Ba Ba Feza kwa Sikolo sa Giliadi Ba Susuezwa ku Bulela “Ze Tuna”

LA SEPTEMBER 13, 2003, sikwata sa batu b’a 6,635 ba ba zwa mwa linaha ze 52 ne ba fumanehile kwa mukiti wa sitopa sa bu-115 wa ku feza Sikolo sa Giliadi sa Bibele sa Watchtower.

Ne ba utwile susuezo ye zwelela mwa Bibele ye n’e filwe kwa baituti b’a 48 ya kuli ba yo bulela “ze tuna za Mulimu” kwa batu ba mwa linaha ze 17. (Likezo 2:11) Mwa linaha m’o ki mona mo ne ba ka yo ezeza musebezi wa bona wa bulumiwa.

Mwa manzwi a hae a ku kwalula, Stephen Lett, yo muñwi wa ba Sitopa Se Si Etelela sa Lipaki za Jehova, ya n’a li yena muina-situlo wa mukiti, n’a hupulisize baituti kuli: “Ha mu ka ya ko mu yo sebeleza kaufela, mwa miinelo kaufela ye mu ka yo ba ku yona, mu hupule kuli ba ba li ni mina ki ba bañata ku fita ba ba mi lwanisa.” Ka ku itusisa 2 Malena kauhanyo ya 6, Muzwale Lett n’a hupulisize baituti kuli, ha ba nze ba bulela “ze tuna za Mulimu,” ne ba kona ku itinga kwa tuso ya Jehova Mulimu ni mangeloi a mañata-ñata. (2 Malena 6:15, 16) Bakreste ba kwa makalelo ne ba lwanisizwe ni ku sa iswa pilu mwa musebezi wa bona wa ku kutaza ni ku luta, mi ku cwalo ni kwa balumiwa ba Sikreste kacenu. Kono ba kona ku itinga kwa tuso ya kwa lihalimu ni kwa kopano ya Jehova ya fa lifasi.—Samu 34:7; Mateu 24:45.

Mu Bulele “Ze Tuna za Mulimu”

Muina-situlo ha s’a bulezi manzwi a ku kwalula, Harold Corkern, wa Katengo ka Mutai wa United States n’a file ngambolo ye li “Litibelelo Ze Lukile Li Tusa kwa ku Kondisa ni ku Ba ni Tabo mwa Sebelezo.” Muzwale Corkern n’a talusize kuli, ka mo i boniseza Liproverbia 13:12, sepo ye sa talelezwi i tahisa maswabi. Niteñi, maswabi hañata a tahiswanga ki litibelelo ze si ka luka ze sa talelezwi. Ba ba feza sikolo ba tokwa ku ipona ni ku bona ba bañwi ka nzila ye itikanelezi, ye swanela. Ba swanela ku libelela kuli ba ka eza mafosisa, kono h’a lukeli ku ba swabisa hahulu ha ba nze ba lika ku tusa ba bañwi ku utwisisa “ze tuna za Mulimu.” Muzwale Corkern n’a susuelize balumiwa ba banca ku itinga ku Jehova, yena “ya fa ba ba mu bata mupuzo.”—Maheberu 11:6.

Mubuleli ya tatama ne li Daniel Sydlik, yo muñwi wa ba Sitopa Se Si Etelela, mi n’a file ngambolo ye li “Sepo ya Sikreste Ki Nto Mañi?” N’a ize: “Ku ba ni sepo ki mukwa o munde wa Sikreste. Sipimo sa ze lukile si konisa mutu ku ba ni bulikani bo bunde ni Mulimu. Mutu ya si Mukreste h’a koni ku ba ni sepo ye lu na ni yona.” Muzwale Sydlik a talusa likalulo ze shutana-shutana za sepo ya Sikreste ze kona ku tusa mutu ku zwelapili ku ba ni mubonelo o munde bupilo niha bu tatafala. “Ha lu na ni sepo, lu kona ku ba ni m’ata ni moya wa ku  kona ku tula mwa bupilo.” Sepo ya Mukreste i kona ku mu tusa ku bona Jehova sina Mulimu wa milelo ni ku ba ni tabo mwa ku mu sebeleza.—Maroma 12:12.

Wallace Liverance, yena muñoli wa Sikolo sa Giliadi, n’a susuelize baituti kuli ba “Zwelepili ku Zamaya ka Moya.” (Magalata 5:16) N’a bonisize m’o Baruki, muñoli wa Jeremia, n’a batil’o keluhela mwa ku zamaya ka moya. Nako ye ñwi, Baruki n’a katezi mi a kala ku ipatela ze tuna. (Jeremia 45:3, 5) Muzwale Liverance a talusa kuli ba bañwi ne ba tuhezi ku latelela Jesu mi ne ba hanile niti ya kwa moya, ye tahisa puluso. Ne ba ezize cwalo kakuli ne ba sa utwisisi za n’a luta, mi ne ba si ka tabela kuli litibelelo za bona za butu ne li si ka talelezwa ka nako yeo. (Joani 6:26, 27, 51, 66) Balumiwa, bao musebezi wa bona ki wa ku hohela mamelelo ya batu ku Mubupi ni milelo ya hae, ba kona ku itutañi kwa litaba zeo? Baituti ne ba susuelizwe kuli ba si ke ba iyakatwa libubo, ku pahamiswa ki batu, kamba ku itusisa musebezi wa Sikreste kwa ku ipumanela za ka butu.

Mark Noumair, muluti wa kwa Sikolo sa Giliadi, n’a buzize puzo ye li, “Kana Mu Ka Ba Bafani Kamba Baamuheli?” Za n’a bulezi ne li zwelela kwa Baatuli 5:2, k’o Maisilaele ba bañwi  ne ba babalizwe kakuli ne ba ifanile ku ba mwa mpi ya Baruki. Baituti ba Giliadi ne ba babalizwe kakuli ne ba amuhezi memo ya Baruki yo Mutuna, yena Jesu Kreste, ya ku abana hahulu mwa ndwa ya kwa moya. Masole ba Kreste ba swanela ku iyakatwa ku tabelwa ki yena ya ba kenyize mwa ndwa. Muzwale Noumair n’a hupulisize baituti kuli: “Ha lu kala ku isa hahulu pilu ku ze lu bata, lu tuhela ku lwanisa sila. . . . Sebelezo ya bulumiwa ha i ezezwi mina. I ezezwa Jehova, bubusi bwa hae, ni ku petiwa kwa tato ya hae. Ha lu ezi sebelezo ya bulumiwa ka ku bata kuli Jehova a lu tabise, kono lu mu sebeleza kakuli lwa mu lata.”—2 Timotea 2:4.

Ku tuha f’o, Lawrence Bowen, muluti wa kwa Sikolo sa Giliadi a zamaisa puhisano ye li “U Ba Fe ku Ikenisa ka Niti.” (Joani 17:17) N’a talusize kuli baituti ba sitopa sa bu-115 ki likombwa za Mulimu ba ba kenile. Ha ne ba kena sikolo, ne ba abanga mwa bukombwa bwa mwa simu, ili ku bata batu ba lipilu ze nde ba ba lata niti. Sina Jesu ni balutiwa ba hae ba kwa makalelo, baituti ne ba sa ‘ipuleleli fela.’ (Joani 12:49, 50) Ne ba fitisa ka cisehelo taba ya niti ye pilisa, ye tahile ka moya wa Mulimu. Liponiso ni makande a baituti ne li bonisize kuli Bibele ne i amile hahulu batu be ne ba ambozi ni bona mwa simu.

Kelezo ni Yeloseli Za Susumeza

Anthony Pérez ni Anthony Griffin, ba ba sebeza mwa Likolo la Sebelezo kwa mutai wa kwa United States, ne ba buhisani ni lilama za Tutengo twa Mitai ya mwa linaha ze ñwi. Mizwale bao ne ba talusize butata b’o balumiwa ba banca ba fumananga mi ne ba file likelezo ze sebeza ka ku ya ka yeloseli ye ba bile ni yona. Butata bo buñwi ki ku shutana kwa lizo, ku cisa silimo mutumbi, kamba muinelo wa za bulapeli kamba za bupolitiki o shutana ni o ba twaezi baituti. Balumiwa ba banca ba ka kona ku pila cwañi mwa libaka ze nca? Ba ka tusiwa ki ku lata Jehova, ku lata batu, ku sa talima kwamulaho, ni ku nahana ba si ka eza kale lika. Yo muñwi wa mwa katengo ka mutai n’a ize: “Batu ba ko lu sebeleza ba pilile teñi ka lilimo-limo. Kaniti, ni luna lwa kona ku pila teñi ni ku twaela. Fo lu bela ni butata kaufela, lu b’a nga kuli ki bona batiisi ba luna. Ha mu itinga fa ku lapela ni fa moya wa Jehova, manzwi a Jesu a’ li, “Ni inzi ni mina,” a sebeza luli.—Mateu 28:20.

Ngambolo ye tuna ya tukiso ye li, “Mu Zwelepili ku Bulela Ze Tuna za Mulimu,” ne i filwe ki Samuel Herd, yo muñwi wa ba Sitopa Se Si Etelela. Fa Pentekonta ya 33 C.E., balutiwa ba Jesu ha ne ba sululezwi moya o kenile, ne ba filwe m’ata a ku bulela “ze tuna za Mulimu.” Balumiwa ba banca kacenu ba kona ku tusiwa kiñi ku bulela Mubuso wa Mulimu ka cisehelo ye swana? Ba kona ku tusiwa ki ona moya o swana o kenile. Muzwale Herd n’a susuelize baituti be ne ba feza sikolo kuli ba “be ni ku tukufalelwa mwa moya,” ku tabela musebezi wa bona, ba sa libali tuto ye ba filwe. (Maroma 12:11) Muzwale Herd n’a ize: “Bibele ki nto ye tuna ya Mulimu. Ni kamuta mu si ke mwa keshebisa butokwa bwa yona. Litaba ze ku yona ki ze pila. Li fita kwa likalulo za butokwa za litaba. Mu itusise yona kwa ku lukisa za bupilo bwa mina. I cince munahanelo wa mina. Mu babalele munahanelo wa mina ka ku ituta, ku bala, ni ku yeya Mañolo . . . Mulelo wa mina o mu ka tundamena ibe wa ku itusisa tuto ye mu fumani kwa Giliadi kwa ku zwelapili ku bulela ‘ze tuna za Mulimu.’

Hamulaho wa ku baliwa kwa litumeliso ze zwelela kwa linaha ze ñwi, ni ku fiwa kwa mapampili a ku kwaza, a li muñwi ku ba ba feza sikolo a bala liñolo le li ñozwi ki ba mwa sitopa, ili ku fitisa buitebuho kwa tuto ye ba filwe. Muzwale Lett kih’a fitisa mukiti wa tabo w’o kwa mafelelezo ka ku bala 2 Makolonika 32:7 ni Deuteronoma 20:1, 4. Ka ku kutela manzwi a hae a ku kwalula, a feza ka ku bulela kuli: “Kacwalo mina ba ba feza sikolo, ha mu funduka, ha mu kena mwa ndwa ya kwa moya ko mu yo sebeleza, mu hupule kuli Jehova u ka zamaya ni mina. Mu si libali ni kamuta kuli ba ba li ni mina ki ba bañata ku fita ba ba mi lwanisa.”

[Mbokisi fa likepe 25]

LITABA KA ZA SITOPA

Palo ya linaha ko ba zwa baituti: 7

Palo ya linaha ko ba lumezwi: 17

Palo hamoho ya baituti: 48

Avareji ya lilimo za buhulu: 33.7

Avareji ya lilimo za ku ba mwa niti: 17.8

Avareji ya lilimo za ku ba mwa bukombwa bwa ka nako ye tezi: 13.5

[Siswaniso se si fa likepe 26]

Sitopa Sa bu-115 Se Si Feza Sikolo sa Giliadi sa Bibele sa Watchtower

Mwa mukoloko o kwatasi, milaini i baliwa ku zwa kwapili ku kuta kwamulaho, mi mabizo a kolohanyizwe ku zwa kwa nzohoto ku ya kwa bulyo mwa mulaini o muñwi ni o muñwi.

(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.