“Mulena, U Lu Lute ku Lapela”

“Yo muñwi wa balutiwa ba hae a li ku yena: Mulena, u lu lute ku lapela.”—LUKA 11:1.

1. Ki kabakalañi yo muñwi wa balutiwa ba Jesu ha n’a kupile Jesu kuli a ba lute ku lapela?

MUTA o muñwi ka 32 C.E., mulutiwa yo muñwi wa Jesu n’a mu boni Ha lapela. N’a sa koni ku utwa za n’a bulela Jesu ku Ndat’ahe, kakuli mwendi n’e li tapelo ya mwa pilu. Niteñi, Jesu ha s’a felize, mulutiwa y’o a li ku yena: “Mulena, u lu lute ku lapela.” (Luka 11:1) Kiñi se ne si tahisize kuli a kupe? Mwa bupilo ni bulapeli bwa Sijuda, tapelo n’e li nto ya kamita. Mwa Mañolo a Siheberu ku na ni litapelo ze ñata mwa buka ya Lisamu ni ko kuñwi cwalo. Kacwalo, mulutiwa y’o n’a sa kupi ku lutiwa nto ya n’a sa zibi kamba ya n’a sa li ku ba a i eze. Ku si na kuliñi, n’a ziba litapelo za buipi za ba bahulu ba bulapeli bwa Sijuda. Kono cwale n’a boni Jesu inz’a lapela, mi mwendi n’a lemuhile kuli mwa n’a lapelela Jesu ne ku shutana hahulu ni litapelo za buipi za baluti bao.—Mateu 6:5-8.

2. (a) Ki sifi se si bonisa kuli Jesu n’a si ka talusa kuli lu petange fela tapelo ye li mutala? (b) Ki kabakalañi ha lu bata ku ziba ku lapela?

² Likweli ze bat’o ba ze 18 kwamulaho, mwa Ngambolo ya hae ya fa Lilundu, Jesu n’a file balutiwa ba hae mutala wa ku latelela ha ba lapela. (Mateu 6:9-13) Mwendi mulutiwa y’o n’a siyo ka nako yeo, mi kacwalo, Jesu ka musa a kutela lisupo za butokwa za tapelo yeo ye li mutala. Taba ye lemuseha ki ya kuli n’a si ka kutela ku bulela tapelo yeo ka manzwi a swana, ili ku bonisa kuli n’a sa fi tapelo ya sizo ye n’e ka petiwanga fela. (Luka 11:1-4) Sina mulutiwa y’o ya si ka bulelwa libizo, ni luna lu bata ku lutiwa ku lapela ilikuli litapelo za luna li lu suteleze ku Jehova. Kacwalo, ha lu nyakisiseñi mwa butungi tapelo yeo ye li mutala, ka mo i ñolezwi ki muapositola Mateu. Ku yona ku na ni likupo ze 7, z’e talu ku zona li ama milelo ya Mulimu, mi z’e ne li ama ze lu tokwa za kwa mubili ni kwa moya. Mwa taba ye, lu ka nyakisisa likupo za pili z’e talu.

Ndate Ya Lilato

3, 4. Ha lu biza Jehova kuli “Ndat’a luna,” ku talusañi?

³ Ku zwa kwa makalelo, Jesu n’a bonisize kuli litapelo za luna li swanela ku bonisa silikani sa luna ni Jehova se situna, sa ka likute. Ha n’a bulela sihulu kuli a tuse balutiwa ba hae be ne ba kubukani bukaufi ni yena fa lilundu, Jesu n’a ba bulelezi ku bulela ku Jehova kuli, “Ndat’a luna ya kwa lihalimu.” (Mateu 6:9) Ka ku ya ka caziba yo muñwi, ibe kuli Jesu n’a bulela mwa puo ye bunolo ya Siheberu kamba mwa Siarami, linzwi la n’a itusisize la “Ndate” li swana ni manzwi a’ lilato a mwanana, ‘linzwi la mwanana.’ Ku biza Jehova kuli “Ndat’a luna” ku bonisa silikani se sinde, sa ku sepa mutu.

 ⁴ Ka ku bulela kuli ‘Ndat’a luna,’ lu lumela hape kuli lu kalulo ya lubasi lo lutuna lwa banna ni basali ba ba lemuha kuli Jehova ki Mufani wa Bupilo. (Isaya 64:8; Likezo 17:24, 28) Bakreste ba ba tozizwe ka moya ba añulwa sina “bana ba Mulimu,” mi ku yena ba kona ku “biza, [ba] li, Abba, Ndate!” (Maroma 8:14, 15) Ba bañata-ñata se ba bile balikani ba bona ba ba sepahala. Balikani bao ba ineezi bupilo bwa bona ku Jehova mi ba bonisize buineelo bwa bona ka ku kolobezwa mwa mezi. Ba “lingu ze ñwi” bao kaufela ni bona ba kona ku atumela Jehova ka libizo la Jesu ni ku biza Jehova kuli “Ndat’a luna.” (Joani 10:16; 14:6) Lwa kona ku lapela kamita ku Ndat’a luna wa kwa lihalimu kuli lu mu lumbe, ku itumela ku yena ku ze nde kaufela z’a lu ezeza, ni ku mu lwalisa milwalo ya luna, ka ku kolwa kuli wa lu tokomela.—Mafilipi 4:6, 7; 1 Pitrosi 5:6, 7.

Ku Lata Libizo la Jehova

5. Ki ifi kupo ya pili mwa tapelo ye li mutala, mi ki kabakalañi ha i swanela?

⁵ Kupo ya pili i bulela nto ya butokwa ka ku fitisisa. I li: “Libizo la hao a li be le li kenile.” (Mateu 6:9) Ee, ku boniswa kwa bukeni bwa libizo la Jehova ku swanela ku ba kwa butokwa hahulu ku luna kakuli lwa mu lata mi lu toile ku bona mo li nyefulezwi libizo la hae. Buipanguli bwa Satani ni ku shemaeta kwa hae bosinyalana ba pili kuli ba fetuhele Jehova Mulimu ne ku sinyize libizo la Hae ka ku tahisa ku honona ka mo Mulimu n’a buseza pupo kamukana. (Genese 3:1-6) Hape, mwa lilimo ze ñata-ñata ze latelezi, libizo la Jehova se li nyefuzwi ka likezo ni lituto ze swabisa za ba ba ipala ku mu yemela.

6. Haiba lu lapela kuli libizo la Jehova li be le li kenile, ki sifi se lu si ke lwa eza?

⁶ Ha lu lapela kuli libizo la Jehova li be le li kenile, lu bonisa ko lu wela mwa taba ya puso ya pupo kamukana—kuli lu yemela ka ku tiya tukelo ya Jehova ya ku busa pupo kamukana. Jehova u bata kuli mwa pupo kamukana ku pile libupiwa ze butali ze ipeya ka ku itatela ni ka tabo kwatas’a puso ya hae ye lukile kakuli ba mu lata mi ba lata zote ze li yemela libizo la hae. (1 Makolonika 29:10-13; Samu 8:1; 148:13) Ku lata libizo la Jehova kwa luna ku ka lu tusa ku pima ku eza nto ifi kamba ifi ye kona ku nyefulisa libizo leo le li kenile. (Ezekiele 36:20, 21; Maroma 2:21-24) Kozo ya pupo kamukana ni ya ba ba ku yona i itingile fa ku boniswa ku kena kwa libizo la Jehova, ni fa ku ipeya ka lilato kwatas’a puso ya hae. Kacwalo, tapelo ya luna ya kuli “libizo la hao a li be le li kenile” i bonisa buikolwiso bwa luna bwa kuli mulelo wa Jehova u ka petiwa kuli a lumbekwe.—Ezekiele 38:23.

Mubuso O Lu Lapelela

7, 8. (a) Mubuso w’o Kreste n’a lu lutile ku lapelela ki nto mañi? (b) Lu itutañi ka za Mubuso w’o mwa libuka za Daniele ni Sinulo?

⁷ Kupo ya bubeli mwa tapelo ye li mutala ki  ye li: “Ku tahe mubuso wa hao.” (Mateu 6:10) Kupo yeo i swalisana hahulu ni ya pili. Kwa ku bonisa bukeni bwa libizo la hae, Jehova u itusisa Mubuso wa Bumesiya, ona mulonga wa hae wa kwa lihalimu, ili w’o Mwan’a hae Jesu Kreste a li mulena ya swanela wa ona. (Samu 2:1-9) Bupolofita bwa Daniele bu bonisa Mubuso wa Bumesiya w’o ku ba “licwe” le li ketuha kwa “lilundu.” (Daniele 2:34, 35, 44, 45) Lilundu leo li yemela puso ya Jehova ya pupo kamukana, mi kacwalo licwe leo le li yemela Mubuso ki poniso ye nca ya kuli Jehova ki mubusi wa pupo kaufela. Mwa bupolofita b’o, licwe leo li ‘fetuha lilundu le lituna, mi li tala lifasi kaufela,’ ili ku bonisa kuli, mwa ku busa lifasi, Mubuso wa Bumesiya u ka yemela puso ya Mulimu ye pahami ka ku fitisisa.

⁸ Ba ba swalisana ni Kreste mwa Mubuso w’o ki b’a 144,000, “ba ba liuluzwi mwahal’a batu,” ba ba busa ni yena sina malena ni baprisita. (Sinulo 5:9, 10; 14:1-4; 20:6) Daniele u li bao ki “ba ba kenile ba Muambakani-ya-Pahami,” mi hamoho ni Kreste, yena Toho ya bona, ba amuhela “mubuso ni bulena, ni mata a mibuso kaufela ye inzi mwatas’a mahalimu kaufela . . . Mubuso wa [bona] ki mubuso o sa feli; malena kaufela a ka [ba] sebeleza, a [ba] utwe.” (Daniele 7:13, 14, 18, 27) W’o ki ona mubuso wa kwa lihalimu ili w’o Kreste n’a lutile balateleli ba hae ku u lapelela.

Ki Kabakalañi Ha Lu Sa Lapela Kuli Mubuso U Tahe?

9. Ki kabakalañi ha ku swanela ku lapela kuli Mubuso wa Mulimu u tahe?

⁹ Mwa tapelo ya hae ye li mutala, Kreste n’a lu lutile ku lapela kuli Mubuso wa Mulimu u tahe. Ku talelezwa kwa bupolofita bwa mwa Bibele ku bonisa kuli Mubuso wa Bumesiya n’o tomilwe kwa lihalimu ka 1914. * Kacwalo, kana ku sa swanela ku lapela kuli Mubuso w’o u “tahe”? Kwa swanela, kakuli mwa bupolofita bwa Daniele, Mubuso wa Bumesiya, o swanisezwa ki licwe, u ka lwanisa milonga ya bupolitiki ya batu, ye swanisezwa ki siswaniso se situna. Licwe leo li ka t’o lwanisa siswaniso seo, ili ku si tuba ku si eza bupi. Bupolofita bwa Daniele bu li: “Bulena bwa ona ha bu na ku shimbulukela kwa sicaba si sili. Mubuso wo, u ka ketula ni ku feza mibuso kaufela; kono ona u ka ba teñi kamita ni ku ya ku ile.”—Daniele 2:44.

10. Ki kabakalañi ha lu nyolelwa ku taha kwa Mubuso wa Mulimu?

¹⁰ Lu nyolelwa ku bona Mubuso wa Mulimu u taha ku t’o lwanisa muinelo o maswe wa Satani kakuli ku taha kwa ona ku ka tahisa ku kena kwa libizo la Jehova, mi u ka zwisa bote ba ba lwanisa bubusi bwa hae. Lu lapela ka tukufalelo kuli: “Ku tahe mubuso wa hao,” mi lu bulela hamoho ni muapositola Joani kuli: “Amen; taha Mulena Jesu!” (Sinulo 22:20) Ee, haike Jesu a tahe a t’o bonisa bukeni bwa libizo la Jehova ni ku bonisa ku luka  kwa puso ya Hae, ilikuli manzwi a walisamu a petahale, a’ li: “Ba zibe batu, kuli ki Wena u nosi wa Libizo la [Jehova, NW] , ki Wena Muambakani-ya-Pahami, wa lifasi kaufela.”—Samu 83:18.

“Se Si Latwa ki Wena Si Ezwe”

11, 12. (a) Ha lu lapela kuli se si latwa ki Mulimu si “ezwe mwa lifasi, mo si ezezwa kwa lihalimu,” lu kupa lika mañi? (b) Tapelo ya luna ya kuli tato ya Jehova i ezwe i talusa lika mañi ze ñwi?

¹¹ Ku tuha f’o, Jesu a luta balutiwa ba hae ku lapela kuli: “Se si latwa ki Wena si ezwe mwa lifasi, mo si ezezwa kwa lihalimu.” (Mateu 6:10) Pupo kamukana i bile teñi ka tato ya Jehova. Libupiwa ze m’ata za moya li huweleza kuli: “Mulena ni Mulimu wa luna, ki Wena ya lukela ku fiwa kanya, ni likute, ni mata; kakuli ki Wena ya ezize linto kamukana, mi ha li li teñi, niha ne li bupilwe, ki ka ku lata kwa hao.” (Sinulo 4:11) Jehova u na ni mulelo ka “za kwa lihalimu ni za mwa lifasi.” (Maefese 1:8-10) Ka ku lapela kuli tato ya Mulimu i ezwe, lu kupa Jehova kuli a pete mulelo wa hae. Hape, lu bonisa cwalo kuli lu nyolelwa ku bona tato ya Mulimu i eziwa mwa pupo kamukana.

¹² Ka tapelo yeo, lu bonisa hape kuli lu tabela ku pila ka ku lumelelana ni tato ya Jehova. Jesu n’a ize: “Sico sa ka, kikuli ni eze se si latwa ki Ya ni lumile, mi ni feleleze musebezi wa hae.” (Joani 4:34) Sina Jesu, luna ka ku ba Bakreste ba ba inezi lu tabela ku eza tato ya Mulimu. Ku lata Jehova ni Mwan’a hae ku lu susumeza ku pila bupilo bwa luna ka ku sa “ya ka litakazo za batu, kono ka se si latwa ki Mulimu.” (1 Pitrosi 4:1, 2; 2 Makorinte 5:14, 15) Lu lika ka t’ata ku sa eza ze lu ziba kuli ha li lumelelani ni tato ya Jehova. (1 Matesalonika 4:3-5) Ka ku fumana nako ya ku bala Bibele ni ku ituta, lu “utwiseza se si latwa ki Mulena,” mi seo si kopanyeleza ku abana hahulu mwa ku shaela “evangeli ye ya mubuso.”—Maefese 5:15-17; Mateu 24:14.

Tato ya Jehova kwa Lihalimu

13. Tato ya Mulimu ne i sweli ku eziwa cwañi kale-kale pili Satani a si ka ipangula?

¹³ Kale-kale pili yo muñwi wa bana ba hae ba moya a si ka ipangula ni ku ba Satani, tato ya Jehova ne i sweli ku petiwa kwa lihalimu. Buka ya Liproverbia i talusa butali ku ba bo bu yemela Mwana wa mweli wa Mulimu. I bonisa kuli ka lilimo ze ñata-ñata, Mwana wa libanda wa Mulimu n’a li ya “tabile fapil’a hae kamita” ku eza tato ya Ndat’ahe. Hasamulaho, a ba ‘ya n’a sebeleza’ Jehova mwa ku tahisa linto kaufela “ze kwa lihalimu, ni ze mwa lifasi, ze bonwa ni ze sa bonwi.” (Liproverbia 8:22-31; Makolose 1:15-17) Jehova n’a itusisize Jesu sina Linzwi, kamba Mubuleli wa hae.—Joani 1:1-3.

14. Lu kona ku itutañi kwa Samu 103 ka za m’o mangeloi a petela tato ya Jehova kwa lihalimu?

¹⁴ Walisamu u bonisa kuli puso ya Jehova i pahami ku fita linto kaufela ni kuli mangeloi a mañata-ñata a utwa manzwi a hae a likelezo ni litaelo. Lu bala kuli: “[Muñ’a] Bupilo u tomile lubona lwa hae mwa mahalimu; mi ku busa kwa hae ku kopanya linto kamukana. Mu lumbeke [Muñ’a] Bupilo mina mangeloi a hae, mina ba ba tiile ka mata, ba ba eza litaelo za hae, ba ba teeleza manzwi a hae. Mu lumbeke [Muñ’a] Bupilo mina limpi za hae kaufela, mina batanga ba hae ba ba eza se si latwa ki Yena. Mu lumbeke [Muñ’a] Bupilo mina misebezi ya hae kaufela, mwa mabaka kamukana a mubuso wa [puso ya] hae.”—Samu 103:19-22.

15. Ku fiwa m’ata a Mubuso kwa Jesu ne ku amile cwañi ku eziwa kwa tato ya Mulimu kwa lihalimu?

¹⁵ Satani ha s’a ipanguzi, n’a sa kona ku ya kwa lihalimu, ka mo ku bonisezwa mwa buka ya Jobo. (Jobo 1:6-12; 2:1-7) Kono buka ya Sinulo ne i polofitile kuli nako ne i ka taha ili f’o Satani ni badimona ba hae ne ba ka lundulwa kwa lihalimu. Ku bonahala kuli nako yeo ne i tile Jesu Kreste a man’o beiwa fa bulena bwa Mubuso ka 1914. Ku zwa nako yeo,  baipanguli bao ha ba sa na sibaka kwa lihalimu. Ba fa lifasi fela. (Sinulo 12:7-12) Kwa lihalimu ha ku sa na muzeko ka za puso ya Jehova. Ku utwahala fela manzwi a’ swalisana mwa ku babaza “Ngunyana,” Kreste Jesu, ni a’ tisa tumbo ya ka buipeyo ku Jehova. (Sinulo 4:9-11) Tato ya Jehova kaniti i sweli ya eziwa kwa lihalimu.

Tato ya Jehova ka za Lifasi

16. Tapelo ye li mutala i bonisa cwañi mafosisa a tuto ya Krestendomu ka za sepo ya batu?

¹⁶ Kwa milelo ya Mulimu, likeleke za Krestendomu ha li kopanyangi lifasi, ka ku pihelela kuli batu ba bande kaufela ba ka ya kwa lihalimu. Kono Jesu n’a lu lutile ku lapela kuli: “Ku tahe mubuso wa hao; se si latwa ki Wena si ezwe mwa lifasi, mo si ezezwa kwa lihalimu.” (Mateu 6:10) Kana kwa konwa ku bulelwa luli kuli tato ya Jehova i sweli ya eziwa kacenu fa lifasi le li unjamwi ki mifilifili, ku sa luka, makulanu, ni lifu? Kutokwa! Kacwalo, lu swanela ku lapela kuli tato ya Mulimu i ezwe fa lifasi, ka ku lumelelana ni sepiso ye ñozwi ki muapositola Pitrosi, ye li: “Ka sepiso ya hae, lu talimezi lihalimu le linca [Mubuso wa Bumesiya wa Kreste], ni lifasi le linca [batu ba ba lukile], mo ku yahile Ku Luka.”—2 Pitrosi 3:13.

17. Mulelo wa Jehova ka za lifasi ki ufi?

¹⁷ Jehova n’a na ni mulelo ha n’a bupile lifasi. N’a susumelize mupolofita Isaya ku ñola kuli: “[Muñ’a] Bupilo, Mubupi wa lihalimu, Mulimu ya bupile lifasi, muezi wa lona, ya li tiisize, ya si ka li bupa fela, kono ilikuli li yahiwe, s’a bulela ki se, u li: Ki Na [Jehova, NW], yo muñwi h’a yo.” (Isaya 45:18) Mulimu n’a beile bosinyalana ba pili mwa simu ya paradaisi mi n’a ba laezi kuli: “Mu tahise lusika, mu ate, mu tale mwa lifasi, mu buse fahalimw’a lona.” (Genese 1:27, 28; 2:15) Kwa iponelwa kuli mulelo wa Mubupi kikuli mwa lifasi ku pile batu ba ba petehile, ba ba lukile, ba ba ipeya ka tabo kwatas’a puso ya Jehova, ni ku pila ku ya ku ile mwa Paradaisi ye sepisizwe ki Kreste.—Samu 37:11, 29; Luka 23:43.

18, 19. (a) Ki lika mañi ze lukelwa ku ezwa pili kuli tato ya Mulimu i ezwe ka ku tala fa lifasi? (b) Ki likalulo mañi za tapelo ya Jesu ye li mutala ze ka nyakisiswa mwa taba ye tatama?

¹⁸ Tato ya Jehova ka za lifasi ni kamuta ha i koni ku petwa ka ku tala, mwa lifasi inge ku sa na ni banna ni basali ba ba lwanisa puso ya hae. Ka ku itusisa libupiwa ze m’ata ze etelelwa ki Kreste, Mulimu u ka “yundisa ba ba shandaula lifasi.” Muinelo kaufela o maswe wa Satani, hamoho ni bulapeli bwa ona bwa buhata, bupolitiki bwa ona bo bu maswe, lipisinisi za ona za mukwañuli, ze sa sepahali, ni limpi za ona ze sinya, li ka feliswa ku ya ku ile. (Sinulo 11:18; 18:21; 19:1, 2, 11-18) Puso ya Jehova i ka boniswa ku ba ye lukile mi ni lona libizo la hae li ka boniswa ku ba le li kenile. Kaufela zeo ki zona ze lu lapelela ha lu bulela kuli: “Ndat’a luna ya kwa lihalimu, Libizo la hao a li be le li kenile; ku tahe mubuso wa hao; se si latwa ki Wena si ezwe mwa lifasi, mo si ezezwa kwa lihalimu.”—Mateu 6:9, 10.

¹⁹ Kono mwa tapelo ya hae ye li mutala, Jesu n’a bonisize kuli lwa kona ku lapelela ni litaba za ka butu. Litaba zeo za tuto ya hae ka za tapelo li ka nyakisiswa mwa taba ye tatama.

[Litaluso za kwatasi]

Lundululo

• Ki kabakalañi ha ku swanela ku biza Jehova kuli “Ndat’a luna”?

• Ki kabakalañi ha ku li kwa butokwa hahulu ku lapelela kuli libizo la Jehova li be le li kenile?

• Ki kabakalañi ha lu lapelanga kuli Mubuso wa Mulimu u tahe?

• Ku taluswañi ha lu lapela kuli tato ya Mulimu i ezwe fa lifasi sina mo i ezezwa kwa lihalimu?

[Lipuzo za Tuto]

[Siswaniso se si fa likepe 9]

Litapelo za Jesu ne li shutana hahulu ni litapelo za buipi za Bafalisi

[Siswaniso se si fa likepe 10]

Bakreste ba lapela kuli Mubuso wa Mulimu u tahe, kuli libizo la hae li boniswe ku ba le li kenile, ni kuli tato ya hae i ezwe