Lisepiso Ze Mu Kona ku Sepa

MIKA, mupolofita wa Mulimu, n’a zibile kuli lisepiso hañata ha li bangi ze sepeha. Mwa miteñi ya hae, niheba mulikani yo mutuna hahulu n’a sa konwi ku sepiwa kamita kuli n’a ka buluka lisepiso za hae. Kacwalo Mika n’a lemusize kuli: “U si ke wa sepa mulikani, u si ke wa sepa ndambo; libelela minyako ya milomo ya hao fapil’a ya lobezi fa sifuba sa hao.”—Mika 7:5.

Kana Mika n’a tuhelezi muinelo o’ zwafisa w’o ku mu hononisa lisepiso kaufela? Batili! N’a bonisize sepo ye tuna mwa lisepiso za Mulimu wa hae, Jehova. Mika n’a ñozi kuli: “Haili na, ni ka talima ku [Muñ’a] Bupilo, ni libelele Mulimu ya ni pilisa.”—Mika 7:7.

Ki kabakalañi Mika ha n’a bile ni sepo ye cwalo? Kakuli n’a zibile kuli Jehova kamita w’a bulukanga lisepiso za hae. Zote za n’a itamile Mulimu ku bokukululu ba Mika ne li ezahalile. (Mika 7:20) Bakeñisa kuli Jehova n’a bulukile lisepiso za hae za kwamulaho, Mika n’a na ni  libaka le li utwahala la ku lumela kuli U ka buluka cwalo lisepiso za Hae za kwapili.

“Ha Ku Na Ye Ñwi . . . Ye Tokwahezi”

Ka mutala, Mika n’a zibile kuli Jehova n’a lamulezi Maisilaele kwa butanga bwa mwa Egepita. (Mika 7:15) Joshua, ya n’a bile yo muñwi wa be ne ba lamulezwi f’o, n’a susuelize Maisilaele ka yena kuli ba sepe ka ku tala lisepiso kaufela za Mulimu. Kabakalañi? Joshua n’a ba hupulisize kuli: “Mwa lipilu za mina kaufela, ni mwa maikuto a mina kamukana, mu ziba kuli kwa linto ze nde kaufela z’a mi sepisize [Muñ’a] Bupilo Mulimu wa mina, ha ku na niheba i li ñwi ye tokwahezi; kamukana li bonahalile ku mina, ha ku na ye ñwi ya zona ye tokwahezi.”—Joshua 23:14.

Maisilaele ne ba ziba hande kuli Jehova n’a ba ezelize lika ze makaza. Na s’a ezize za n’a sepisize kukw’a bona Abrahama ya n’a saba Mulimu, za kuli bana ba hae ne ba ka ba ba bañata inge linaleli mi ne ba ka luwa naha ya Kanana. Hape Jehova n’a bulelezi Abrahama kuli bana ba hae ne ba ka ba mwa manyando ka lilimo ze 400 kono ne ba ka kuta kwa Kanana “ka lusika lwa bune.” Zeo kaufela ne li ezahalile.—Genese 15:5-16; Exoda 3:6-8.

Maisilaele ne ba amuhezwi hande kwa Egepita mwa mazazi a Josefa mwan’a Jakobo. Hamulaho Maegepita ba ba tambisa h’a situhu mwa butanga, kono sina mwa n’a sepiselize Mulimu, mwa masika a mane a n’a tatamani ku zwa nako ye ba kena mwa Egepita, bana ba Abrahama bao ba lukululwa mwa butanga bwa Egepita. *

Mwa lilimo ze 40 ze n’e tatami, Maisilaele ne ba bile ni bupaki bo buñwi bwa kuli Jehova kamita w’a bulukanga lisepiso za hae. Maamaleke ha ne ba tumbuzi ndwa ya ku lwanisa Maisilaele ku si na y’a ba kalile, Mulimu n’a lwanezi batu ba hae ni ku ba sileleza. N’a ba bonezi ze ne ba tokwa kaufela kwa mubili mwa musipili wa bona wa lilimo ze 40 mwa lihalaupa mi kwa mafelelezo n’a ba file ku yaha mwa Naha ya Sepiso. Joshua ha n’a nyakisisize zeo Jehova n’a ezelize bana ba Abrahama bao, n’a konile ku bulela ka buikolwiso kuli: “Ha ku si ka tokwahala taba niheba i li ñwi ya ze nde z’a n’a bulelezi [Muñ’a] Bupilo bana ba Isilaele; kamukan’a zona za bonahala.”—Joshua 21:45.

Mu Be ni Buikolwiso mwa Lisepiso za Mulimu

Mu kona ku ba cwañi ni tumelo mwa lisepiso za Jehova, inge bo Mika ni Joshua? Mu fitanga cwañi fa ku sepa ba bañwi? Mu kala ka ku ba ziba hande ka mo ku konahalela. Ka mutala, mu kana mwa ziba ku itingwa kwa bona ka ku lemuha kuli ba likanga ku peta ka busepahali ze ba sepisa kaufela. Ha mu nze mu ziba hahulu batu bao, mu kala ku ba sepa hanyinyani-hanyinyani. Mwa kona ku eza nto ye swana ha mu bata ku lumela lisepiso za Mulimu.

Nzila ye ñwi ye mu kona ku eza cwalo ka yona ki ka ku kengeyela pupo ni milao y’e i zamaisa. Ba sayansi ba sepile hahulu milao  yeo, ye cwale ka milao ye zamaisa m’o selusi i liñwi ya mutu i ikabela ku ba ze ñata ili ku fita fa liselusi ze eza litrilioni ze mwa mubili wa mina. Mane, milao ye zamaisa mo li ezeza lika ni m’ata a mwa pupo kaufela i lukela ku ba ye n’e tomilwe ki Mupangi-wa-Mulao ya sepahala hahulu. Kaniti mwa kona ku sepa lisepiso za hae, sina mo mu sepezi milao ye zamaisa pupo ya hae.—Samu 139:14-16; Isaya 40:26; Maheberu 3:4.

Ka mupolofita Isaya, ya n’a pilile mwa mazazi a Mika, Jehova n’a itusisize ku zamaya hande kwa linako ni mupotoloho o’ makaza wa mezi kwa ku bonisa ku sepeha kwa linzwi la hae. Silimo ni silimo pula n’e nelanga. Ne i kolobisanga mubu mi ne i konisanga batu ku cala peu ni ku kutula ze beewa. Kacwalo, Jehova n’a ize: “Sina pula ni litwa ha li zwa kwa lihalimu, mi li sa kuteli kwateñi li si ka kolobisa lifasi, kuli li zwiseze mucali peu, ni muci buhobe, ki mo ku inezi ni kwa linzwi la ka, le li zwa mwa mulomo wa ka; ha li na ku kutela ku Na mukungulu, li si ka sebeza se si latwa ki Na, ni ku eza ze ni li lumezi.”—Isaya 55:10, 11.

Lisepiso za Paradaisi Ze Buniti

Ku nyakisisa pupo ku kona ku hulisa tumelo ku Mubupi, kono ku tokwahala ze ñwi haiba mu bata ku ituta ka za lisepiso z’e li kalulo ya “linzwi . . . le li zwa mwa mulomo wa [hae].” Kuli mu itute lisepiso zeo ni ku kona ku li sepa, mu tokwa ku tatuba litaba za mwa Mañolo ze tahile ka moya wa Mulimu ze ama milelo ya hae ka za lifasi ni za ezeza batu.—2 Timotea 3:14-17.

Mupolofita Mika n’a sepile lisepiso za Jehova. Mu na ni litaba za Mulimu ze ñata ku fita za n’a na ni zona Mika. Ha mu nze mu bala Bibele ni ku yeya ze i bulela, ni mina mwa kona ku sepa kuli lisepiso za Mulimu li ka petiwa. Lisepiso zeo ha li ami fela bana ba lusika lwa Abrahama kono li ama batu kamukana. Jehova n’a sepisize ñulukundi y’a saba Mulimu y’o kuli: “Macaba kamukana a lifasi a ka fiwa mbuyoti ka lusika lwa hao, kakuli u utwile linzwi la ka.” (Genese 22:18) Wa pili kwa “lusika,” kamba peu, ya Abrahama ki Mesiya, yena Jesu Kreste.—Magalata 3:16.

Ka Jesu Kreste, Jehova u ka bona teñi kuli limbuyoti z’a fiwa kwa batu ba ba ipeya ku utwa. Mi Mulimu u sepisize ku ezañi mwa nako ya luna? Mika 4:1, 2 i alaba ka manzwi a bupolofita a’ li: “Kwa mazazi a kwapili lilundu la [Muñ’a] Bupilo li ka tomwa fa ngo ya malundu, li ka umbuka tulundu; mi macaba kaufela a ka ya kwateñi. Macaba a mañata a ka ya, inz’a li: A mu te, lu kambamele fa lilundu la [Muñ’a] Bupilo, kwa Ndu ya Mulimu wa Jakobo; u ka lu luta linzila za hae, lu zamaye mwa makululu a hae.”

Ba ba ituta linzila za Jehova “ka mikwale ya bona ba ka tula mihuma, mi ka malumo a bona ba ka tula licekesi.” Mikwa kaufela ya lindwa i ka fela. Ona cwale-cwale fa, lifasi li ka tala batu ba ba lukile, mi ha ku na y’a ka ba sabisa. (Mika 4:3, 4) Linzwi la Mulimu li sepisa kuli mwa puso ya Mubuso o ka busiwa ki Jesu Kreste, Jehova u ka zwisa fa lifasi ba ba lunya kaufela.—Isaya 11:6-9; Daniele 2:44; Sinulo 11:18.

Niheba ba ba nyandile ni ku shwa bakeñisa bukwenuheli bwa mutu bwa ku kwenuhela Mulimu ba ka zusiwa kwa bafu ba na ni tibelelo ya ku pila ku ya ku ile fa lifasi. (Joani 5:28, 29) Satani ni badimona ba hae,  bona ba fuzeleli ba bumaswe, ha ba na ku ba teñi, mi ze tahiswa ki sibi sa Adama li ka zwiswa ka tiululo ya sitabelo sa Jesu. (Mateu 20:28; Maroma 3:23, 24; 5:12; 6:23; Sinulo 20:1-3) Mi ba ba ipeya ku utwa ba ka fiwa mupuzo mañi? Ba ka fiwa mbuyoti ya bupilo bo bu sa feli ka ku ba mwa buiketo bo bu petehile fa lifasi le li li paradaisi!—Samu 37:10, 11; Luka 23:43; Sinulo 21:3-5.

Zeo luli ki lisepiso ze makaza! Kono kana mwa kona ku li lumela? Ee mwa kona. Zeo haki lisepiso za batu ba ba kana ba lela ze nde kono ba palelwa ku ba ni m’ata a ku li peta. Ki lisepiso za Mulimu ya M’ata ote, y’a sa pumi ili ya sa “liyehisi lisepiso za hae.” (2 Pitrosi 3:9; Maheberu 6:13-18) Mwa kona ku sepa ka ku tala lisepiso kaufela ze mwa Bibele, kakuli li simuluha ku ‘Muñ’a Bupilo Mulimu wa niti.’—Samu 31:5.

[Litaluso za kwatasi]

[Manzwi a fa likepe 6]

“Kwa linto ze nde kaufela z’a mi sepisize [Muñ’a] Bupilo Mulimu wa mina, ha ku na niheba i li ñwi ye tokwahezi.”

—JOSHUA 23:14.

[Maswaniso a fa likepe 4, 5]

Jehova n’a bulukile lisepiso za hae ku Isilaele kwa Liwate Le Li Fubelu ni mwa lihalaupa

[Maswaniso a fa likepe 7]

Jehova n’a bulukile lisepiso za hae ku Abrahama. Lusika kamba peu ya hae, yena Jesu Kreste, u ka tisa limbuyoti kwa batu