Ze Ba Yelanga kwa Keleke

“MWA Republic of Korea cwale se ku na ni ba keleke ya Presbyterian ba bañata ku fita mwa America.” Mwendi manzwi ao a mwa magazini ye bizwa Newsweek ne a komokisize babali ba bañata, kakuli buñata ba nahana kuli bulapeli bo bu tumile mwa Korea ki bwa Confucius ni bwa Sibuddha. Kacenu mupoti u ka fumana likeleke ze ñata ze twi ki za Sikreste mwa Korea, mi hañata li zibwanga ka sifapano se si beilwe teñi se si tuka malaiti. La Sunda ni la Sunda batu ba zamayanga mwa bubeli kamba mwa bulalu, ba shimbile Libibele mwa mazoho, ba ya kwa keleke. Ka ku ya ka patisiso ya mwa 1998, palo ye bat’o eza 30 pesenti ya ba kwa Korea ki ba keleke ya Katolika kamba ya Protestanti, mi palo yeo i fita ya ba ba twi ki Mabuddha.

Kacenu kwa komokisa ku bona batu ba bañata cwalo kai ni kai ba ya kwa keleke kamita. Kono seo ki sona luli se si sweli ku ezahala isi fela mwa Korea kono ni mwa linaha ze ñwi za kwa Asia, Africa ni Latin America. Ki kabakalañi batu ba bañata cwalo ha ba sa lumela ku Mulimu ku si na taba ni kuli mwa lifasi ku na ni moya wa ku sa isa pilu ku za bulapeli? Ze ba yelanga kwa keleke ki lika mañi?

Patisiso ye ne ezizwe ne i bonisize kuli buñata bwa balapeli ba kwa Korea ba bata buiketo; ba bañwi ba bañata ba bata bupilo bo bu sa feli hamulaho wa lifu; mi ba bañwi bona ba bata buikangulo, sifumu, ni ku kondisa lika.

Ba bañata kwa China ba yanga kwa keleke kuli ba kolwise linyolwa la bona la za kwa moya le li tisizwe ki cinceho ya puso ya naha—ye cincize ku zwa ku ye susueza ku eza lika hamoho ku ya ku ye susueza za ku iponela. Ka silimo ni silimo, Libibele ze ñata-ñata za hatiswa ni ku hasanyiwa mwa China, mi batu ba hanelela ku bala hahulu Bibele sina mo ne ba balelanga kabuka ka kafubelu ka Mao.

Makatolika ba bañwi mwa Brazil, sihulu banana kwateñi, ha ba tabeli fela ku utwa za kuli ku ka ba ni bupilo bo bunde kwapili—ba  bata bupilo bo bunde honafa. Magazini ye bizwa Tudo i li: “Mwa ma-1970 batu ne ba selehanela kwa keleke ka libaka la ku bata tukuluho, kono kacenu ki kabakala ku bata bupilo bo bunde.” Mwa patisiso ya kwa Britain, balapeli ne ba kupilwe ku bulela nto i liñwi ye ne ba lata ka za keleke ya bona. Buñata ne ba ize ki siango ni ba bañwi.

Zeo kaufela li bonisa kuli nihaike kuli ba bañwi ba sa lumela ku Mulimu, buñata ba nahana hahulu ze ba kona ku fumana cwale ku fita ku nahana za kwapili, kamba mane za Mulimu ka sibili. Mina mu nahana kuli libaka le li swanela la ku lumela ku Mulimu ki lifi? Bibele i bulelañi fa taba ye? Mu ka fumana kalabo mwa taba ye tatama.