Mulalelo wa Mulena U Hupulwa Cwañi?

KA KU talusa mukiti wa Mulalelo wa Mulena, muapositola Paulusi wa Mukreste n’a bulezi kuli: “Na, ni amuhezi ku Mulena se ni mi file sona: Kikuli Mulena Jesu, mwa busihu bo a betekilwe, n’a ngile buhobe, a itumela, a bu komauna, mi a li: Mu nge, mu ce; se ki mubili wa ka o lobehezwi mina; mu eze seo kuli mu ni hupule ka sona. Kamukwaocwalo, ha ba se ba lalezi, a nga sinwiso, mi a li: Sinwiso se ki bulikani bo bunca bwa mwa mali a ka; mu eze seo kamita ha mu nwa mwateñi, kuli mu ni hupule ka sona. Mi cwale kamita ha mu ca kwa buhobe bo, mi mu nwela mwa sinwiso seo, ikaba mu bulela lifu la Mulena, mane a kute.”—1 Makorinte 11:23-26.

Sina mw’a bulelela Paulusi, Jesu n’a tatekile Mulalelo wa Mulena “mwa busihu bo [Jesu n’a] betekilwe” ki Judasi Isikariota ku mu fa kwa baeteleli ba bulapeli ba Majuda be ne ba susuelize Maroma kuli ba kokotele Kreste. Mulalelo w’o n’o ezizwe la Bune manzibwana, la March 31, 33 C.E. Jesu n’a shwezi fa kota ya linyando la Butanu musihali, la April 1. Bakeñisa kuli mazazi a kalenda ya Sijuda n’a kala manzibwana a lizazi le liñwi ku isa manzibwana a le liñwi, Mulalelo wa Mulena ni lifu la Jesu Kreste ne li ezahalile lizazi le li swana—Nisani 14, 33 C.E.

Baci ba buhobe ni veine ne ba na ni ku ‘eza seo kamita’ kuli ba hupulele fateñi Jesu. Ka ku ya ka toloko ye ñwi, Jesu n’a ize: “Mu eze seo sina kupuzo ya ka.” (1 Makorinte 11:24, The Jerusalem Bible) Mulalelo wa Mulena u bizwa hape kuli ki Kupuzo ya lifu la Kreste.

Lifu la Jesu Li Hupulelwañi?

Kalabo i fumanwa ka ku ziba butokwa bwa lifu leo. Jesu n’a shwile a li muyemeli yo mutuna wa bubusi bwa Jehova. Kacwalo, n’a bonisize kuli Satani n’a pumile ha n’a tamile batu taba ya kuli ba sebeleza Mulimu ka milelo ya buitati fela. (Jobo 2:1-5; Liproverbia 27:11) Ka lifu la hae sina mutu ya petehile, Jesu hape ‘n’a file bupilo bwa hae, kuli a liulule ba bañata.’ (Mateu 20:28) Adama ha n’a foselize Mulimu, n’a latehezwi ki bupilo bwa butu bo bu petehile ni ze zamaelela ni bona. Kono “Mulimu u latile lifasi [batu] hahulu, mane u li file Mwan’a hae wa libanda, kuli mutu ufi kamba ufi ya lumela ku yena a si ke a shwa, kono a be  ni bupilo bo bu sa feli.” (Joani 3:16) Kaniti, “mupuzo wa sibi ki lifu; kono mpo ya sishemo sa Mulimu ki bupilo bo bu sa feli ka Jesu Kreste Mulen’a luna.”—Maroma 6:23.

Kacwalo, lifu la Jesu Kreste li ama liponiso ze peli ze tuna ka ku fitisisa za lilato—ili lilato le lituna la n’a bonisize Jehova kwa batu ka ku ba fa Mwan’a hae ni lilato leo Jesu n’a ba bonisize ka ku itatela ku fana bupilo bwa hae bwa butu. Kupuzo ya lifu la Jesu i tunafaza liponiso ze peli zeo za lilato. Bakeñisa kuli lilato leo li boniswa ku luna, kana haki ko ku swanela kuli lu itebuhe lona? Nzila ye ñwi ye lu kona ku eza ka yona cwalo ki ya ku fumaneha kwa mukiti wa Mulalelo wa Mulena.

Zeo Buhobe ni Veine Li Yemela

Ha n’a tatekile Mulalelo wa Mulena, Jesu n’a itusisize buhobe ni sinwiso sa veine ye fubelu ku ba liswanisezo, kamba lisupo. Jesu n’a ngile buhobe, “a itumela, a bu komauna, mi a li: Mu nge, mu ce; se [buhobe] ki mubili wa ka o lobehezwi mina.” (1 Makorinte 11:24) Buhobe ne bu na ni ku komaunwa kuli bu abiwe ni ku ciwa kakuli ne bu li bo bu omile hande bo ne bu pangilwe fa bupi bwa buloto ni mezi ku si na mumela. Mwa Mañolo, mumela u yemela sibi. (Mateu 16:11, 12; 1 Makorinte 5:6, 7) Jesu n’a si na sibi. Kacwalo mubili wa hae wa butu o petehile n’o li sitabelo se si swanela sa ku liulula ka sona batu. (1 Joani 2:1, 2) Kwa swanela hakalo kuli buhobe bo bu itusiswa ku swaniseza mubili wa Kreste wa butu o si na sibi bu si ke bwa ya mumela!

Jesu hape a itumela ka sinwiso sa veine ye fubelu ye si ka zwakiwa, mi a li: “Sinwiso se ki bulikani bo bunca bwa mwa mali a ka.” (1 Makorinte 11:25) Veine ye fubelu ye mwa sinwiso i yemela mali a Jesu. Sina mali a matabelo a lipoho ni a lipuli ha n’a tiisize bulikani bwa Mulao mwahal’a Mulimu ni sicaba sa Isilaele ka 1513 B.C.E., mali a Jesu a n’a suluzwi fa lifu ni ona n’a tiisize bulikani bo bunca.

Ki Bomañi Ba Ba Ca?

Kuli lu zibe ba ba ca ka swanelo liswanisezo za Kupuzo, lu tokwa ku utwisisa se bu talusa bulikani bo bunca ni ba ba ku bona. Bibele i li: “[Muñ’a] Bupilo wa bulela, u li: A mu bone! Mazazi a taha ao ni ka iswala bulikani bo bunca ni ba ndu ya Isilaele ni ba ndu ya Juda. . . . Ni ka ñola mulao wa ka mwa lifuba za bona, ni u ñole mwa lipilu za bona. Ni ka ba Mulimu wa bona, bona i be sicaba sa ka. . . . Ni ka swalela bumaswe bwa bona, mi ha ni sa na ku hupula sibi sa bona.”—Jeremia 31:31-34.

Bulikani bo bunca bu konahalisa swalisano ye ipitezi ni Jehova Mulimu. Ka bulikani b’o, sikwata se siñwi sa batu si ba sicaba sa hae mi yena u ba Mulimu wa sona. Mulao wa Jehova u ñozwi mwa lifuba za bona, mwa lipilu za bona, mi niheba ba ba kwand’a mutapi wa Majuda ba ba ile kwa mupato mwa nama ba kona ku taha mwa swalisano ya bulikani bo bunca ni Mulimu. (Maroma 2:29) Muñoli yo muñwi wa Bibele Luka u ñola ka za mulelo wa Mulimu wa “ku talima bahedeni, kuli mwahal’a bona a ipatele sicaba se si sumekelwa Libizo la hae.” (Likezo 15:14) Ka ku ya ka 1 Pitrosi 2:10, ‘ne ba si sicaba, kono cwale se ba li sicaba sa Mulimu.’ Mañolo a ba biza “Isilaele wa Mulimu,” ili ku talusa, Isilaele wa kwa moya. (Magalata 6:16; 2 Makorinte 1:21) Kacwalo, bulikani bo bunca ki bulikani bo bu mwahal’a Jehova Mulimu ni Isilaele wa kwa moya.

Mwa busihu bwa hae bwa mafelelezo ku ba ni balutiwa ba hae, Jesu yena ka sibili n’a ezize hape bulikani bu sili ni bona. N’a ba bulelezi  kuli: “Ni ka mi fa mubuso, sina ndate h’a ni file ona.” (Luka 22:29) Bo ki bulikani bwa Mubuso. Palo ya batu ba ba si ka petahala ba ba kenyizwe mwa bulikani bwa Mubuso ki 144,000. Ha se ba zuselizwe kwa lihalimu, ba ka busa ni Kreste sina malena ni baprisita. (Sinulo 5:9, 10; 14:1-4) Kacwalo, ba ba mwa bulikani bo bunca ni Jehova Mulimu hape ba mwa bulikani bwa Mubuso ni Jesu Kreste. Ki bona fela ba ba na ni tukelo ya ku ca liswanisezo za Mulalelo wa Mulena.

Ba ba swanela ku ca liswanisezo za Kupuzo ba ziba cwañi kuli ba mwa swalisano ye ipitezi ni Mulimu ni kuli ba ka ca sanda ni Kreste? Paulusi u talusa kuli: “Ona Moya [o kenile] u pakelana ni moya wa luna [maikuto a luna] kuli lu bana ba Mulimu. Mi ha lu li bana hape lu ka ca sanda; lu ce sanda sa Mulimu, lu si ce ni Kreste; haiba lu utwa butuku ni yena, kuli lu fumane kanya ni yena.”—Maroma 8:16, 17.

Ka moya wa hae o kenile, kamba m’ata a sebeza, Mulimu u toza ba ba ka ca sanda ni Kreste. Moya w’o u ba kolwisa kuli ki baci ba sanda sa Mubuso. U tahiseza Bakreste ba ba tozizwe ku ikutwa ku ba ni sepo ya lihalimu. Ba ikutwa kuli zote ze i bulela Bibele ka za bupilo bwa kwa lihalimu li ama bona. Hape, ba itatela ku itombola lifi kamba lifi za fa lifasi, ku kopanyeleza ni bupilo bwa fa lifasi ni liswalisano kaufela za butu. Nihaike kuli Bakreste ba ba tozizwe ka moya ba lemuha kuli bupilo mwa Paradaisi ya fa lifasi bu ka ba bo bunde, yeo haki sepo ya bona. (Luka 23:43) Isi kabakala mihupulo ya buhata ya bulapeli kono kabakala z’o peta moya wa Mulimu, ba na ni sepo ya lihalimu ye sa cinci mi kacwalo ki baci ba ba swanela ba liswanisezo za Kupuzo.

L’u nge kuli mutu h’a ikolwisi hande kuli u mwa bulikani bo bunca ni mwa bulikani bwa Mubuso. Ku cwañi haiba ni bupaki bwa moya wa Mulimu h’a na bona bwa kuli ki muca sanda ni Kreste? Fohe neikaba ku fosa ha n’a ka ca liswanisezo za Kupuzo. Kaniti, Mulimu n’a si ke a tabela haiba mutu ka ku ziba n’a ka iponahaza ku ba ya ketilwe ku ba mubusi wa kwa lihalimu ni muprisita hailif’o n’a si na luli pizo ye cwalo.—Maroma 9:16; Sinulo 22:5.

U Eziwa Ha Ku Fita Nako Ye Kuma Kai?

Kana lifu la Jesu li swanela ku hupulwanga sunda ni sunda kamba mwendi mane zazi ni zazi? Kreste n’a tatekile Mulalelo wa Mulena mi n’a bulailwe ka sobozi fa Lizazi la Paseka. Ka ku ba ye n’e eziwanga hañwi fela ka silimo, ili la Nisani 14, Paseka n’e ezezwanga ku hupula ku lamulelwa kwa Isilaele mwa butanga bwa Egepita. (Exoda 12:6, 14; Livitike 23:5) Kacwalo lifu la “Paseka ya luna, ili Kreste” li swanela ku hupulwanga hañwi fela ka silimo, isi sunda ni sunda kamba zazi ni zazi. (1 Makorinte 5:7) Mwa ku eza Mulalelo wa Mulena, Bakreste ba latelela muezezo o swana ni mwa n’a ezelize Jesu ha n’a u tatekile.

Mi manzwi a Paulusi a talusañi, a li: “Kamita ha mu ca kwa buhobe bo, mi mu nwela mwa sinwiso seo, ikaba mu bulela lifu la Mulena, mane a kute”? (1 Makorinte 11:26) Mwa liñolo le, Paulusi n’a itusisize linzwi le li talusa “nako ni nako yeo,” kamba “ka nako kaufela.” Kacwalo n’a bulela kuli ka nako kaufela yeo Bakreste ba ba tozizwe ne ba ka ca liswanisezo zeo, neikaba kuli ba bulela tumelo ya bona mwa sitabelo sa Jesu sa tiululo.

Bakreste ba ba tozizwe ne ba ka hupula lifu la Kreste “mane a kute.” Mukiti wo n’o ka zwelapili ku fitela Jesu a kuta ku to amuhela balateleli  ba hae ba ba tozizwe ku ba isa kwa lihalimu ka ku ba zuseza kwa bupilo bwa kwa moya mwa nako ya ku ba teñi kwa hae. (1 Matesalonika 4:14-17) Seo si lumelelana ni manzwi a Kreste kwa baapositola ba hae ba ba sepahala b’a 11, a li: “Ni sin’o ya, ni ku mi lukiseza sibaka, ni ka kuta, ni t’o mi nga, kuli mo ni inzi, ni mina mu be kwateñi.”—Joani 14:3.

I Na ni Tuso Mañi ku Mina?

Kana kwa tokwahala ku ca liswanisezo za Kupuzo kuli mutu a tusiwe ki sitabelo sa Jesu ni ku fumana bupilo bo bu sa feli fa lifasi? Kutokwa. Mwa Bibele ha ku na se si akaleza kuli ha ba ka zusiwa kwa bafu fa lifasi, batu ba ba saba Mulimu ba ba cwale ka Nuwe, Abrahama, Sara, Isaka, Rebeka, Josefa, Mushe, ni Davida ba ka to ca liswanisezo zeo. Kono bona ni ba bañwi kaufela ba ba nyolelwa bupilo bo bu sa feli fa lifasi ba ka tokwa ku bonisa tumelo ku Mulimu ni Kreste ni mwa tukiso ya Jehova ya sitabelo sa tiululo sa Jesu. (Joani 3:36; 14:1) Kuli mu fumane bupilo bo bu sa feli, ni mina mu lukela ku bonisa tumelo ye cwalo. Ku fumaneha kwa mina kwa mukiti wa ka silimo wa lifu la Kreste ku ka mi hupulisa sitabelotuna seo mi ku swanela ku tungisa buitebuho bwa mina ku sona.

Muapositola Joani n’a koñomekile butokwa bwa sitabelo sa Jesu ha n’a bulezi kuli: “Bana ba ka ba banyinyani [batoziwa ka yena], ni mi ñolela litaba zeo kuli mu si ke mwa eza sibi. Mi mutu h’a ezize sibi, lu na ni Muyemeli fapil’a Ndate, ki Jesu Kreste Ya-Lukile. Yena ki sitabelo se si lifa libi za luna; mi isi za luna fela, kono ni za lifasi kamukana.” (1 Joani 2:1, 2) Ba ba tozizwe ba kona ku bulela kuli sitabelo sa Jesu ki tifo ye swanela ya libi za bona. Kono hape ki sitabelo sa libi za batu kaufela, se si konahalisa batu ba ba ipeya ku utwa ku fumana bupilo bo bu sa feli!

Kana mu ka ba teñi la April 4, 2004, kwa Kupuzo ya lifu la Jesu? Mukiti w’o u ka eziwa mwa lifasi kaufela ki Lipaki za Jehova kwa libaka za bona za makopanelo. Haiba mu ka fumaneha kwateñi, mu ka tuseha ka ku teeleza kwa ngambolo ya Bibele ya butokwa hahulu. Mu ka hupuliswa butuna bwa zeo Jehova Mulimu ni Jesu Kreste ba lu ezelize. Hape ku ka tusa kwa moya ku kopana ni batu ba ba lata hahulu Mulimu ni Kreste ni sitabelo sa Jesu sa tiululo. Mukiti w’o u kana luli wa tiisa takazo ya mina ya ku amuhela sishemotuna sa Mulimu, se si libisa kwa bupilo bo bu sa feli. Mu si lumelezi nto ifi kamba ifi ku mi palelwisa. Ite mu tahe kwa mukiti o munde w’o o kutekehisa ni ku tabisa Ndat’a luna wa kwa lihalimu, Jehova Mulimu.

[Siswaniso se si fa likepe 5]

Lifu la Jesu li zamaelela ni liponiso ze peli za lilato

[Siswaniso se si fa likepe 6]

Buhobe bo bu si ka ya mumela ni veine ki liswanisezo ze swanela za mubili wa Jesu o si na sibi ni mali a hae a n’a suluzwi