‘Mulimu H’a Ini mwa Litempele Ze Ezizwe ka Mazoho’

KU SI na ku kakanya, muapositola Paulusi n’a ziba hande litempele za Atena, kakuli ne li fumaneha mwa minzi ya na potela ha n’a li mwa misipili ya hae ya bulumiwa. Ka ku ya ka The Encyclopædia Britannica, Atena n’a sa zibahali fela ka ku ba mulimu wa ndwa ni butali kono hape n’a tumile kabakala “misebezi ya bucaziba ya mazoho ha ne ku si na lindwa.”

Tempele ya Atena ye n’e tumile ne li Parthenon, ye n’e yahilwe mwa Atene, muleneñi wo n’o beilwe libizo la mulimu wa musali. Parthenon n’e ngiwa ku ba ye ñwi ya litempele ze tuna ka ku fitisisa mwa lifasi la kale, mi ku yona ne ku beilwe siswaniso sa Atena se si bupilwe fa gauda ni manaka a litou, sa butelele bo bu eza limita ze 12. Paulusi ha n’a potile mwa Atene, tempele yeo ye n’e kabisizwe ka macwe a masweu a marabulu ne se i bile yona muyaho o ipitezi mwa muleneñi m’o ka lilimo ze 500.

Inz’a talimezi tempele ya Parthenon, Paulusi n’a kutalize kwa sikwata sa batu ba kwa Atene ka za ‘Mulimu ya sa ini mwa litempele ze ezizwe ka mazoho.’ (Likezo 17:23, 24) Ku be ne ba teeleza ku za n’a bulela Paulusi, mwendi ku kateleha kwa tempele ya Atena kamba butuna bwa maswaniso a hae ne li mu bonahalisa ku ba ya ipitezi ku fita Mulimu ya sa bonwi ye ne ba sa zibi. Kono sina mwa n’a bulelezi Paulusi, ha ku lukelwi ku hupulwa kuli Mubupi wa batu kamukana ‘u swana sina gauda kamba silivera, kamba licwe, ili ze betilwe ki mutu.’—Likezo 17:29.

Milimu ye cwale ka Atena—yeo ku tuma kwa yona ne ku itingile fa litempele ni maswaniso—se i bile teñi mi ha i sa li yo. Siswaniso sa Atena ne si zwisizwe mwa Parthenon mwa lilimo za ma-600 C.E., mi ki libaka ze nyinyani fela ze sa fumaneha fo ne li yahilwe litempele za hae. Kacenu ha ku na ya sa itinga fa butali ni ketelelo ya Atena.

Kwa shutana luli ni Jehova, “Mulimu Ya sa feli” ili ya sa bonwi ki batu. (Maroma 16:26; 1 Joani 4:12) Bana ba Kora ne ba ñozi kuli: “Mulimu ya bulelwa mo, ki Yena Mulimu wa luna wa kamita ni ku ya ku ile; ki Yena ya ka lu zamaisa.” (Samu 48:14) Nzila ye ñwi ye lu kona ku etelelwa ka yona ki Jehova Mulimu kiha lu ituta Linzwi la hae, yona Bibele, ni ku sebelisa litaelo za yona mwa bupilo bwa luna.