Kana Tumelo Ya Kona ku Folisa Bakuli?

HA LU kula, lu batanga tuso ni likalafo. Mwendi ku zwelela mwa Bibele mwa ziba kuli hañata Jesu Kreste n’a folisize matuku a mifuta kaufela, ku imulula bakuli ba bañata. Likalafo ze cwalo ne li konahalile cwañi? Bibele i bulela kuli ne li ka ‘m’ata a Mulimu.’ (Luka 9:42, 43; Likezo 19:11, 12) Kacwalo, ne li moya o kenile o zwa ku Mulimu o ne u folisa, isike fela tumelo ya mutu. (Likezo 28:7-9) Kona libaka Jesu ha n’a sa tokwi kuli bakuli ba bonise tumelo ya bona ku yena kuli ba foliswe.

Mu kana mwa ipuza kuli: ‘Kana ku folisa ka makazo ki nto ye ne ezizwe fela kwamulaho, kamba kana ku folisa ko ku swana ni kwa n’a ezize Jesu ku ka ba teñi hape? Ki sepo mañi ye li teñi ku ba ba kula butuku bo butuna kamba bo bu sa foli?’

Bibele i talusa kuli mwa lifasi la Mulimu le linca la ku luka, m’ata a Mulimu hape a ka tahisa ku folisa kwa ka makazo kwa n’a ezize Jesu ha n’a li fa lifasi. Lipaki za Jehova ba mwa silalanda sa mina ba ka tabela ku mi bonisa kuli ki lili mi ki ka nzila ifi yeo Mulimu a ka felisa z’a sa koni ku felisa mutu ya folisa ka tumelo—ona ku felisa matuku kaufela, hamohocwalo ni lifu. Ee, Mulimu ‘u ka miza lifu ku ya ku ile.’—Isaya 25:8.