‘O Muñwi wa Misebezi ye Mituna ya Bumanjinela’

TEMPELE ya Jehova ha ne i yahilwe mwa Jerusalema mwa puso ya Mulena Salumoni ibat’o ba lilimo ze 3,000 kwamulaho, suba se sinde sa kopa ne si ezizwe ni ku beiwa fande a munyako wa tempele. Suba seo ne li sa bukiti bo bu fitelela litani ze 30 mi ne ku kena mahemele a mezi a 11,000. Sona suba se situna seo ne si bizwa lisa la kopa. (1 Malena 7:23-26) Mwa magazini ye bizwa Biblical Archeologist, Albert Zuidhof ya n’a banga manjinela mwa kopano ya National Research Council of Canada, n’a ize: “Ha ku na kakanyo kuli wo ne li o munwi wa misebezi ye mituna ya Maheberu ya bumanjinela.”

Lisa leo ne li pangilwe cwañi? Bibele i li: ‘Mulena n’a sululezi libyana za kopa mwa libala la Jordani, mwa sibaka sa lizupa.’ (1 Malena 7:45, 46) Zuidhof u li: “Nzila ye ne ba itusisize ya ku sulula ka yona kopa mwa lizupa i lukela ku ba ye swana ni ye ba sa itusisa kacenu ha ba panga milangu ye mituna ya sipi. U talusa kuli: “Ne ba ezize cwalo ka ku fulumeka sikombole sa bulota sa lisa leo fahalimw’a kopa ye suluzwi ye omile ñolokoto. . . . Hasamulaho, ne ba ezize sikombole sa lizupa fahalimw’a sikombole sa bulota ni ku litela kuli bulota bu ome. Kwa mafelelezo kihona cwale ba shengununa bulota ni ku sululela kopa ye shengunuzwi mo ku zwile bulota.”

Bucaziba bo butuna ne bu tokwahala mwa ku panga lisa leo le lituna ni le li bukiti cwalo. Sikombole sa mwahali ni sa fande ne si na ni ku tiya hahulu kuli ku kone ku sululelwa teñi kopa ye shengunuzwi ye bat’o eza litani ze 30, mi kopa ne i na ni ku sululelwa teñi ka nako i liñwi kuli ku si ke kwa ba ni miandala. Mwendi nto yeo ne i tokwa kuli ku be ni lipiza ze ñata za kopa ye shengunuzwi ya ku sululela mwa sikombole. Ne li musebezi o mutuna luli!

Mwa tapelo ya n’a lapezi fa kakulo ya tempele, Mulena Salumoni n’a lumbile Jehova Mulimu kabakala musebezi kaufela o n’o ezizwe wa ku yaha tempele, a li: “N’o bulezi ka mulomo wa hao, mi u bonahalisize linto kaufela ka lizoho la hao.”—1 Malena 8:24.