“U Feleleze za Bukombwa bwa Hao”

“U eze sebelezo ya hao ka ku tala.”—2 TIMOTEA 4:5, Bibele ya Byington.

1, 2. Nihaike kuli Bakreste kaufela ki babuleli ba evangeli, ki lifi zeo Mañolo a tomezi maeluda?

KANA mu bashaeli ba Mubuso? Haiba ku cwalo, mu itumele ku Jehova Mulimu kwa tohonolo-tuna yeo. Kana mu maeluda mwa puteho? Yeo ki tohonolo ye ñwi ye zwa ku Jehova. Kono ha lu lukeli ku libala ni hanyinyani kuli haki lituto za kwa sikolo kamba buikoneli bwa ku bulela ka bukwala ze konisa ufi kamba ufi wa luna ku eza bukombwa kamba buokameli mwa puteho. Jehova ki yena ya lu fa ku kona ku eza bukombwa, mi ki ka libaka la kuli banna ba bañwi ku luna ba kwanisa lipimo ze ñwi ze mwa Mañolo ha ba na ni tohonolo ya buokameli.—2 Makorinte 3:5, 6; 1 Timotea 3:1-7.

² Bakreste kaufela ba ba ineezi ba eza musebezi wa mubuleli wa evangeli, kono sihulu ki baokameli, kamba maeluda, ba ba tokwa ku fa mutala o munde mwa bukombwa. Maeluda ba ba eza ka t’ata ku “sebeza ka ku talusa ni ka ku luta” ba lemuhiwa ki Mulimu ni Kreste, hamoho ni Lipaki ba bañwi ba Jehova. (1 Timotea 5:17; Maefese 5:23; Maheberu 6:10-12) Mwa miinelo kaufela, tuto ya eluda i lukela ku ba ye kondile kwa moya, kakuli muapositola Paulusi n’a bulelezi muokameli Timotea kuli: “Ku ka taha nako, ye ku yona, batu ba ka hana tuto ye pilisa; kono kabakala ku baba mwa lizebe ba ka ikubukanyeza baluti, ka ku ya ka litakazo za bona. Ba ka kelusa lizebe za bona kwa niti, ba yaulukele kwa matangu. Kono wena u iswale mwa linto kaufela; u itiise mwa butata; u eze musebezi wa mubuleli wa Evangeli; u feleleze za bukombwa bwa hao.”—2 Timotea 4:3-5.

3. Ku tokwa ku ezwañi ilikuli lituto za buhata li si ke za zieza puteho kwa moya?

³ Kuli a bone teñi kuli lituto za buhata ha li ziezi puteho kwa moya, muokameli u lukela ku mamela kelezo ya Paulusi ye li: “U iswale mwa miinelo kaufela, . . . u eze sebelezo ya hao ka ku tala.” (2 Timotea 4:5, Byington) Ee, eluda u tokwa ku ‘feleleza za bukombwa bwa hae.’ U swanela ku bu eza ka ku tala, ka tokomelo, kamba ka sipimo se si tezi. Eluda ya eza bukombwa bwa hae ka ku tala u tokomela hande buikalabelo bwa hae kaufela, a sa keshebisi nto ifi ni ifi kamba ku i siyela fahali. Munna ya cwalo wa sepahala nihaiba mwa lika ze nyinyani.—Luka 12:48; 16:10.

4. Ki lifi ze kona ku lu tusa ku feleleza za bukombwa?

⁴ Ku feleleza za bukombwa bwa luna haki kamita ku tokwa nako ye ñata, kono ku tokwa luli ku itusisa hande nako. Ku ezanga lika ka ku li tomahanya hande ku kona ku tusa Bakreste bote ku peta ze ñwi mwa bukombwa. Kuli eluda a kone ku tanda nako ye ñata mwa sebelezo ya mwa simu, u tokwa ku tomahanya hande za mwa bupilo bwa hae ilikuli a li eze hande ni kuli a zibe z’a ka shimbululela ba bañwi ni mwa ku ezeza cwalo. (Maheberu 13:17) Kaniti, eluda ya kutekeha ni yena u eza se si mu lukela, inge Nehemia ya n’a swalisani ni ba bañwi mwa ku yaha makwakwa a Jerusalema. (Nehemia 5:16) Mi batanga bote ba Jehova ba swanela ku yanga kamita mwa musebezi wa ku kutaza Mubuso.—1 Makorinte 9:16-18.

5. Lu swanela ku ikutwa cwañi ka za bukombwa?

⁵ Ki musebezi kwa ku tabisa o lu filwe wa ku shaela Mubuso o tomilwe kwa lihalimu! Kaniti luli lwa itebuha hahulu tohonolo ya luna ya ku kutaza taba ye nde kai ni kai ko ba yahile batu mwa lifasi pili mafelelezo a si ka taha kale. (Mateu 24:14) Nihaike ha lu si ka petahala, lwa  kona ku tiiswa ki manzwi a Paulusi a’ li: “Bufumu bo [bwa bukombwa], lu na ni bona mwa lipiza za lizupa, kuli mata ao a matuna hahulu ibe a Mulimu, isi a luna.” (2 Makorinte 4:7) Ee, lwa kona ku eza sebelezo ye amuheleha—kono fela ki ka m’ata ni butali z’a fa Mulimu.—1 Makorinte 1:26-31.

Ku Bonahaza Kanya ya Mulimu

6. Ki ifi shutano ye n’e til’o ba teñi mwahal’a Isilaele wa ka sipepo ni Isilaele wa kwa moya?

⁶ Ka ku ama kwa Bakreste ba ba tozizwe, Paulusi u bulela kuli Mulimu “ki Yena ya lu fa ku kona ku ba fa sebelezo ya bulikani bo bunca.” Muapositola u bonisa shutano ye mwahal’a bulikani bo bunca bo ne bu itamilwe ni Isilaele wa kwa moya ka Jesu Kreste ni bulikani bwa Mulao bwa kale bo ne bu itamilwe ni Isilaele wa ka sipepo ka Mushe. Paulusi u ekeza kuli Mushe ha n’a shetumukile fa Lilundu la Sinai a lwezi matapa a’ na ni Milao ye Lishumi, pata ya hae ne i benya hahulu kuli mane Maisilaele ba palelwa ku i talima. Kono hasamulaho, kwa ezahala nto ye tuna kakuli ne “ba tatafalile mwa maikuto a bona” mi kapai ne ka til’o kwahela lipilu za bona. Kono mutu h’a sikuluhela ku Jehova ka buipeyo bo bu tezi, kapai kao ka zwiswa. Paulusi h’a felize u bulela za bukombwa bo bu filwe ba ba mwa bulikani bo bunca. U li: “Luna kaufela [“lu bonahaza inge liiponi,” NW] kanya ya Mulena, ka meto a’ si na kapai.” (2 Makorinte 3:6-8, 14-18; Exoda 34:29-35) Ba “lingu ze ñwi” za kacenu za Jesu ni bona ba na ni tohonolo ya ku bonahaza kanya ya Jehova.—Joani 10:16.

7. Batu ba kona ku bonahaza cwañi kanya ya Mulimu?

⁷ Batu ba ba tezi sibi ba kona ku bonahaza cwañi kanya ya Mulimu, hailif’o ha ku na mutu ya kona ku talima pata ya hae mi a pila? (Exoda 33:20) Taba kikuli, kwand’a kuli Jehova ka sibili u na ni kanya, ku na ni hape mulelo wa hae o kanya wa ku bonisa ka Mubuso wa hae tukelo ya hae ya ku busa. Litaba ze ama Mubuso ki ze ñwi za “ze tuna za Mulimu” ze n’e kalile ku shaelwa ki be ne ba sululezwi moya o kenile fa Pentekonta ya 33 C.E. (Likezo 2:11) Ka ketelelo ya moya, ne ba kona ku feleleza za bukombwa bo ne ba filwe ku bu eza.—Likezo 1:8.

8. Ka za bukombwa, Paulusi n’a itamile ku ezañi?

⁸ Paulusi n’a itamile kuli ha ku na se ne si ka mu palelwisa ku feleleza za bukombwa bwa hae. N’a ñozi kuli: “Ka ku bona kuli lu beilwe fa sebelezo yeo ka sishemo se lu ezizwe, ha lu fokoli. Kono lu tuhezi linto ze patwa, ili ze swabisa; ha lu zamayi ka mano a maswe, ha lu zwakanyi Linzwi la Mulimu; kono ka ku bonahaza niti, lu ipaka hande kwa lizwalo la mutu ni mutu, fapil’a Mulimu.” (2 Makorinte 4:1, 2) Ka “sebelezo yeo” y’a bulela Paulusi, niti ya bonahazwa mi liseli la kwa moya la monyeha kai ni kai.

9, 10. Ku konahala cwañi ku bonahaza kanya ya Jehova?

⁹ Ka za Muñ’a liseli tenyene ni liseli la kwa moya, Paulusi u ñola kuli: “Mulimu ya n’a ize: Liseli li benye mwa lififi, ki Yena ya benyisize mwa lipilu za luna liseli la zibo ya kanya ya Mulimu ye mwa pata ya Kreste.” (2 Makorinte 4:6; Genese 1:2-5) Bakeñisa kuli lu filwe tohonolo ye tuna-tuna ya ku ba likombwa za Mulimu, lu  tundameneñi ku ipuluka lu li ba ba kenile ilikuli lu kone ku bonahaza sina liiponi kanya ya Jehova.

¹⁰ Batu ba ba mwa simbwi kwa moya ha ba koni ku bona kanya ya Jehova kamba mo i bonisezwa ki Jesu Kreste, yena Mushe yo Mutuna. Kono luna batanga ba Jehova lu amuhela liseli le li kanya ka Mañolo ni ku li bonahaza kwa batu. Kuli ba ba mwa lififi la kwa moya ba bande sinyeho, ba tokwa liseli le li zwa ku Mulimu. Kacwalo, ka nyakalalo ni tukufalelo ye tuna, lu ipeya ku utwa taelo ya Mulimu ya kuli lu benyise liseli mwa lififi ilikuli Jehova a kanyiswe.

Mu Benyise Liseli la Mina kwa Lituto za Bibele za fa Mandu

11. Jesu n’a buleziñi ka za ku benyisa kwa luna liseli, mi ki ifi nzila ye ñwi ye lu kona ku eza cwalo ka yona?

¹¹ Jesu n’a bulelezi balateleli ba hae kuli: “Mina mu liseli la lifasi. Munzi o yahilwe fa lilundu ha u koni ku patwa. Ha ku na ya tukisa lambi kuli a i kwahele ka tubana; kono kikuli a i beye fa ñandaleza, mi i bonise ba ba mwa ndu kamukana. Liseli la mina a li bonise batu cwalo, kuli ba bone misebezi ya mina ye minde, mi ba lumbe Ndat’a mina ya kwa lihalimu.” (Mateu 5:14-16) Muzamao wa luna o munde wa kona ku susumeza ba bañwi ku lumbeka Mulimu. (1 Pitrosi 2:12) Mi linzila ze lu peta ka zona musebezi wa ku bulela evangeli li lu konisa ku benyisa liseli la luna mo kuñata. O muñwi wa milelo ya luna ye mituna ki ku bonahaza liseli la kwa moya la Linzwi la Mulimu ka ku zamaisa lituto za Bibele za fa mandu ze tahisa siselo. Yeo ki nzila ya butokwa hahulu ya ku feleleza za bukombwa bwa luna. Ki lifi liakalezo ze kana za lu tusa ku zamaisa lituto za Bibele ze susumeza lipilu za ba ba bata niti?

12. Tapelo i zamaelela cwañi ni musebezi wa ku zamaisa lituto za Bibele za fa mandu?

¹² Ku lapela ku Jehova ka za taba yeo ku bonisa takazo ya luna ye tuna ya ku zamaisa lituto za Bibele. Hape ku bonisa kuli lu bona butokwa bwa ku tusa ba bañwi ku fumana zibo ya ku ziba Mulimu. (Ezekiele 33:7-9) Jehova luli u ka alaba litapelo za luna ni ku fuyola ku ikataza hahulu kwa luna mwa bukombwa. (1 Joani 5:14, 15) Kono ha lu lapeleli fela ku fumana mutu wa ku ituta ni yena Bibele. Ha se lu fumani tuto, tapelo ni ku yeya ka za butokwi tenyene bwa ya ituta Bibele li ka lu tusa ku zamaisanga tuto ni tuto ka mukwa o tahisa siselo.—Maroma 12:12.

13. Ki lifi ze kona ku lu tusa ku zamaisa lituto za Bibele za fa mandu ze tahisa siselo?

¹³ Kuli lu zamaise hande lituto za Bibele za fa mandu, lu lukela ku itukiseza hande tuto ni tuto. Haiba lu ikutwa kuli ha lu baikoneli, ku kana kwa tusa hahulu ku talima m’o muokameli wa Tuto ya Buka ya Puteho a lutela kwa tuto ya ka viki ni viki. Mwendi fokuñwi ne lu ka kona ku sebeza ni bahasanyi ba Mubuso ba ba petanga ze nde mwa ku zamaisa lituto za Bibele za fa mandu. Nihakulicwalo, lu swanela ku iteekela hahulu moya ni milutelo ya Jesu Kreste.

14. Lu kona ku susumeza cwañi pilu ya muituti wa Bibele?

¹⁴ Jesu n’a ikola ku eza tato ya Ndat’ahe wa kwa lihalimu ni ku bulela ku ba bañwi ka za Mulimu. (Samu 40:8) N’a na ni musa mi n’a konile ku susumeza lipilu za be ne ba mu teelelize. (Mateu 11:28-30) Kacwalo lu likange ka t’ata ku susumeza lipilu za be lu luta Bibele. Kuli lu kone ku eza cwalo, lu tokwa ku itukisezanga tuto ni tuto inze lu nahana miinelo tenyene ya muituti. Ka mutala, haiba u hulezi k’o Bibele i sa zibwi hahulu, ne lu kana lwa tokwa ku mu kolisa kuli Bibele ki ya niti. Haiba ku cwalo, kaniti lu ka tokwa ku bala mañolo a mañata ni ku a talusa.

Mu Tuse Baituti ku Utwisisa Liswanisezo

15, 16. (a) Lu kona ku tusa cwañi muituti ya sa utwisisi swanisezo ye itusisizwe mwa Bibele? (b) Lu kona ku ezañi haiba ye ñwi ya lihatiso za luna i itusisa swanisezo yeo muituti wa Bibele a fumana t’ata ku i utwisisa?

¹⁵ Muituti wa Bibele mwendi h’a zibi hande  swanisezo ye ñwi ye itusisizwe mwa Mañolo. Ka mutala, mwendi h’a utwisisi za n’a talusa Jesu ha n’a swaniselize Mubuso kwa pelela ye nde. (Mateu 13:45, 46) Jesu n’a talusa licwe le li tula hahulu le li fumanehanga mwa bikapana bya libupiwa ze ñwi za mwa mawate. Kono nesi lipelela kaufela ze n’e li ze nde. Mwa swanisezo yeo, mutu wa mulekisi n’a itemuhezi hande-nde teko ye tuna hahulu ya pelela ya n’a fumani mi n’a tabela ku ikataza ku eza litukiso kaufela ze n’e tokwahala ni ku itombola zote kuli a i leke. Kuli swanisezo ya Jesu i utwisiswe, ku kana kwa tokwahala patisiso fa taba ye cwale ka “Pearl” [Pelela] mwa hatiso ye cwale ka Insight on the Scriptures (haiba i teñi mwa puo ye mu kona ku bala). * Kono se sinde hakakañi kiha lu ya kwa ku zamaisa tuto ya Bibele lu na ni taluso yeo muituti a i utwisisa ni ku ikola!

¹⁶ Buka ya ku ituta ka yona Bibele i kana ya itusisa swanisezo yeo muituti yo muñwi a fumana t’ata ku i swala. Mu i tolongoshe hande, kamba mu itusise swanisezo ye ñwi ye na ni sisupo se si swana. Mwendi hatiso i koñomeka kuli mwa linyalo ku tokwahala hahulu mulikani yo munde ni swalisano. Ka ku swaniseza, ku kana kwa bulelwa za munna ya kwendauka mwatas’a simunyelule s’a sweli ka mazoho, wa si tuhela, mi u libelela kuli mubapali yo muñwi a mu akwele. Kamba mwendi mwa kona ku swaniseza butokwa bwa mulikani yo munde ni bwa swalisano ka m’o babeleki ba swalisanelanga ka ku tambekana milwalo ha ba i longola mwa mukolo.

17. Lu kona ku itutañi ku Jesu ka za liswanisezo?

¹⁷ Ku yolisa swanisezo ku kana kwa tokwa kuli lu itukiseze cimo. Niteñi, yeo ki nzila ya ku bonisa ka yona kuli luna ka butu lwa isa pilu ku muituti wa Bibele. Jesu n’a itusisize liswanisezo ze bunolo kuli a nolofaze litaba ze t’ata. Ngambolo ya fa Lilundu ya n’a file i na ni mitala ya seo, mi Bibele i bonisa kuli tuto ya hae ne i susumelize bateelezi ba hae. (Mateu 5:1–7:29) Jesu n’a talusize lika ka pilu-telele kakuli n’a isa hahulu pilu kwa batu.—Mateu 16:5-12.

18. Ku akalezwañi ka za mañolo a’ bonisizwe fela a’ mwa lihatiso za luna?

¹⁸ Ha lu isa pilu ku ba bañwi, lu ka susumezwa ku talusa lika “ka ku ya ka Mañolo.” (Likezo 17:2, 3) F’o ku tokwahala ku itusisa hande ni ku ituta ka t’ata ni ka milapelo lihatiso ze taha ka “sikombwa se si sepahala.” (Luka 12:42-44) Ka mutala, buka ya Zibo Ye Isa kwa Bupilo bo Bu Sa Feli i na ni manzwi a mañata a’ zwelela mwa Mañolo. * Kabakala bunyinyani bwa buka, mañolo a mañwi a bonisizwe fela. Ha mu zamaisa tuto ya Bibele, ku butokwa ku bala ni ku talusa niheba a mañwi kwa mañolo ao a’ bonisizwe fela. Taba kikuli, tuto ya luna i tomile fa Linzwi la Mulimu, mi lona li m’ata hahulu. (Maheberu 4:12) Mu ame kwa Bibele kamita mwahal’a tuto ni tuto, ili ku itusisa hahulu mañolo a’ li mwa maparagilafu. Mu tuse muituti ku bona ze i bulela Bibele ka za taba ye ñwi kamba muzamao o muñwi. Mu like ka t’ata ku mu bonisa mw’a ka tusehela h’a ipeya ku utwa Mulimu.—Isaya 48:17, 18.

 Mu Buze Lipuzo Ze Tusa Mutu ku Nahanisisa

19, 20. (a) Lipuzo ze tisa kuli mutu a bulele maikuto a hae li butokwa cwañi ha ku zamaiswa tuto ya Bibele ya fa ndu? (b) Ku konwa ku ezwañi haiba taba ye ñwi i sa tokwa ku nyakisiswa?

¹⁹ Ka ku itusisa ka bukwala lipuzo, Jesu n’a tusize batu ku nahanisisa lika. (Mateu 17:24-27) Ha lu buza lipuzo ze tisa kuli muituti wa Bibele a bulele maikuto a hae ili ze sa mu zingi, likalabo za hae li kana za bonisa z’a nahana fa taba ye ñwi. Lu kana lwa lemuha kuli u sa na ni mibonelo ye si ya ka Mañolo. Ka mutala, a kana a lumela mwa tuto ya Silalu. Mwa kauhanyo 3, buka ya Zibo i bulela patalaza kuli linzwi la “Silalu” ha li yo mwa Bibele. Buka yeo i na ni manzwi a’ zwelela mwa mañolo ni ku fa mañolo a mañwi a’ bonisa kuli Jehova ni Jesu haki mutu a li muñwi ni kuli moya o kenile haki mutu kono ki m’ata a sebeza a Mulimu. Ku bala ni ku buhisana mañolo a’ mwa Bibele ao ku kana kwa likana. Kono haiba ku sa tokwahala ze ñwi bo? Mwendi hamulaho wa tuto ya kamita ye tatama, mwa kona ku tanda nako ku buhisana hande taba yeo ka mo i tolongoshelizwe mwa hatiso ye ñwi ya Lipaki za Jehova, inge cwalo broshuwa ya Kana Wa Swanela ku Lumela mwa Silalu? Ku tuha f’o, lwa kona ku zwisezapili tuto ka ku itusisa buka ya Zibo.

²⁰ Mu nge kuli kalabo ya muituti kwa puzo ya mw’a bonela lika ya komokisa kamba mane i bushize. Haiba ki taba ya ku zuba, kamba ye ñwi ye kona ku tunka mutu, lu kana lwa akaleza kuli lu zwele fela pili ku ituta ni ku ambola taba yeo ka nako i sili. Ku ziba kuli muituti u sa zuba ku lu konisa ku fumana litaba ze hatisizwe ze kana za mu tusa ku eza zwelopili kwa moya. Ha lu nze lu ikataza ku susumeza pilu ya muituti, lwa kona ku lapela kuli Jehova a mu tuse ku hula kwa moya.

21. Ku kona ku zwañi mwa ku cinca-cinca milutelo ya luna ka ku ya ka butokwi tenyene bwa muituti wa Bibele?

²¹ Ka buitukiso bo bunde ni tuso ya Jehova, kaniti lu ka kona ku cinca-cinca milutelo ya luna ka ku ya ka butokwi tenyene bwa muituti wa Bibele. Nako ha i nze i ya, mwendi lu ka kona ku mu tusa ku ba ni lilato le li tungile ku Mulimu. Hape mwendi lu ka kona ku yahisa likute ni buitebuho kwa kopano ya Jehova. Mi kw’a tabisa hakalo baituti ba Bibele ha ba lumela kuli ‘Mulimu u mwateñi ku luna’! (1 Makorinte 14:24, 25) Kacwalo haike lu zamaise lituto za Bibele ze tahisa siselo ni ku eza mo lu konela kaufela ku tusa ba bañwi ku ba balutiwa ba Jesu.

Bufumu Bo Bu Swanelwa ku Itebuhiwa Hahulu

22, 23. Ku tokwahalañi kuli lu feleleze za bukombwa bwa luna?

²² Kuli lu feleleze za bukombwa bwa luna, lu lukela ku tiyela fa m’ata a’ fa Mulimu. Ka za bukombwa, Paulusi n’a ñolezi Bakreste ka yena ba ba tozizwe kuli: “Bufumu bo, lu na ni bona mwa lipiza za lizupa, kuli mata ao a matuna hahulu ibe a Mulimu, isi a luna.”—2 Makorinte 4:7.

²³ Ibe kuli lu batoziwa kamba lu ba “lingu ze ñwi,” lu swana sina lipiza za lizupa ze fokola. (Joani 10:16) Niteñi, Jehova wa kona ku lu fa m’ata a tokwahala mwa ku peta misebezi ye lu filwe ku si na taba ni matata e lu ipumana ku ona. (Joani 16:13; Mafilipi 4:13) Kacwalo haike lu sepe Jehova ka ku tala, ku itebuha hahulu bufumu bwa sebelezo ya luna, ni ku feleleza za bukombwa bwa luna.

[Litaluso za kwatasi]

Ne Mu Ka Alaba Cwañi?

• Maeluda ba kona ku ezañi kuli ba feleleze za bukombwa bwa bona?

• Lu kona ku eza cwañi kuli lu zamaisange hande lituto za luna za Bibele za fa mandu?

• Ne mu ka ezañi muituti wa Bibele ha n’a si ke a utwisisa swanisezo kamba ha n’a ka tokwa litaba ze ñwi za fahalimu?

[Lipuzo za Tuto]

[Siswaniso se si fa likepe 16]

Maeluda ba Sikreste b’a luta mwa puteho ni ku tusa balumeli ka bona ku yelaseli mwa bukombwa

[Siswaniso se si fa likepe 18]

Ku zamaisa lituto za Bibele za fa mandu ze tahisa siselo ki ye ñwi ya linzila ze lu benyisa ka zona liseli la luna