“Ba Ba Lukela Ku Eza  Misebezi Kaufela Ye Minde”

“HUPULISA balumeli kuli ba ipeye kwatas’a ba ba busa, ni kwatas’a malena; ba ye ka mulao; ibe ba ba lukela ku eza misebezi kaufela ye minde.” (Tite 3:1) Ki misebezi mañi ye minde ya n’a talusa muapositola Paulusi ha n’a ñolezi balumeli sina yena manzwi ao? E. F. Scott, caziba wa za mwa Bibele, n’a file mutala o muñwi wa misebezi yeo, kuli: “Bakreste ne ba sa swaneli fela ku utwa babusi, kono ba swanela ku eza musebezi ufi kamba ufi o munde. . . . Ha ne ku tokwahala, Bakreste ba swanela ku ba ba pili ku tusa nyangela. Hañata, ne ku banga mililo, matuku, palali ya mifuta-futa, mi bayahi ba bande ne ba ka bata ku tusa bomuyahwa ni bona.”

Bakreste ba eza misebezi ye miñwi ye tusa nyangela ibile fela misebezi yeo ha i lwanisani ni milao ya Mulimu. (Likezo 5:29) Ka mutala, ka ku latelela taelo ya ba likolo la fa silalanda la mulilo, ofisi ya mutai ya Lipaki za Jehova mwa Japan, ye mwa Ebina, i na ni tukiso ya ku itwaeza mwa ku ezeza muta ku ba ni mulilo. Fa linako ze cwalo, bote ba fa Betele ba kopananga ku t’o teeleza kwa litaelo ze ba fa bayemeli ba likolo la fa silalanda la mulilo.

Hape, ka lilimo ze fitelela ze lishumi, ofisi ya mutai se i sebelisani ni babusisi ba fa silalanda mwa tukiso ya ku bonisa lika ye lukiselizwe ku zibisa batu ka za ku tibela mililo. Kwa kezahalo yeo, likampani za mwa muleneñi w’o li bonisanga buitukisezo bwa zona ku za ku tima mulilo. Hañata, mutai s’o filwe mipuzo bakeñisa bunangu ni swalisano ya babeleki ba wona. Mwa 2001, ne u filwe mupuzo wa pili mwa tukiso yeo. Ba tabela ku eza musebezi o munde o kona ku pilisa batu muta ku ba ni mulilo.

Sebelezo ya Butokwa

Kono Lipaki za Jehova ba iyakatwa musebezi wa butokwa ni ku fita, w’o hape u pilisa batu. Kamita ba potelanga bomuyahwa ni bona ku ba bulelela taba ye nde ya Mubuso wa Mulimu. (Mateu 24:14) Lipaki ba susueza batu ku ituta ni ku sebelisa likuka za mwa Bibele mwa bupilo bwa bona ilikuli ba be ni bupilo bo bunde cwale ni ku ba ni sepo ya ku pila ku ya ku ile mwa lifasi m’o kozo sakata ni buiketo li ka ba teñi.

Ba bañwi ba kana ba sa boni butokwa bwa sebelezo ya Lipaki za Jehova, ili ku ba nga kuli ba toliya. Kono Muatuli Jean Crepeau wa kuta ya Quebec Superior Court mwa Canada n’a na ni mubonelo u sili. Lipaki za Jehova ba kwateñi ne ba hanyelize mulao wa mwa Blainville, mwa Quebec, o n’o tokwa kuli ba shimbange pampili ya mulao ye ba lumeleza ku pota fa ndu ni ndu. Ka mo ne i atulezi kuta, Muatuli Crepeau n’a ize: “Ku pota kwa Lipaki za Jehova ki sebelezo ye ba eza kwa nyangela mi . . . lihatiso ze ba fa Lipaki ku ba ba tabela ki za butokwa, ze ambola fa litaba ze cwale ka bulapeli, Bibele, milyani ye kola, bucakolwa, tuto ya banana, butata bwa mwa manyalo, ni telekano.” Mwa katulo yeo, ne ku bulezwi hape kuli: “Kuta i kona fela ku atula kuli ku bapanya Lipaki za Jehova ni masulusi ki matapa, ki kashwau, ki lunya, ni ku ba sinya libizo.”

Lipaki za Jehova ba tusa ku za buiketo bwa mwa lilalanda mo ba pila ka ku tusa batu ku tatulula butata mwa bupilo bwa bona bwa ka zazi ni ku ba fa sepo ya kwapili. Bibele i ba tusa ku peta musebezi w’o. “Liñolo kamukana li tahile ka Moya wa Mulimu, mi li na ni tuso kwa ku luta, ni ku kolisa, ni ku nyaza, ni ku hulisa ka ku luka; kuli mutu wa Mulimu a petahale mi a talifele luli misebezi kaufela ye minde.”—2 Timotea 3:16, 17.

Kana ne mu ka tabela ku ziba m’o Lipaki za Jehova ba bela “ba ba lukela ku eza misebezi kaufela ye minde”? Lu mi mema ku amuhela tuso ya bona ya ku ituta ze ñwi ka za Bibele ni ku tusiwa cwalo ki sebelezo ya butokwa ye ba ezeza nyangela mwa silalanda sa mina ni mwa lifasi kaufela.

[Maswaniso a fa likepe 30, 31]

Lipaki za Jehova ba bata ku sebelisana ni babusi

[Siswaniso se si fa likepe 31]

Lipaki ba zibahala ka tuso ye ba fa kwa bayahwa ni bona