Ze Kona ku Tiisa Lipilu za Ba Ba Ziyelehile

BANNA ni basali ba ba sepahala ba kwaikale ha ne ba keni mwa ziezi, ne ba lapelezi ka t’ata ketelelo ya Mulimu. Kono hape ne ba ezize se siñwi kuli ba ikimulule kwa ziezi, inge cwalo ku itusisa butali kwa ku picuka banyandisi. Ka mutala, Davida n’a konile ku tiyela butata bwa hae ka ku itinga ku Jehova hamohocwalo ni ka ku ikataza ka butu. Luna bo kacenu?

Ha mu li mwa ziezi, mwendi mu ezanga se siñwi kuli mu tatulule butata bwa mina. Ka mutala, haiba ha mu na mubeleko, mu ka ikataza ku bata musebezi o swanela kuli u mi tuse mina ni lubasi lwa mina. (1 Timotea 5:8) Kamba haiba mu bakuli, mu ka bata likalafo ze swanela. Niheba Jesu, yena ya n’a na ni m’ata a zwa ku Mulimu a ku folisa mifuta kaufela ya matuku, n’a lemuhile kuli ba ba kula ba tokwa mualafi. (Mateu 9:12) Niteñi, matata a mina fokuñwi a kana a sa feli; mu kana mwa zwelapili ku a tiyela ku fita fa sipimo se siñwi.

Kana ne ku si ke kwa ba hande ku fitisa taba yeo ku Jehova Mulimu ka tapelo? Ka mutala, ha lu bata misebezi, ku itinga ku Mulimu ka tapelo ku ka lu tusa ku hana muliko ufi kamba ufi wa ku kena musebezi o lwanisana ni likuka za Bibele. Hape lu ka hana ku ‘keluhiswa tumelo’ ki mukwañuli kamba ku lata mali. (1 Timotea 6:10) Kaniti, ha lu eza likatulo za butokwa ze ama mubeleko kamba lubasi kamba buiketo bwa kwa mubili, lwa kona ku latelela kelezo ya Davida ye li: “U lwalise [Muñ’a] Bupilo mulwalo wa hao, mi u ka ku tiisa. H’a na ku lumela kuli ya na ni niti a nyanganyiswe.”—Samu 55:22.

Hape tapelo ye buniti i ka lu tusa ku shiama mwa mihupulo ilikuli lu si ke lwa imelwa ki ziezi ya luna. Mukreste wa niti, yena muapositola Paulusi, n’a ñozi kuli: “Mwa linto kaufela mu zibise Mulimu se mu bata ka tapelo ni ka kupo ye na ni buitumelo.” Tapelo ye buniti i kona ku lu tiisa cwañi pilu? “Kozo ya Mulimu ye fita kutwisiso kaufela, i ka buluka lipilu za mina ni mihupulo ya mina ku  Jesu Kreste.” (Mafilipi 4:6, 7) Kozo ya Mulimu i “fita kutwisiso kaufela.” Kacwalo, ya kona ku lu tiisa ha lu imezwi ki maikuto a zieza. I ka ‘buluka lipilu za luna ni mihupulo ya luna,’ ili ku lu tusa ku sa matukela ku eza likatulo ze lu si ka nahanisisa, ze kona ku ekeza kwa manyando a luna.

Mane tapelo ya kona ku tusa kwa ku tatulula butata. Muapositola Paulusi ha n’a li mwa tolongo mwa Roma, n’a kupile ka buikokobezo Bakreste ka yena kuli ba mu lapelele. Ki kabakalañi Paulusi ha n’a ba kupile cwalo? N’a ba ñolezi kuli: “Ni kupa hahulu luli kuli mu eze cwalo, kuli ni mi kutisezwe kapili.” (Maheberu 13:19) Ka mubulelelo o muñwi, Paulusi n’a zibile kuli ku utwa kwa Jehova litapelo za balumeli ka yena za ka tundamo ne ku kana kwa ama fa n’a ka lukululelwa.—Filemoni 22.

Kana tapelo i ka cinca ze tiswa ki ziezi ya luna? I kana ya li cinca. Kono lu swanela ku lemuha kuli Jehova Mulimu a kana a sa alabi litapelo za luna ka mo lu batela. Paulusi n’a kuta-kutezi ku lapela ka za “muutwa mwa mubili,” mwendi makulanu cwalo. Kono ku fita ku zwisa ziezi yeo, Mulimu n’a bulelezi Paulusi kuli: “Sishemo sa ka sa ku likana; kakuli mata a ka a petahala mwa mifokolo.”—2 Makorinte 12:7-9.

Kacwalo, ziezi ya luna i kana i sa feli kapili. Kono lu ka ba ni kolo ya ku bonisa kuli lu itingile ku Ndat’a luna wa kwa lihalimu. (Jakobo 1:2-4) Mu zibe kuli Jehova Mulimu nih’a sa felisi ziezi ya luna, w’a kona ku lu “fa nzila ya ku zwa ku [yona], kuli [lu] kone ku itiisa ku [yona].” (1 Makorinte 10:13) Ku butokwa ku lemuha kuli Jehova u bizwa “Mulimu wa ze tiisa pilu kaufela. Ya lu tiisanga pilu mwa ñalelwa ifi kamba ifi.” (2 Makorinte 1:3, 4) Mulimu wa kona ku lu fa ze lu tokwa kuli lu itiise, mi lu na ni sepo ya bupilo bo bu sa feli.

Linzwi la Mulimu, Bibele, li lu sepisa kuli Jehova “u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku.” (Sinulo 21:3, 4) Kana ku t’ata hahulu ku lumela kuli ku ka ba ni lifasi mo ku si na ziezi? Ku kana kwa ba cwalo haiba se mu twaezi ku pila ni matata. Niteñi, Mulimu u sepisize tukuluho kwa sabo ni matata, mi mulelo wa hae u ka petahala ku be cwañi ni cwañi.—Isaya 55:10, 11.

[Maswaniso a fa likepe 9]

Ku zwa mwa ku zwafa ku taha mwa ku yoyelwa