Lubasi lwa Jesu—Ne Li Bomañi?

MWA libaka ze ñata za lifasi ili mwa kweli ya December, hañata mu bonanga liponiso za Jesu wa mbututu a li mwa mazoho a mahe, yena Maria, ni Josefa, ndat’ahe wa muañuli. Nihaiba ba ba sa ipizi Bakreste ba kana ba tabela liponiso za lubasi ze cwalo. Bakeñisa kuli makanatelo ki Jesu, Mañolo a lu bulelelañi ka za lubasi lwa Jesu lwa fa lifasi?

Situhulu sa Jesu ne li se si ipitezi luli. N’a pepilwe ki mwalyanjo wa libizo la Maria, ili ku ba yo muñwi wa batu ba fa lifasi. Ka ku ya ka Bibele, bupilo bwa hae ne bu shimbuluzwi kwa lihalimu ni ku kenywa mwa mba ya Maria ka moya o kenile. (Luka 1:30-35) Ku si ka zibahazwa kale za ku itwalwa kwa Jesu kwa ka makazo, Maria n’a beelelizwe ki munna wa libizo la Josefa, ya n’a ka t’o ba yena muañuli wa Jesu.

Jesu ha s’a pepilwe, Josefa ni Maria ba pepa bana ba bañwi, bona banyani ba Jesu ku bom’ahe. Ki mona mo i boniseza puzo yeo Manazareni ne ba til’o buza ka za Jesu, ye li: “Yo, hasi yena mwan’a mupangi? Ha lu li, m’ahe ki ya bizwa Maria, mi banyani ba hae ki Jakobo, ni Josefa, ni Simoni, ni Juda? Mi likaizeli za hae hasi ba, ba mo ku luna kaufela?” (Mateu 1:25; 13:55, 56; Mareka 6:3) Seo si lu bonisa kuli lubasi mwa n’a pepezwi Jesu ne lu kopanyeleza bashemi ba hae, banyani ba hae ba bane, ni likaizeli ze peli kamba ku fitelela.

Nihakulicwalo, ba bañwi kacenu ha ba lumeli kuli banyani ba Jesu ne li bana ba Josefa ni Maria. Libaka? Hatiso ya New Catholic Encyclopedia i li: “Keleke ku zwa kwa simuluho ne i luta kuli Maria n’a bile kamanita mwalyanjo. Kacwalo, ki kabakaleo taba ya kuli Maria n’a si ka pepa bana ba bañwi i sa konwi ku hononiwa.” Hatiso yeo hape i li manzwi a Sigerike a tolokilwe kuli “munyani” ni “kaizeli” a’ kona ku talusa “mutu kamba batu ba ba mwa bulapeli bo bu swana kamba swalisano ye ñwi” kamba bahabo mutu, mwendi bana ba bahabo mushemi wa mutu.

Kana luli ku cwalo? Nihaiba licaziba za bulapeli bwa Katolika, ba ba hanyeza tuto yeo ya sizo, ba yemela taba ya kuli Jesu n’a na ni banyani ni likaizeli. John P. Meier, ya n’a banga mueteleli wa kopano ya Catholic Bible Association of America, n’a ñozi kuli: “Mwa [Testamente ye Nca] adelphos [linzwi la Sigerike le li talusa “munyani” kamba “muhulwani”], ha li sa itusiswi ka swanisezo kono kuli li bonise buhabo bwa ka taho kamba bwa ka mulao, li talusa fela munyani kamba muhulwan’a mutu, ibe ku mushemi a li muñwi kamba sibeli sa bashemi.” * Ee, Mañolo a bonisa kuli Jesu n’a na ni banyani ni likaizeli bao Maria ni Josefa ne ba pepile.

Libuka za Evangeli li bulela bahabo Jesu ba bañwi, kono cwale ha lu nyakisiseñi lubasi mwa n’a pepezwi Jesu mi lu bone ze lu kona ku ituta ku bona.

[Litaluso za kwatasi]