Masima A’ Sa Buluki Mezi

MWA miteñi ya ze mwa Bibele, batu ne ba yepanga masima sihulu kuli ba bulukele teñi mezi. Ka linako ze ñwi mwa Naha ya Sepiso, n’e li fela ona a n’a itusiswa kwa ku bulukela teñi mezi.

Mupolofita Jeremia ha n’a ñola katulo ya Mulimu, n’a bulezi ka swanisezo ka za masima, kuli: “Sicaba sa ka si ezize libi ze peli; ba ni tobohile, na, liweluwelu la mezi a’ pilisa; mi ba ikepezi masima, kono ki masima a’ na ni mandala, a’ sa buluki mezi.”—Jeremia 2:13.

Ha se ba fulalezi Mulimu wa bona, Jehova—yena “liweluwelu la mezi a’ pilisa”—Maisilaele ne ba sikuluhezi kwa ku itama bulikani ni macaba a mahedeni, ili bulikani bo ne bu shekesha bwa ku tusiwa mwa ndwa. Hape ne ba sikuluhezi ni kwa ku lapela milimu ya buhata ye si na m’ata. Ka mwa n’a bulelezi Jeremia, libaka ze cwalo ze n’e twi ki za masabelo ne li bile fela masima a’ na ni mandala, a n’a sa koni ku sileleza.—Deuteronoma 28:20.

Kana ku na ni se lu kona ku ituta kacenu kwa mutala wa kwaikale w’o? Ka mo ne ku inezi mwa miteñi ya Jeremia, Mulimu wa kamita, Jehova, i sa li yena a nosi Simbule sa mezi a bupilo. (Samu 36:9; Sinulo 4:11) Ki yena fela, ka Jesu Kreste, Mwan’a hae, ya kona ku fa batu bupilo bo bu sa feli. (Joani 4:14; 17:3) Niteñi, sina batu ba mwa miteñi ya Jeremia, batu ba bañata-ñata kacenu ba keta ku hana, mane ni ku keshebisa, linzwi la Mulimu ka mo li ñolezwi mwa Bibele. Kono ba itinga fa litatululo za bupolitiki ni fa mihupulo ya mbango ya batu ye nyefulisa Mulimu. (1 Makorinte 3:18-20; Makolose 2:8) Ki mañi ye mu ka sepa? Kana ikaba Jehova, yena “liweluwelu la mezi a’ pilisa,” kamba kana ikaba “masima a’ na ni mandala, a’ sa buluki mezi”? Ha ku na ku kakanya.

[Siswaniso se si fa likepe 32]

Siswaniso sa Terra-cotta, mulimu wa musali se ne si fumanwi mwa libita la Muisilaele

[Manzwi a bañi ba siswaniso]

Siswaniso si ngilwe ka tumelezo ya ba British Museum