Lipuzo Ze Zwa kwa Babali
Lipuzo Ze Zwa kwa Babali
Bakeñisa kuli Malivi ne ba si na sanda mwa Isilaele ya kwaikale, Mulivi Hanameele n’a konile cwañi ku lekisa simu ku Jeremia, muhabo yena wa Mulivi, ka ku ya ka Jeremia 32:7?
Ka za Malivi, Jehova n’a ize ku Aruni: “U si ke wa y’o luwa se siñwi sa naha ya bona, mi u si ke wa y’o ba ni sanda mwahal’a bana ba Isilaele.” (Numere 18:20) Nihakulicwalo, Malivi ne ba filwe minzi ye 48 ni lifukambanda za yona, mwahal’a Naha ya Sepiso kaufela. Habo Jeremia ne li mwa Anatota, o n’o li o muñwi wa minzi yeo ye ne filwe kwa “baprisita, bona bana ba Aruni.”—Joshua 21:13-19; Numere 35:1-8; 1 Makolonika 6:54, 60.
Kwa Livitike 25:32-34, lu fumana kuli Jehova n’a file litaelo ze ama ‘litukelo za ku lekulula’ mubu wa Malivi. Ku bonahala kuli mabasi a Malivi ne a na ni litukelo ze ama sanda za ku luwa, ku itusisa, ni ku lekisa mibu ye miñwi. Litukelo zeo ku si na kuli cwañi ne li ama ni za ku lekisa ni ku lekulula mubu. * Ka linzila ze ñata, Malivi ne ba luwile ni ku itusisa mubu sina Maisilaele ba masika a mañwi.
Mwendi mibu ya Malivi yeo ne li sanda sa lubasi se ne si yoliwa ki lubasi. Kono haili ka za ‘litukelo za ku lekulula’ mibu, zona ne li kona fela ku eziwa mwahal’a Malivi. Hape ku bonahala kuli mibu ne i kona fela ku lekiswa ni ku lekululwa haiba ne i li mwahal’a minzi, kakuli ‘masimu a n’a beile minzi mwahali’ n’a sa swaneli ku lekiswa bakeñisa kuli ne li “liluwo la bona la ku ya ku ile.”—Livitike 25:32, 34.
Kacwalo ku bonahala kuli simu ya n’a lekuluzi Jeremia ku Hanameele ne li simu ye ne kona ku lekululwa. Mwendi ne i li mwa munzi. Jehova ka sibili n’a pakile kuli “simu” yeo ne li ya Hanameele ni kuli Jeremia n’a na ni “tukelo ya ku i liulula.” (Jeremia 32:6, 7) Jehova n’a itusisize tekisano yeo ka swanisezo kuli a koñomeke sepiso ya hae ya kuli Maisilaele ne ba ka kuta ku to bata hape sanda sa bona ha se ba zwile mwa butanga mwa Babilona.—Jeremia 32:13-15.
Ha ku na se si bonisa kuli Hanameele n’a luwile simu ya mwa Anatota ka nzila ye si ka luka. Mi ha ku na se si bonisa kuli n’a lobile mulao wa Jehova ha n’a kupile Jeremia ku leka simu yeo mwa Anatota, kamba kuli Jeremia n’a si ka itusisa hande tukelo ya hae ya ku lekulula mubu ha n’a lekile simu yeo.—Jeremia 32:8-15.
[Litaluso za kwatasi]
^ para. 4 Mwa miteñi ya baapositola, Mulivi Barnabasi n’a lekisize simu ya n’a luwile ni ku fa mali a n’a fumani kwa balateleli ba Kreste ba mwa Jerusalema be ne ba shebile. Simu yeo mwendi ne i li mwa Palestine kamba mwa Sipera. Kamba mwendi ne li fela libita la n’a luwile Barnabasi mwa Jerusalema.—Likezo 4:34-37.