Piho ya Bashaeli ba Mubuso

Ze N’e Bonisizwe Fa Televishini Ne Li Tahisize Kuli A Lumbeke Mulimu

MUAPOSITOLA Paulusi n’a bulezi kuli “ba bañwi ba bulela Kreste ka muna ni ka kañi; kono ba bañwi ba mu bulela ka lipilu ze nde.” (Mafilipi 1:15) Fokuñwi, nihaiba ba ba lika ku sinya batu ba Jehova libizo ba tahisize ka ku sa lela kuli batu ba ba lata niti ba i fumane.

Mwa November 1998, fa Televishini ya mwa France, ne ku bonisizwe maswaniso a Betele, ili miyaho ya mutai wa Lipaki za Jehova o kwa Louviers, mwa France. Nihaike ze n’e bulezwi n’e li ze shutana-shutana, ne li tahisize ze nde ka ku sa libelela.

Ku be ne ba buhile tukiso yeo ne ku na ni Anna-Paula, ya n’a pila likilomita ze 60 fela ku zwa fa Betele. Anna-Paula, ya na ni bana ba babeli, ili y’o linyalo la hae ne li felile, n’a bata musebezi. Kacwalo, lizazi le li tatama kakusasana, a lizeza luwaile kwa Betele ku buza haiba n’a kona ku fumana teñi musebezi. N’a ize: “Ne ni nga kuli ki sibaka se sinde, mi musebezi o eziwa teñi ki wa butokwa.” N’a komokile hahulu ha n’a utwile kuli bote ba ba sebeza fa Betele ki likombwa ba ba fanile nako ya bona! Hamulaho wa ku buhisana ka bukuswani ka za misebezi ya Lipaki za Jehova, a lumela ku t’o potelwa ki Paki.

Léna, sikombwa wa ka nako kaufela mwa puteho ye n’e li bukaufi, ha n’a il’o pota, ba ambolisana ka nako ye telele, mi Anna-Paula a amuhela buka ya Zibo Ye Isa kwa Bupilo bo Bu Sa Feli. * Fa puhisano ye tatama, Anna-Paula n’a s’a felize ku bala buka yeo mi n’a na ni lipuzo ze ñata. Honaf’o a lumela ku ituta Bibele. Anna-Paula n’a ize: “Ku na, yeo ne li kolo ya ku ziba Linzwi la Mulimu. Ne li lona lwa pili ni swala Bibele.”

Mwa January, Anna-Paula a y’o pota kwa Betele, mi viki ye tatama, a ya lwa pili kwa mikopano ya Sikreste. Nakonyana ku zwa f’o, a kala ku ituta Bibele ni bana ba hae ni ku paka kwa balikani ba hae. U li: “Ne ni sa koni ku ipulukela ze ne ni ituta. Ne ni bata ku taluseza batu niti ya mwa Bibele ni ku ba omba-omba.” Ha s’a ezize ka t’ata ku tula butata bo buñata bwa ka butu, Anna-Paula a kalisa ku yanga kamita kwa mikopano. A eza zwelopili ka bubebe mi a kolobezwa la May 5, 2002.

Hape, kabakala kuli Anna-Paula n’a li mutala o munde mi n’a kutaza ka cisehelo, bom’ahe ba kala ku ituta Bibele, mi hamulahonyana ba kolobezwa. Anna-Paula u li: “Ha ku na manzwi a’ kona ku talusa tabo ya ka. Ka zazi ni itumela ku Jehova kuli ni fitile fa ku mu ziba mi ni itumela kwa limbuyoti kaufela z’a ni file.”

[Litaluso za kwatasi]

[Maswaniso a fa likepe 8]

Fahalimu: Anna-Paula

Kwatasi: Makenelo a ofisi ya mutai mwa France