Lipuzo Ze Zwa kwa Babali

Ka nako ya ku tasezwa ni ku sinyiwa kwa Jerusalema, Ezekiele n’a bile “simumu” ka kutwisiso mañi?

Sihulu, ki ka kutwisiso ya kuli n’a si na ze ñwi za ku ekeza kwa lushango lwa Jehova lwa bupolofita lwa n’a file kale.

Mupolofita Ezekiele n’a kalile sebelezo ya hae sina mulibeleli ya sepahala wa Maisilaele be ne ba hapilwe mwa Babilona ka 613 B.C.E, ha se ku felile “myaha iketa-lizoho isamba mulena Jojakini a isiwa mwa butanga.” (Ezekiele 1:2, 3) Fa lizazi la bu 10 la kweli ya bu 10 ya silimo sa 609 B.C.E., n’a zibisizwe ka moya wa Mulimu kuli Mababilona ne ba kalile ku taseza Jerusalema. (Ezekiele 24:1, 2) Ne ku ka zwañi mwa ku tasezwa k’o? Kana Jerusalema ni bayahi ba yona ba ba si na tumelo ne ba ka banduka? Ka ku ba mulibeleli, Ezekiele na s’a bulezi kale lushango lwa Jehova lo lu nongile lwa kozi, mi Ezekiele n’a sa tokwi ku ekeza ze ñwi hape, kuli mwendi lushango l’o lu be lo lu kolwisa ni ku fita. Ezekiele n’a bile simumu ku za litaba ze ñwi za ku tasezwa kwa Jerusalema.—Ezekiele 24:25-27.

Likweli ze silezi hamulaho wa ku sinyiwa kwa Jerusalema ka 607 B.C.E., ya bandukile n’a til’o zibisa Ezekiele mwa Babilona ka za ku sinyiwa kwa munzi o kenile. Manzibwana pili ya bandukile y’o a si ka fita, Jehova “n’a mumutuluzi mulomo wa [Ezekiele], . . . mi [n’a] lisezi ku ba simumu.” (Ezekiele 33:22) Kezo yeo ne i felisize bumumu bwa Ezekiele.

Kana Ezekiele n’a li simumu luli ka nako yeo? Kwa iponelwa kuli ha ku cwalo, kakuli niha n’a li cwalo “simumu,” n’a polofitile sihulu ka za linaha ze n’e li mabapa ze n’e tabile bakeñisa ku sinyiwa kwa Jerusalema. (Ezekiele, likauhanyo 25-32) Kwa makalelo a musebezi wa Ezekiele wa bupolofita ni wa bulibeleli, Jehova n’a mu bulelezi kuli: “Ni ka kumaleza lilimi la hao mwa hanu kwahalimu, u palelwe ku bulela, u fetuhe simumu, kuli u si ke wa ba mukalimeli wa bona; kakuli ki lusika lwa baikuhumusi. Kono ha ni ka bulela ni wena, ni ka mumutula mulomo wa hao.” (Ezekiele 3:26, 27) Jehova ha n’a si na lushango kwa Isilaele, Ezekiele n’a ka zwelapili ku ba simumu kwa sicaba seo. Ezekiele n’a na ni ku bulela za n’a bata Jehova kuli a li bulele, ka nako ya n’a bata Jehova. Bumumu bwa Ezekiele ne bu talusa kuli n’a li simumu ku za ku bulela manzwi a bupolofita kwa Maisilaele.

Sitopa sa kacenu sa mulibeleli, bona Bakreste ba ba tozizwe, se ba lemusize ka za ku timezwa kwa Krestendomu, ye swanisezwa ki Jerusalema. “Ñalelwa ye tuna” ha i ka tumbuka ni ku sinya “Babilona yo mutuna,” yona kopano ya lifasi ya bulapeli kamukana bwa buhata, sitopa sa batoziwa se si swanisezwa ki Ezekiele ha si na ku tokwa ku bulela ze ñwi hape ka za ku timezwa kwa Krestendomu, yona kalulo ye tuna ya kopano yeo.—Mateu 24:21; Sinulo 17:1, 2, 5.

Ee, lizazi la taha f’o bomasiyaleti ba ba tozizwe ni balikani ba bona ba ka ba limumu, ba si na ze ñwi hape za ku bulelela Krestendomu. Ka nako yeo, “makana a lishumi” ni “sibatana” li ka shandaula Babilona yo mutuna ni ku mu tubulisa. (Sinulo 17:16) Kono f’o ha ku talusi kuli Bakreste ba ka ba limumu luli. Mane sina ha ba eza cwalo kacenu, ba ka lumbeka Jehova ni ku mu bulela ka zazi kwa “masika kaufela a’ sa ta.”—Samu 45:17; 145:2.