Kana Mulimu Wa Lu Babalela?

KANA mu kile mwa ipumana mwa muinelo o zinga munahano kabakala matata a mwa lubasi, a buikangulo, a kwa musebezi kamba a buikalabelo bo buñwi cwalo bo bu buima? Ba bañata ba ipumani mwa muinelo o cwalo. Ki bomañi kacenu ba ba sa amiwi ki ketululo, bukebenga ni mifilifili? Kaniti, kona mo i bulelela Bibele kuli: “Ze bupilwe kaufela li tonga hamoho, mi hamoho li utwa butuku bwa ku pepa ku fitela cwale.” (Maroma 8:22) Kona libaka batu ba bañata ha ba buzanga kuli: ‘Kana Mulimu wa lu babalela? Kana u ka lu tusa?’

Salumoni Mulena ya butali n’a lapezi ku Mulimu kuli: “Kakuli Wena, ki Wena u li nosi ya ziba lipilu za bana ba batu kamukana.” Salumoni n’a ziba kuli Mulimu haki ya lu ziba fela kono mane wa lu babalela ka buñwi. N’a konile ku kupa Mulimu kuli: “U utwe, u li mwa lihalimu” ni ku alaba litapelo za ya ku saba ya patulula “se si mu kataza, ni se si mu utwisa butuku.”—2 Makolonika 6:29, 30.

Kacenu, Jehova Mulimu u sa lu babalela mi u lu mema ku mu kupa ka t’ata ka tapelo. (Samu 50:15) U sepisa ku alaba litapelo ze zwelela kwa pilu ze lumelelana ni tato ya hae. (Samu 55:16, 22; Luka 11:5-13; 2 Makorinte 4:7) Ee, Jehova u teelezanga kwa ‘tapelo ni kupo y’a tahisa mutu kaufela, nihaili sicaba kamukana sa hae.’ Kacwalo, ha lu sepa Mulimu, ku mu kupa kuli a lu tuse, ni ku sutelela ku yena, lu ka babalelwa ni ku fiwa ketelelo ki yena. (Liproverbia 3:5, 6) Jakobo muñoli wa Bibele u lu kolwisa kuli: “Mu sutelele ku Mulimu mi u ka sutelela ku mina.”—Jakobo 4:8.