“Ni Fumani Silikani, Lilato, ni ku Isana Pilu”

“SE BA ka ziba batu kaufela kuli mu balutiwa ba ka ka sona, ki ha mu latana.” (Joani 13:35) Sina mwa n’a bulelezi Jesu, lilato ne li til’o ba lona sizibelo sa mizwale ba Sikreste ba kwa makalelo. Tertullian, ha se ku fitile lilimo ze fitelela mwanda ku zwa lifu la Kreste, n’a ñozi kuli sicaba ne si ize: ‘Ha mu bone mo ba latanela mi mane ni mo ba latela ku shwelana.’

Kana lilato le li cwalo li sa kona ku fumaneha mwa lifasi? Ee. Ka mutala, mu nge liñolo le ne li amuhezwi kwa ofisi ya Lipaki za Jehova mwa Brazil. Muñoli wa liñolo leo, ili musali wa libizo la Marília, n’a ñozi kuli:

“Ha ne lu pila mwa Villa Mercedes, mwa Argentina, boma, bao ba li yo muñwi wa Lipaki za Jehova, ba kala ku kula butuku bwa mwa lingongo bwa osteoarthritis, ku ba siya ba omelezi luñañali ku zwa mwa teka ku isa kwa mahutu. Likweli ze 8 za pili za ku kula kwa bona, ne li Lipaki ba mwa Villa Mercedes be ne ba ba kulisize ka lilato ni musa. Ne ba eza lika kaufela, ili ku fiyela mwa ndu ya bona ni ku ba lukiseza lico. Boma niha ne ba li mwa sipatela, nako kaufela ne ku na ni mutu fakaufi, musihali ni busihu.

“Na ni boma se lu kutile kwa Brazil, ko ba sa angulukelwa. Lipaki ba ko lu pila cwale ba eza ze ba kona kaufela ku tusa boma ku angulukelwa.”

Marília u ungula liñolo cwana: “Kaniti na ka sibili ha ni Paki, kono ni fumani silikani, lilato, ni ku isana pilu mwahal’a Lipaki.”

Ee, ku sa na ni batu ba ba eza ka lilato sakata la Sikreste. Ka ku eza cwalo, ba bonahaza m’o lituto za Jesu li kona ku amela hahulu bupilo bwa luna.