Lipuzo Ze Zwa kwa Babali

Ki miinelo ifi ye n’e tahisize kuli Juda a eze tobali ni musali ya n’a hupula kuli ki lihule, ka mo ku boniselizwe kwa Genese 38:15, 16?

Nihaike kuli Juda n’a ezize tobali ni musali ya n’a hupula kuli ki lihule, kaniti ne si lihule. Ka ku ya ka Genese kauhanyo 38, ne ku ezahezi cwana.

Mwan’a Juda wa mweli a si ka pepa kale ni Tamare, musal’a hae, n’a bulailwe kakuli “ne li mutu ya maswe fapil’a [Muñ’a] Bupilo.” (Genese 38:7) Ka nako yeo ne ku na ni tukiso ya kuli mbelwa a nyalwe ku wahabo mufu. Ne li swanelo kuli munna h’a shwa a si na mwana, muhabo yena a nyale mbelwa kuli a mu zwiseze lusika. Kono Onani, mwan’a Juda wa bubeli, a hana ku peta tamo yeo. Kacwalo, Mulimu a mu bulaya. Juda kih’a laela Tamare mukwenyan’a hae ku kutela ku bo ndat’ahe ku fitela Shela, mwan’a Juda wa bulalu a hula, kuli a kone ku mu nyala. Lilimo ha ne li nze li ya, Juda a palelwa ku nyalisa Tamare ku Shela. Kacwalo musal’a Juda ha sa shwile, Tamare a lela ku ipumanela mwana ka Juda, mukwenyan’a hae wa Muisilaele. N’a petile mulelo wa hae ka ku ipumisa ku ba lihule ni ku ina kwatuko a nzila ya n’a ziba kuli ki yona ya n’a ka fita Juda.

Ka ku sa ziba kuli ne li Tamare, Juda a eza tobali ni yena. Ka butali, Tamare a’ nga ku yena libyana za swalele kabakala tobali ya na ezize ni yena, mi ka libyana zeo hasamulaho n’a file bupaki bwa kuli n’a itwezi ka yena. Juda h’a sa zibile buniti bwa taba, n’a si ka mu fa mulatu kono ka buikokobezo n’a ize: “U lukile ku fita na, kakuli ha ni si ka mu fa Shela mwan’a ka.” Mi ka swanelo, “h’a si ka kutela ku yena.”—Genese 38:26.

Juda n’a fosize kakuli n’a si ka nyalisa Tamare ku Shela mwan’a hae, sina mwa n’a sepiselize. Hape n’a ezize tobali ni musali ya n’a hupula kuli ki lihule. Za n’a ezize ne li sa lumelelani ni mulelo wa Mulimu wa kuli tobali i be fela mwa linyalo. (Genese 2:24) Kono luli, Juda n’a si ka eza tobali ni lihule. Ka ku sa lemuha, n’a ngile sibaka sa Shela mwan’a hae sa ku nyala musal’a mufu, mi kacwalo n’a tahisize bana ka mulao.

Tamare yena n’a si ka eza buhule. Bana ba hae ba mambile ne ba si bana ba mwa bucwañi. Boazi wa kwa Betelehema h’a n’a nyezi Mumoabi Ruti ka sizo sa ze swanela mwanahabo, banna-bahulu ba kwa Betelehema ne ba babalize Perezi mwan’a Tamare ka ku bulelela Boazi kuli: “Ba ndu ya hao ba likane ni ba ndu ya Perezi, ya n’a pepezwi Juda ki Tamare, ka bana b’a ka ku fa [Muñ’a] Bupilo ka kalibe yo.” (Ruti 4:12) Hape Perezi u mwa mukoloko wa bokukululu ba Jesu Kreste.—Mateu 1:1-3; Luka 3:23-33.