“Linzwi la Mulimu Luli Li M’ata!”

“LINZWI la Mulimu ki le li pila, mi li na ni mata.” (Maheberu 4:12) Ka ku paka m’ata a sa palelwi se siñwi a Linzwi la Mulimu, 2003 Calendar of Jehovah’s Witnesses i lwezi makande a’ silezi a ze ne kile za ezahala luli mwa bupilo bwa batu mwa libaka ze ñwi za lifasi. Mwatas’a toho ya taba ye li “Pili ni Hamulaho,” kalenda i bonisize m’o musebezi wa ku luta Bibele wa Lipaki za Jehova u tuselize batu ku bolosola mizamao ya bona, ku tuhela mipilelo ye maswe, ku tiisa bupilo bwa bona bwa lubasi, ni ku tiisa silikani ni Mulimu.

Ku amuhezwi mañolo a sikai a ku itebuha kalenda ya 2003. Ki ze ze ñwi za litaba ze bulezwi mwa mañolo ao:

“Kalenda ye ki bupaki kwa Bakreste ba niti bwa kuli ku na ni ba bañwi be ne ba lwanezi tumelo sina bona. Nako ye b’a kona ku buha maswaniso a’ ba hupulisa licinceho ze ba ezize ba bañwi.”—Steven, United States.

“Ne ni bata luli ku mi ñolela manzwinyana a kuli ni mi zibise mo ne i ni fitezi kwa pilu kalenda ya 2003. Na li ku ba ni susumezwe cwalo ki kalenda. Makande a a za bupilo bwa batu bao ni kana ni a lwalanga mwa mukotana wa ka wa mwa bukombwa ilikuli ni bonise batu bupaki bo bu pila ni bo bu susumeza bwa m’ata a Bibele a’ cinca batu.”—Marc, Belgium.

“Ne ni susumelizwe hahulu ki kalenda. Ne ni nahanile hahulu ha ne ni balile ni ku bona m’o Jehova a cincelize batu bao. Kacwalo, ni susumelizwe ku zwelapili ku eza licinceho mwa bupilo bwa ka tota. Kacenu ku fita nako ifi kamba ifi kwamulaho, ni ikutwa ku ba kalulo ya kopano ya mizwale ya mwa lifasi kamukana.”—Mary, United States.

“Jesu n’a utwile hahulu butuku ha bona manyando a batu a kwa moya. Ni itumela ku mina ka ku likanyisa mutala wa Kreste ka ku beya makande a bupilo bwa batu mwa kalenda ya 2003. Kalenda ya li ku ba i ni fite kwa pilu cwalo kuli mane ni mioko ki ye lota.”—Cassandra, United States.

“Ha ne ni li wa lilimo ze 11, ne ni kalile ku zuba; hamulaho ne ni itusisanga ni milyani. Hañata ne ni lelanga ku ipulaya. Ha ne ni fitile fa ku ziba Jehova, ne ni tusizwe ku tuhela mikwa yeo. Kalenda ye ki ya butokwa hahulu ku na. Mitala ya mizwale ni likaizeli ba ka ba mwa libaka ze ñwi za lifasi ya ni tiisa. Cwale n’a ziba kuli kanti haki na ni nosi ya lwana ndwa ye ni kuli sa butokwa hahulu ki ku lata Jehova ni ku mu sebeleza ka pilu kaufela.”—Margaret, Poland.

“O, Linzwi la Mulimu luli li m’ata! Ha ne ni amuhezi kalenda ya 2003, ne ni itiisize fela kuli ni si ke na lotisa mioko. Makande ao hamoho ni maswaniso, li tiisa hahulu tumelo.”—Darlene, United States.

“Mupilelo wa kale wa ba bañwi ba batu bao u swana hahulu ni mupilelo wa ka wa pili. Jehova u ni file m’ata a ku tuhela mikwa ye maswe ye ne bonahala inge ha i konwi ku tulwa. Ni itumela hahulu ku mina kwa makande ao a ze ne ezahezi luli mwa bupilo bwa batu.”—William, United States.