni lilato le li cwalo? Kaniti, mutu u kona ku ba cwañi ni moya wa bufani? Lwa kona ku ituta ze ñata ka ku nyakisisa ka bukuswani mutala wa Mulena Davida.

Bufani bwa Davida kwa Bulapeli bwa Niti

Ibat’o ba lilimo ze 500, aleka ya bulikani—sona sibulukelo se si kenile se ne si yemela ku ba teñi kwa Jehova—ne si sa ini kulokulikuñwi. Ne i bulukiwanga mwa tente, kamba tabernakele, ye ne tutiswa ku zwa fa sibaka se siñwi ku ya ku se si ñwi bana ba Isilaele ha ne ba yambaela mwa lihalaupa mane ni mwa Naha ya Sepiso. Mulena Davida n’a lakalize hahulu ku nga aleka mwa tente mo n’e bulukiwa ni ku yahela Jehova ndu ye swanela mo ne ku ka beiwanga aleka yeo ye kenile. Ha n’a bulela ku mupolofita Natani, Davida n’a ize: “Bona, na, ni pila mwa ndu ya likota za sidare, kanti Aleka ya bulikani bwa [Muñ’a] Bupilo i inzi mwatas’a masila.” —1 Makolonika. 17:1.

Nihakulicwalo Davida n’a li ndwalume. Kacwalo Jehova a laela kuli mwan’a Davida Salumoni ki yena ya n’a ka yaha tempele mwa ku beya aleka ya bulikani mwa puso ya hae ya kozo. (1 Makolonika 22:7-10) Kono seo, ne si  si ka palelwisa Davida ku ba ni moya wa bufani. Ka ku itukiseza musebezi o mutuna wo, a bakanya ze ne ka itusiswa mwa ku yaha tempele. Hasamulaho n’a bulelezi Salumoni kuli: “Ni lukiselize Ndu ya [Muñ’a] Bupilo litalenta za gauda ze likana ni 100,000, ni litalenta za silivera ze likana ni 1,000,000, ni kopa ni lisipi ze sa konwi ku likanywa, kakuli ki ze ñata hahulu. Ni lukisize ni likota ni macwe.” (1 Makolonika. 22:14) Davida n’a boni kuli ne ku sa tokwahala ze ñwi, mi ku za n’a luwile, a fana gauda ni silivera ya teko ye fitelela madola a $1,200,000,000 mwa nako ya cwale. Hape, linabi ni bona ne ba fanile hahulu. (1 Makolonika 29:3-9) Kaniti, Davida n’a bonisize moya wa bufani bo butuna!

Kiñi se ne si susuelize Davida ku fana hahulu cwalo? N’a lemuhile kuli kaufela za n’a luwile ni za n’a petile n’a li fumani ka tuso ya Jehova. A ipulelela cwalo mwa tapelo kuli: “[Muñ’a] Bupilo Mulimu wa luna, linto zeo kaufela ze lu kopanyize kuli lu ku yahele Ndu ka zona, ku yahela Libizo la hao le li kenile, li zwa mwa lizoho la hao, mi kaufela ki za hao. Hape Mulimu wa ka, na ziba kuli u  tatuba lipilu; mi se si ku kolisa, ki mutu h’a na ni niti. Haili na, ha ni ku file linto zeo kaufela ka ku lata, ki kabakala niti ye mwa pilu ya ka; mi cwale ni tabile ha ni boni sicaba sa hao se si tile fa, kuli si ku zwiselize limpo za sona ka ku lata.” (1 Makolonika 29:16, 17) Davida n’a ngile ka butuna silikani sa hae ni Jehova. N’a boni butokwa bwa ku sebeleza Mulimu ‘ka pilu ya hae kaufela, ni ka ngana ye utwisisa lika’ mi n’a fumana tabo mwa ku eza cwalo. (1 Makolonika 28:9) Tulemeno to tu swana t’o ne tu susuelize hape Bakreste ba kwa makalelo ku ba ni moya wa bufani.

Jehova —Mufani yo Mutuna

Jehova ki yena mufani yo mutuna ka ku fitisisa, mi ki mutala ku luna. U na ni lilato ni pabalelo ye tuna kuli mane “u pazuliseza ba ba maswe ni ba bande lizazi la hae, mi u neliseza ba ba lukile ni ba ba maswe lipula za hae.” (Mateu 5:45) U fa batu kaufela “bupilo, ni ku buyela, ni lika kaufela.” (Likezo 17:25) Ki niti sina mwa bulelela muapositola Jakobo: “Mpo ye nde kaufela, ni mpo ye petehile kaufela, i zwa kwahalimu, ku Ndate wa maseli.”—Jakobo 1:17.

 Mpo ye tuna ya lu file Jehova ki ya ku luma “Mwan’a hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.” (Joani. 3:16) Ha ku na ya kona ku itumba kuli wa swanelwa ki mpo yeo ‘kakuli kaufela lu ezize sibi, mi lu kauhezwi kwa kanya ya Mulimu.’ (Maroma 3:23, 24; 1 Joani 4:9, 10) Tiululo ya Kreste ki yona ye kwalula nzila ya ku amuhela ku Mulimu “mpo ya hae ye sa konwi ku taluswa,” ili mpo ya “sishemo sa Mulimu.” (2 Makorinte 9:14, 15) Kuli a itebuhe mpo ya Mulimu, Paulusi n’a ezize mwa bupilo bwa hae kaufela musebezi wa “ku paka Evangeli ya sishemo sa Mulimu.” (Likezo 20:24) N’a lemuhile kuli ne li tato ya Mulimu kuli “batu kamukana ba piliswe, mi ba fite fa zibo ya ku ziba niti.”—1 Timotea 2:4.

Kacenu, seo si swelwi ku petiwa ka bupaki ni ku luta ko kutuna ko se ku yandulukezi mwa linaha ze 234 lifasi kaufela. Jesu n’a bulezi cimo ka za yanduluko ye ha n’a ize: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.” (Mateu 24:14) Ee, “Evangeli i na ni ku bulelwa pili mwa macaba kaufela.” (Mareka 13:10) Ñohola bashaeli ba taba ye nde ba ba fitelela 6 milioni ne ba belekile lihora ze 1,202,381,302 mi ne ba zamaisize lituto za Bibele ze fitelela 5,300,000. Bakeñisa kuli bupilo bwa batu bu mwa kozi, taelo yeo ki ya butokwa hahulu.—Maroma 10:13-15; 1 Makorinte 1:21.

Lihatiso ze eza bolule-lule—hamohocwalo ni Libibele, libuka, ni libroshuwa—za hatiswa silimo ni silimo kuli ku tusiwe ba ba tokwa niti ya Bibele. Fahalimw’a seo, limagazini za Tora ni Awake ze fitelela bolule ba bolule li swelwi za hatiswa. Batu ha ba nze ba amuhela taba ye nde, Mandu a Mubuso ni Mandu a Mikopano a mañata-ñata a Lipaki za Jehova a sweli a yahiwa, mi a sweli ku ba libaka ko ku felwa litaelo za Bibele. Mikopano ya mipotoloho ni mikopano ye ipitezi ya lizazi li li liñwi, hamoho cwalo ni mikopano ya likiliti, ya lukiswanga silimo ni silimo. Tuto ye fiwa kwa balumiwa, baokameli ba maeto, maeluda, ni batanga ba bukombwa ni yona i sweli ya zwelapili ku fiwa. Lwa itumela ku Jehova ya lukisize litukiso zeo kaufela ka “mutanga ya sepahala, ya na ni kutwisiso.” (Mateu 24:45-47) Kaniti lu bata ku bonisa buitumelo bwa luna ku yena!

Ku bonisa Buitumelo ku Jehova

Sina mo ne i yahezwi tempele ni mo ne i tuselizwe puteho ya makalelo ya Sikreste, tifo ya lisinyehelo zeo kaufela n’e zwa kwa linubu za ka ku itatela. Kacwalo ku swanela ku hupulwa kuli, ha ku na ya kona ku fumisa Jehova Muñ’a lika kaufela. (1 Makolonika 29:14; Hagai 2:8) Kacwalo, linubu li fa bupaki bwa lilato la luna ku Jehova ni takazo ya luna ya ku zwisezapili bulapeli bwa niti. Paulusi u li bufani bo bu cwalo ki “nto ye ka tahisa, ka luna, buitumelo ku Mulimu.” (2 Makorinte 9:8-13) Jehova u tabela bufani bo bu cwalo kakuli bu bonisa kuli lu na ni moya o munde ni pilu ye nde ku yena. Ba ba fana ni ku itinga ku Jehova ba ka fuyaulwa ki yena mi ba ka onyoka kwa moya. (Deuteronoma 11:13-15; Liproverbia 3:9, 10; 11:25) Jesu n’a lu sepisize kuli tabo i kana i ba teñi, kuli “ku na ni mbuyoti mwa ku fana, ye fita ye mwa ku fiwa.”—Likezo 20:35.

Bakreste ba ba na ni moya wa bufani ha ba libelelangi fela nako ya butokwi. Kono ba talimela kolo ya kuli ba “eze batu kaufela hande, sihulu banabahabo [bona] ba balumeli.” (Magalata 6:10) Ka ku susueza Bakreste kuli ba be ni bufani bo butuna, Paulusi n’a ñozi kuli: “Mu si ke mwa libala ku eza ba bañwi hande, ni ku fana; kakuli Mulimu u tabela matabelo a cwalo.” (Maheberu 13:16) Ku itusisa ze lu na ni zona—ili nako, m’ata, mali—mwa ku tusa ba bañwi ni ku hulisa bulapeli bo bu kenile ku tabisa Jehova Mulimu. Kaniti, u lata moya wa bufani.

[Mbokisi/Siswaniso se si fa likepe 28, 29]

Linzila Zeo ka Zona Ba Bañwi Ba Iketela ku Fa

LINUBU ZA MUSEBEZI WA MWA LIFASI KAMUKANA

Ba bañata ba beyanga kwatuko mali a ku beya mwa mambokisi a linubu a ñozwi kuli “Linubu za Musebezi wa mwa Lifasi Kaufela—Mateu 24:14.”

Ka kweli, liputeho li lumelanga mali ao kwa Ofisi ya Lipaki za Jehova ya mwa naha ya zona. Linubu za ka ku itatela hape li kana za lumelwa kwa Watch Tower Bible and Tract Society of Pennsylvania, Box 33459, Lusaka 10101. Macheke a swanela ku lifiwa kwa “Watch Tower.” Lika za bukabali kamba ze ñwi cwalo za butokwa ni zona za kona ku fiwa. Liñolo le li talusa ka bukuswani kuli zeo ki limpo za ka ku itatela li lukela ku tahelela ni linubu zeo.

MILELO YA KU FANA

Kwand’a linubu za mali ze fiwa luli, ku na ni mifelo ye miñwi ye tusa sebelezo ya Mubuso mwa lifasi kamukana. Yeo i kopanyeleza:

Mali a Silelezo: Watch Tower Society ya kona ku fiwa ku amuhela mali a n’a bulukezwi ku itusiswa ka nako ya likozi kamba mali a fiwa mutu ya tuhela musebezi.

Mali A Bulukiwa mwa Panga: Mali a bulukiswa mwa panga, mapampili a mali a bulukisizwe, kamba mali a fiwa mutu ya tuhela musebezi a kona ku beiwa mwa pabalelo ya Watch Tower Society kamba ku fiwa Society fa lifu la mutu, ka ku ya ka ze i tokwa panga.

Ma-Stock ni Ma-Bond: Ma-stock ni ma-bond a kona ku fiwa kwa Watch Tower Society sina mpo luli.

Miyaho ya ka Butu: Miyaho ya ka butu ye kona ku lekiswa ya kona ku fiwa luli sina mpo kamba, haiba ki ndu i bulukelwe mufani ya kona ku zwelapili ku pila teñi ku fitela a shwa. Mu ñolele kwa ofisi ya mutai mwa naha ya habo mina pili mu si ka fanisa kale muyaho wa mina.

Ma-Will ni ma-Trust: Tutu kamba mali a kona ku fiwa kwa Watch Tower Society ka ku itusisa will (pampili ye bonisa mwa batela mutu kuli libyana za hae li abelwe ha s’a shwile) ye ñozwi ka mulao, kamba Watch Tower Society ya kona ku kalimiwa nto ye ñwi kuli i itusise yona, ili nto ye bizwa trust. Trust ye fiwa kwa kopano ya bulapeli i kona ku tahisa kuli mutu a si ke a telela lika ze ñwi.

Sina pulelo ya “milelo ya ku fana” ha i talusa cwalo, linubu ze cwalo li tokwa hahulu kuli mufani a nahanisise hande. Haiba mu itakaleza ku fana mwa tukiso ifi kamba ifi ya linubu za ka ku itatela, mu lizeze luwaile kamba ku ñolela kwa Ofisi ya Mubuluki wa Sikwama ka ku itusisa keyala ye bonisizwe kwatasi kamba kwa ofisi ya Lipaki za Jehova ye mwa naha ya mina.

Treasurer’s Office

Watch Tower Bible and Tract Society of Pennsylvania

Box 33459, Lusaka 10101

Telephone: (01) 272062

[Siswaniso se si fa likepe 26]

Kiñi se ne si susuelize Bakreste ba kwa makalelo ku ba ni bufani?