Lifasi Mo Ku Si Na Bukebenga L’a Taha

MU NAHANE, haiba mwa kona, lifasi mo ku si na likebenga! Ne ku si ke kwa tokwahala mapokola, litolongo, kamba likuta mwa ku atulela likebenga ka miatulelo ye tula, ili ye zinga. Neikaba lifasi m’o mutu ni mutu a kuteka bupilo ni tutu ya ba bañwi. Kana k’o ki ku lola? Mu kana mwa nahana cwalo, kono cinceho ye makaza yeo ki yona luli ye sepiswa mwa Bibele. Kiñi ha mu sa nyakisisi ze a sinula Mañolo ka za bukebenga ni bumaswe bo buñwi bo bu fa lifasi fa?

Mwa buka ya Lisamu, lu bala kuli: “U si ke wa filikana kabakala ba ba maswe, u si ke wa shwela muna ba ba sa yi ka mulao, kakuli fakaufinyana ba ka pumiwa sina bucwañi, mi ba ka oma, mo bu omela bucwañi bo butala. Kono ba ba ishuwa ba ka luwa naha, ba ka ikola kozo ye tuna.” (Samu 37:1, 2, 11) Luli, ha ku na ya kona ku tibela Mulimu ku taleleza sepiso yeo ni lisepiso za hae ze ñwi ze toba pilu.

Mulimu u ka tahisa limbuyoti zeo ka Mubuso wa hae. Mwa Tapelo ya Mulena, Jesu Kreste n’a lutile balutiwa ba hae ku lapelela Mubuso w’o kuli u tahe ni kuli se si latwa ki Mulimu si ezwe “mwa lifasi, mo si ezezwa kwa lihalimu.” (Mateu 6:9, 10) Cwale-cwale fa, mwatas’a Mubuso w’o, ha ku na mutu fa lifasi ya ka ba ni takazo ya ku eza bukebenga kabakala bunjebwe, maswenyeho, kamba buitati. Kono, ka mo li bulelela Linzwi la Mulimu: “Buloto bu ka ba bo buñata mwa naha, mane ni fahalimu a malundu.” (Samu 72:16) Ee, Jehova Mulimu u ka fa mañi ni mañi fa lifasi lika ze nde ze sa feli. Sa butokwa ni ku fita kikuli, nyangela i ka susumezwa ka lilato la ku lata Mulimu ni batu ba bañwi, mi bukebenga ha bu sa tola bu undunganya lifasi hape.