Batanga ba Mulimu ba Swana Sina Likota Ka Linzila Lifi?

KA KU bulela ka za mutu ya tabela likuka za mwa Bibele ni ku li sebelisa mwa bupilo bwa hae, muñoli wa Lisamu u li: “U swana sina kota ye calilwe kwatuko ni mezi a’ buba, ye beya miselo mwa nako ya yona, ye matali a yona a sa omi, s’a eza kaufela sa konda.” (Samu 1:1-3) Ki kabakalañi swanisezo yeo ha i li ye swanela?

Likota za kona ku pila ka nako ye telele. Ka mutala, likota za olive mwa sibaka sa Mediteranea li akalezwa ku ba ze se pilile ka lilimo ze mwahal’a 1,000 ni 2,000. Ka mukwa o swana, likota za mubuyu mwa Central Africa li pila ka lilimo ze ñata, mi kota ye bizwa bristlecone pine mwa California i akalezwa ku ba ye pilile ka lilimo ze 4,600. Mwa mushitu, likota ze tuna hañata za tusa fa sibaka fo li nzi. Ka mutala, likota ze nyinyani li fumananga muluti kwa likota ze telele, mi matali a’ wanga kwa likota a nunisa mubu o mwatas’a zona.

Hañata ku fumanehanga kuli likota ze telele ka ku fitisisa mwa lifasi li hulelanga hamoho mwa mushitu, mi likota zeo za tusana. Bakeñisa kuli mibisi ya zona ya bindana, likota ze ñatanyana ze inzi kulokulikuñwi za kona ku tiyela liñungwa ku fita kota ye ikemezi i nosi. Hape mibisi ye miñata ya kota i i konisa ku fumana mezi ni mununo o likani mwa mubu. Ka linako ze ñwi, mibisi ya kona ku kena luli mwa mubu ka butelele bo bu fita bwa yona kota ka sibili, kamba mibisi ya kona ku namalala ka butelele bo bu fitelela mitai ya kota yeo.

Muapositola Paulusi mwendi n’a amile kwa kota ha n’a talusize kuli Bakreste ba swanela ‘ku zamaya ku Kreste, ba nze ba tibisa mibisi ku yena, ku tomwa ku yena, ni ku tiya mwa tumelo.’ (Makolose 2:6, 7) Kaniti luli, Bakreste ba kona fela ku ba ba ba tiile haiba ba tibisa mibisi ku Kreste.—1 Pitrosi 2:21.

Ki mwa linzila ze ñwi lifi m’o batanga ba Mulimu ba swanisezwa kwa likota? Sina likota ze inzi kulokulikuñwi ha li tiisana, ka nzila ye swana bote ba ba swalisani ni puteho ya Sikreste ba tiiswa ki balumeli ka bona. (Magalata 6:2) Bakreste ba ba sepahala, ba ba hulile kwa moya, ka ku ba ni mibisi ye tibile ya kwa moya, ba tusa balumeli ba banca kuli ba tiye mwa tumelo, niha ba talimana ni twaniso ye tuna ye swana sina liñungwa. (Maroma 1:11, 12) Ba ba sa zo ba Bakreste ba kona ku eza hande mwa “muluti” wa silelezo wa batanga ba Mulimu ba ba cuukile hahulu. (Maroma 15:1) Mi bote ba ba mwa liputeho za Sikreste mwa lifasi kamukana ba tiiswa ki sico sa kwa moya se si tiisa se si zwelela kwa “likota ze na ni niti,” bona bomasiyaleti ba ba tozizwe.—Isaya 61:3.

Kwa tabisa hakalo kuli batanga ba Mulimu kaufela ba na ni tibelelo ya ku bona talelezo ya sepiso ye fumaneha kwa Isaya 65:22, ye li: “Mazazi a ba sicaba sa ka, a ka likana ni mazazi a likota.”

[Manzwi a bañi ba siswaniso fa likepe 28]

Godo-Foto