Libaka Le Li Swanela la ku Lumela ku Mulimu

BUKA ya kwa Korea ye bizwa 31 Reasons Why Young People Leave the Church i bulela patalaza kuli buñata ba tuhela ku yanga kwa keleke kabakala ku sa fumana likalabo tenyene kwa lipuzo za bona. Ka mutala, ba ipuzanga kuli, ‘Balumeli ba nyandelañi?’ mi ‘Ki kabakalañi ha lu swanela ku lumela lituto kaufela za keleke hailif’o ze ñwi za zona za lyanganisa mi za lwanisana?’

Ka ku swabiswa ki likalabo ze ba fiwa ki baluti ba bona ba bulapeli, buñata ba nahana kuli Bibele ha i na likalabo. Muluti wa bulapeli ha fa kalabo ya mwa toho ya hae fela, hañata batu ha ba utwisisangi, mi mane fokuñwi batu ba fitanga fa ku hana Mulimu ni Bibele.

Ne ku bile cwalo ku Abel, ya n’a hulezi mwa bulapeli bwa Lutheran kwa South Africa. U hupula kuli: “Keleke i luta kuli mutu ya shwile u ‘ngilwe’ ki Mulimu. Kono ne ni sa utwisisi libaka Mulimu ya lilato ha n’a ‘nga’ bashemi kwa bana ba bona. Mwa Africa, kwahae ko ne ni hulezi, ne lu sa bulayangi kuhu ku fitela tuzwinyani twa yona tu hula. Ha ne lu fumana komu ya lifuta, ne lu sa i bulai ku fitela namani ya yona i pepwa ni ku kwa. Ne ni sa utwisisi libaka Mulimu ya lilato ha si na sishemo se si cwalo kwa batu.”

Aram wa kwa Canada ni yena n’a na ni butata bo bu swana. U li: “Ha ne ni na ni lilimo ze 13, bondate ba shwa. Kwa malilo, mukutazi yo muñwi ya tumile n’a bulezi kuli Mulimu n’a bata kuli bondate ba shwe kuli ba be bukaufi ni Yena kwa lihalimu. N’a ize: ‘Mulimu u nganga batu ba bande, kakuli Mulimu u lata ba ba lukile.’ Ne ni sa  utwisisi libaka Mulimu ha na ni buitati cwalo.”

Hasamulaho, bo Abel ni Aram ba kopana ni Lipaki za Jehova, ba ituta Bibele ni bona, mi ba fumana likalabo kwa lipuzo za bona. Ba hulisa lilato la ku lata Mulimu ni tumelo ye tiile ku yena. Ku zwa f’o, ba ineela ku Jehova ni ku ba batanga ba hae ba ba sepahala.

Zibo ye Nepahezi —I Isa kwa Tumelo ku Mulimu

Lu itutañi ku ze ne ezahezi zeo? Li lu luta kuli, kuli lu be ni tumelo ku Mulimu lu tokwa ku ba ni zibo ye nepahezi ya Bibele. Muapositola Paulusi n’a taluselize Bakreste ba mwa munzi wa ikale wa Filipi kuli: “Se ni mi lapelela, kikuli lilato la mina li ye li ekezehe mwa zibo ni mwa kutwisiso kaufela.” (Mafilipi 1:9) Paulusi f’o n’a bonisa kuli lu ka ba ni lilato ku Mulimu ni kwa balumeli sina luna ha lu ka ba ni zibo ye nepahezi ya za Mulimu ni kutwisiso ya tato ya hae.

Taba yeo ki ya niti kakuli nto ya pili ye lu ezanga pili lu si ka fita kale fa ku sepa mutu ki ku ziba mutu y’o—mi ha lu mu ziba hande, lu mu sepa hahulu. Ni mina mu tokwa ku ba ni zibo ye nepahezi kuli pilu ya mina i mi susueze ku lumela ku Mulimu. Paulusi n’a ize: “Tumelo ki ku sepa ka ku tiya ze lu libelezi, ni ku kolwa ze sa bonwi.” (Maheberu 11:1) Ku lumela ku Mulimu ku si na zibo ye nepahezi ya Bibele ku swana sina ku yaha ndu ya mapepa. Moya fela o munyinyani wa kona ku i wisa.

Ku ituta Bibele ku kona ku mi tusa ku fumana likalabo kwa lipuzo ze cwale ka ye ne katalize bo Abel ni Aram, ya kuli batu ba shwelañi? Bibele i li “sibi sina ha si keni mwa lifasi ka mutu a li muñwi, mi ka sibi ku keni lifu, kamukwaocwalo lifu li tile kwa batu kaufela kakuli ba ezize sibi kaufela.” (Maroma 5:12) Batu ba supala ni ku shwa isi ka libaka la kuli Mulimu u ba ngile, kono kabakala sibi sa Adama. (Genese 2:16, 17; 3:6, 17-19) Ku zwa f’o, mwa Bibele lu fumana teñi sepo ya niti ya lu file Jehova Mulimu. Ka Mwan’a hae, Jesu Kreste, u lu file sepo ya kuli batu ba ba pepezwi mwa sibi ba ka zusiwa kwa bafu.—Joani 5:28, 29; Likezo 24:15.

Kuli lu kolwe kuli luli zuho i ka ba teñi, Bibele i fa mitala ye sikai ya batu ba n’a kile a zusa Jesu kwa bafu. (Luka 7:11-17; 8:40-56; Joani 11:17-45) Ha mu ka ipalela mitala yeo ya mwa Bibele, mu ka lemuha tabo ni nyakalalo ye ne ba bile ni yona balikani ni bahabo bafu be ne ba zusizwe. Hape mu ka lemuha kuli lipilu za bona ne li ba susuelize ku lumbeka Mulimu ni ku lumela ku Jesu.

Zibo ye nepahezi ya za Mulimu ni milelo ya hae i kona ku susueza batu ka nzila ye swana kacenu. Ba bañata ne ba kile ba lyanganiswa, ku katazwa, kamba mane ku sitataliswa ki lipuzo za bona za butokwa ze ne si na likalabo tenyene. Kono ha ne ba itutile Bibele, ne ba fumani likalabo, mi bupilo bwa bona bu cincize kaufel’a bona.

Lilato la Luna ku Mulimu—Ki Lona Libaka le Lituna la ku Mu Sebeleza

Nihaike kuli zibo ye nepahezi i isa kwa tumelo ku Mulimu, mutu u tokwa nto ye ñwi ya butokwa kuli a ipeye ku utwa ni ku sebeleza Mulimu. Jesu ha n’a buzizwe mulao wa Mulimu o mutuna ka ku fitisisa, n’a ize: “Lata Mulena Mulimu wa hao ka pilu ya hao kaufela, ni ka moya wa hao kaufela, ni ka kutwisiso ya hao kaufela, ni ka mata a hao kaufela.” (Mareka 12:30) Mutu ha lata Mulimu cwalo sina mwa n’a bulelezi Jesu, u ka tabela hahulu ku mu utwa ni ku mu sebeleza. Kana ni mina ku cwalo?

Rachel, ya bile mulumiwa mwa Korea ka lilimo ze mashumi-shumi, u bulela libaka la tumelo ya hae, u li: “Ni nahananga za bufani bwa Jehova kwa libupiwa za hae, swalelo ya hae kwa batu ba hae, ni takazo ya hae ya ku lu tusa ka ku lu zibisa za tokwa ku luna.  Zeo kaufela li tungisa lilato la ka ku Mulimu. Mi lilato leo li ni susueza ku mu sebeleza.”

Martha, mbelwa wa kwa Germany, u sebelelize Jehova ka lilimo ze 48. U li: “Mu ni buza libaka le ni sebeleza Jehova? Kakuli na mu lata. Zazi ni zazi manzibwana ni ambolanga ku Jehova ka tapelo ni ku mu taluseza mo ni itebuhela hahulu kaufela z’a lu file, sihulu sitabelo se si lu liulula kwa libi.”

Kacwalo, lilato la ku lata Mulimu li lu susueza ku mu sebeleza ka pilu kaufela. Kono mutu u fita cwañi fa ku ba ni lilato le li cwalo? Nto ye lu susueza ku tungisa lilato la luna ku Mulimu ki ku itebuha lilato la hae ku luna. Ha mu bone kupuliso ye nde ye ya mwa Bibele: “Ya sa lati, h’a zibi Mulimu; kakuli Mulimu u lilato. Lilato la Mulimu ku luna li bonahezi ka se: Mulimu u lumile mwa lifasi Mwan’a hae a li muñwi ku Yena kuli lu pile ka yena. Lilato ki le: Hasi luna lu latile Mulimu, kono ki Yena ya lu latile, mi u lumile Mwan’a hae kuli a be tifo ya libi za luna.”—1 Joani 4:8-10.

Kana mwa ziba kuli lilato leo ki le lituna cwañi? Mu nahane kuli ne se mu tiba mwa nuka ye buba mi mutu yo muñwi a itoboha bupilo bwa hae ni ku t’o mi cimbula mwateñi. Kana ne mu ka mu libala, kamba ne mu ka itumela hahulu-hulu ku yena? Kana ne mu si ke mwa mu ezeza nto ifi kamba ifi ye mu kona? Lilato la lu bonisize Mulimu ka ku lu fa Mwan’a hae, Jesu Kreste, kuli a be sitabelo ki le lituna hahulu ku fita nto yeo. (Joani 3:16; Maroma 8:38, 39) Pilu ya mina ha i susuezwa ki lilato la Mulimu, mu ka ba ni lilato ku yena ni ku mu sebeleza ka pilu kaufela.

Mipuzo Cwale ni Kwapili

Nihaike kuli libaka le lituna la ku eza tato ya Mulimu li swanela ku ba lilato la luna ku yena, kwa tabisa ku ziba kuli Mulimu u fa mupuzo ku ba ba mu sebeleza. Muapositola Paulusi u li: “Kwand’a tumelo mutu h’a koni  ku tabelwa ki Yena; kakuli ya taha ku Mulimu u swanezi ku lumela kuli Mulimu u teñi, ni kuli ki Yena ya fa ba ba mu bata mupuzo.”—Maheberu 11:6.

Ba ba lata Mulimu ni ku mu utwa ba fuyaulwa ki yena. Ba bañata ba na ni buikangulo bo bunde kabakala ku latelela likuka za Bibele. (Liproverbia 23:20, 21; 2 Makorinte 7:1) Ba ba utwa likuka za Bibele ka za busepahali ni miswalo hañata ba sepiwa hahulu fa musebezi mi kacwalo ba fumana mwa ku ipiliseza. (Makolose 3:23) Ka ku beya sepo ku Jehova, batanga ba Mulimu ba na ni mombecima niha ba li mwa miinelo ye t’ata. (Liproverbia 28:25; Mafilipi 4:6, 7) Fahalimw’a zeo kaufela, ba tomile meto a bona fa mupuzo wa bupilo bo bu sa feli fa lifasi-mubu mwa Paradaisi ye taha.—Samu 37:11, 29.

Ba ba ikola limbuyoti zeo ze zwa ku Jehova ba ikutwa cwañi ka za hae? Jacqueline, Mukreste wa kwa Canada, u fitisa buitumelo bwa hae ku Mulimu, u li: “U lu fanga limpo ze nde kamita, mi u lu kolwisize kuli ku ka ba ni bupilo bo bu sa feli.” Abel, ye lu utwile za hae kwa makalelo, u li: “Ne ni sa zibi za bupilo bo bu sa feli mwa paradaisi ya fa lifasi-mubu, kono cwale na bu nyolelwa luli. Kono niha neikaba kuli ha ku na Paradaisi, ne ni ka tabela niteñi ku bonisa lilato la ka ku Mulimu ka ku mu sebeleza.”

Ni Mina Mwa Kona ku Ba ni Tumelo ya Niti

Bibele i li: ‘Muñ’a Bupilo wa limpi, u atula ka niti ya taba, u tatuba liteka, u lika lipilu za batu.’ (Jeremia 11:20) Kacwalo, Jehova wa bona lika ze ipatile mwa lipilu za luna. Mañi ni mañi u swanela ku nyakisisa libaka la hae la ku lumela ku Mulimu. Mwendi litumelo ni mihupulo ye fosahezi ka za Mulimu ne li mi ezisize lika ze fosahezi kwamulaho. Kono zibo ye nepahezi ka za Mulimu i kona ku mi tusa ku itama silikani se si nde ni Mubupi, Jehova Mulimu.—1 Timotea 2:3, 4.

Ka tukiso ya bona ya ku ituta Bibele ni batu fa mandu ku si na tifo, Lipaki za Jehova ba sweli ku tusa batu ku ipumanela zibo ye nepahezi ka za Mulimu. (Mateu 28:20) Ba bañata ba ba amuhezi tuso yeo ba fitile fa ku lata Mulimu mi ba hulisize tumelo sakata ku yena. Ka tuto ya Bibele, ba ipumanezi “butali ni buitemuso” ze ba tusa ku ‘zamaya ba nze ba tiile’ mwa mazazi a, a t’ata. (Liproverbia 3:21-23) Fahalimw’a zeo kaufela, ba na ni sepo “ye tiile” ya bupilo bwa kwapili. (Maheberu 6:19) Ni mina mwa kona ku ba ni tumelo ya niti ni ku ikola limbuyoti zeo.

[Mbokisi fa likepe 6]

Lipuzo Ze Kataza Ze Ne Tokwa Likalabo

“Ha ne ni nze ni ituta bualafi mwa sipatela, ne ni boni batu ba bande ha ba kula ni ku nyanda hahulu. Haiba Mulimu u teñi, ki kabakalañi ha ku na ni manyando? Kana bulapeli ki nzila fela ya ku fumana ka yona mombecima?”—Ya n’a banga mwa keleke ya Presbyterian mwa Korea.

“Ne ni sa zibi kuli moyo wa bondate be ne ba li macakolwa ne u ile mwa lihele kamba kwa lihalimu. Ne ni saba hahulu bafu ni lihele. Ne ni sa utwisisi libaka Mulimu ya lilato ha n’a cisa batu mwa mulilo wa lihele kamita-ni-mita.”—Ya n’a banga Mukatolika mwa Brazil.

“Ki sifi se si ka ezahala kwa lifasi ni batu kwapili? Batu ba ka kona ku pila cwañi ku ya ku ile? Batu ba ka pila cwañi mwa kozo ya niti?”—Ya n’a banga Mukatolika mwa Germany.

“Ne ni sa utwisisi tuto ya kuli batu ba fetuhanga lifolofolo. Lifolofolo ha li lapeli, kacwalo mutu ha n’a ka fetuha folofolo kabakala libi za hae, n’a ka lukisa cwañi lika ni ku zwa mwa muinelo wo?”—Ya n’a banga Muhindu mwa South Africa.

“Ne ni hulezi mwa lubasi lwa balapeli ba Confucius, mi ne lu ezanga mikiti ya ku ombalisa bokukululu ba ba shwile. Ha ne ni lukisanga tafule ya matabelo ni ku kubama, ne ni kakanyanga haiba bokukululu ba ba shwile ne ba tahanga ku t’o ca lico ni ku bona mo lu kubamela.”—Ya n’a banga mwa bulapeli bwa Confucius mwa Korea.

Batu bao kaufela ne ba fumani likalabo kwa lipuzo za bona ha ne ba itutile Bibele ni Lipaki za Jehova.