“Mu Sutelele ku Mulimu Mi U Ka Sutelela ku Mina”

Pili ni Hamulaho​—Likuka za Bibele Ne Li Mu Cincize

HA N’A li mucaha, Adrian n’a tezi buhali ni ndimbelela. Kacimacima ka hae ne ka mu felezanga mwahalimu. N’a li munwi, muzubi, ni muitamaeli. Adrian n’a zibahala ka lipina ze maswe mi n’a na ni pazo ye ne bonahaza moya wa hae wa mifilifili. Ha talusa lilimo zeo, u li: “Ne ni kutanga mukutelo o muñwi, ni ku lamba milili ya ka glue [mulyani o lamatela], mi fokuñwi ne ni pendanga milili ya ka bufubelu kamba mubala o muñwi.” Adrian hape n’a punyize ngo ya hae.

Adrian n’a tutezi mwa ndu cwana ye sinyehile ni mikulwani ba sikai be ne ba ipanguzi. Teñi k’o ne ba inwelanga macwala ni ku itusisa milyani ye kola. Adrian u hupula kuli: “Ne ni nwanga mulyani o bizwa speed mi ka nako ye swana ne ni itabanga ndonga ya Valium kamba ku itusisa nto ifi kamba ifi. Ha ne ku si na milyani kamba glue, ne ni itusisanga mafula a ku uzwa mwa limota za batu mi ne ni kolwanga.” Ka ku pila bupilo bwa bubangoki mwa mikwakwa, Adrian n’a sabisa mi n’a li wa mifilifili hahulu. Batu ne ba sa tabeli ku eza siango ni yena. Ka nako ye swana, libubo la hae la hohela batu ba ba maswe ku yena.

Kwa nalulelule, Adrian a lemuha kuli ba ba twi ki balikani ba hae ne ba utwana fela ni yena kabakala lituso ze ne ba fumana. Hape n’a lemuhile kuli “buhali bwa hae kaufela ni mifilifili ha li si ka mu fumanisa nto ni ye kana.” Ka ku ikutwa kutokwa tuso ni ku zwafa, a fulalela balikani ba hae. Ha n’a fumani magazini ya Tora ya ku Libelela kwa sibaka ko ne ku na ni musebezi wa ku yaha, a tabiswa ki lushango lwa yona lo lu tomile fa Bibele, mi seo sa mu tahiseza ku kala ku ituta Bibele ni Lipaki za Jehova. Adrian a tukufalelwa ku nga muhato kwa memo ye li: “Mu sutelele ku Mulimu mi u ka sutelela ku mina.” (Jakobo 4:8) Kacwalo, Adrian a bona butokwa bwa ku kala ku sebelisa likuka ze mwa Mañolo a Kenile.

Zibo ya mwa Bibele ya na nz’a fumana Adrian ne i cincize lizwalo la hae ni ku sikulula sinca bupilo bwa hae. N’a tusizwe ku feza kacimacima ka hae ni ku ba ni buiswalo. Ka m’ata a Linzwi la Mulimu, butu bwa Adrian bwa cinca luli.—Maheberu 4:12.

Kono Bibele i kona cwañi ku ba ni m’ata a ku cinca mutu cwalo? Zibo ya mwa Mañolo i lu tusa ku “apala mutu yo munca.” (Maefese 4:24) Ee, butu bwa luna bwa cinca ha lu itusisa zibo ya niti ye mwa Bibele. Kono zibo yeo i cinca cwañi batu?

Sa pili, Bibele i bonisa mikwa ye maswe ye tokwa ku tuhelwa. (Liproverbia 6:16-19) Sa bubeli, Mañolo a lu susueza ku bonisa tulemeno to tunde to tu tiswa ki moya o kenile wa Mulimu. Tulemeno t’o tu kopanyeleza ‘lilato, tabo, kozo, pilu-telele, musa, bunde, busepahali, ku ishuwa, buiswalo.’—Magalata 5:22, 23.

Kutwisiso ye tungile ya z’a tokwa Mulimu ne i tusize Adrian ku itekula kuli a bone mikwa ya n’a tokwa ku ba ni yona ni mikwa ya n’a tokwa ku tuhela.  (Jakobo 1:22-25) Kono ao ne li fela makalelo. Kwand’a zibo ne ku tokwahala nto ye ne ka susueza Adrian kuli a itatele ku cinca.

Adrian n’a itutile kuli mutu yo munca yo munde u shemunwa “ka siswaniso sa Ya mu bupile.” (Makolose 3:10) N’a fitile fa ku ziba kuli butu bwa Sikreste bu swanela ku swana ni butu bwa Mulimu tota. (Maefese 5:1) Ka tuto ya Bibele, Adrian n’a itutile ka za m’o Jehova a sebelisanela ni batu mi n’a lemuhile tulemeno twa Mulimu to tunde, to tu cwale ka lilato, musa, bunde, sishemo, ni ku luka. Zibo ye cwalo ne i susuelize Adrian ku lata Jehova ni ku ikataza ku ba mutu ya kona ku lumelelwa ki Jehova.—Mateu 22:37.

Ka ku fita kwa nako ni ka ku tusiwa ki moya o kenile wa Mulimu, Adrian n’a konile ku ombalisa buhali bwa hae. Yena ni musal’a hae cwale ba patehile ku tusa ba bañwi ku cinca bupilo bwa bona ka ku itusisa zibo ye mwa Bibele. Adrian u li: “Ka ku fapana ni buñata bwa be ne ba li balikani ba ka be se ba shwile, na ni sa pila mi ni ikola bupilo bwa lubasi bo bu tabisa.” Ku cinca kwa Adrian ki bupaki bwa m’ata a Bibele a ku kona ku cinca bupilo bwa batu ku bu bisa bo bunde.

[Manzwi a fa likepe 25]

“Buhali bwa hae kaufela ni mifilifili ha li si ka mu fumanisa nto ni ye kana”

[Mbokisi fa likepe 25]

Likuka za Bibele Z’e Beleka ▸

Ze tatama ki likuka ze ñwi za Mañolo ze se tusize batu ba bañata ba ba na ni buhali ni mifilifili kuli ba ombale:

“Mu pilisane mwa kozo ni batu kaufela. Balatiwa, mu si ke mwa kutisa bumaswe ili mina, kono mu fe buhali sibaka.” (Maroma 12:18, 19) Mu tuhelele Mulimu kuli a atule kuli ki lili kamba ki bafi b’a ka lombota. W’a kona ku ba lombota kakuli w’a ziba buniti kaufela, mi koto ifi kamba ifi y’a ka fa i ka fiwa ka katulo ya hae ye lukile.

“Niha mu ka halifa mu si ke mwa eza sibi; mu si ke mwa likelelwa ki lizazi mu nze mu halifile, mi mu si ke mwa fa Diabulosi sibaka.” (Maefese 4:26, 27) Fokuñwi mutu wa kona ku nyemiswa ka libaka le li utwahala. Ha ku ba cwalo, mutu y’o ha swaneli ku ina cwalo ‘inz’a halifile.’ Kabakalañi? Kakuli ku eza cwalo ku kona ku mu ezisa nto ye maswe, ili ku “fa Diabulosi sibaka” kuli cwale mutu y’o a si ke a tabelwa ki Jehova Mulimu.

“Lisela ku fela pilu, u tuhele ku halifa. U si ke wa filikana, ki ku isa fela kwa sibi.” (Samu 37:8) Buhali bo bu fitelezi bu ezisa mutu likezo ze fitelezi. Haiba mutu a ituhelela ku halifa, ku bunolo hahulu kuli a bulele kamba ku eza lika ze ka utwisa butuku mañi ni mañi ya mwa taba.